1. Ucampis waljaniw utjani – cunürutejj nayajj mä muspharcañ luräw jupanac taypin lucäjja, jaken wawanacapatac lurctsa uca arsüwinacjj amtasiñajjataqui, wasitat Israelan utapanquiri jakenacajjan nayrapachjamar cut-tayañajjataqui amparajj payïr cuti loktañajjataqui;

2. Uqhamaraqui amtasiñajjataqui cuna arsüwinactejj juma Nefitaqui, awquimataquirac lurctsa jathamat amtasiñajjataqui, jathaman arunacapan nayan lacajjat jathamar mistuñapataqui; nayan arunacajjasti orake thiyanaccam jiscʼat arsuni, Israelan utapanquiri nayan jakenacajjatac mä añachayirjama.

3. Nayan arunacajjan jiscʼat arsutäñap laycu walja gentilanacajj sapjjani: Biblia, Biblia! Niy mä Bibliajj jiwasanacan utj-jje. Janiw jucʼampi Biblia utjcaniti.

4. Ucampis aqham siw Dios Tatitojja: Ay tʼajjmaranaca, mä Bibliajj jupanacan utjani. Ucasti nayan nayra judio amtäwi jakenacjjat mistuni. Qhitinacattejj Biblia catokapquejja uca judionacarojj cuna yuspagars churapjje? Jisa, camsañs munapjje genilanacajja? Gentilanacar khespiyañ apañapatac judionacan saräwinacapjja, irnakäwinacapjja, tʼakhesïwinacapjja, nayatac chʼamachʼasïwinacapjj jupanacajj amtapjjeti?

5. Gentilanaca, nayan nayra judio amtäw jakenacajjat amtasipjjtati? Janiwa, antisas jupanacar ñankhachapjjtajja, uñisipjjtawa, janiraquiw jupanacar nayrapachjamar cut-tayañatac chʼamtʼapctati. Ucampis naya Tatitojj janiw jakenacajjat armascti, ucat take ucanacjja jumanacan quipca pʼekenacamjjar cut-tʼayämawa.

6. Juma tʼajjmara, aqham siscätajj uca: Mä Bibliajja. Niy jiwasanacan mä Bibliajj utj-jje, jiwasanacan yakha Biblian utjañapajj janiw cunataquïcaspas sasa. Mä Bibljj catokapjjtati jan judionacat ucjj catokasa?

7. Marcanacan mayat jucʼamp utjatapjj janit yatipcta? Janit yatipcta naya Dios Tatituman take jakenacar luratajjatjja, jachʼa kota lamar islanacanquirit amtañajjatjja, alayanquir alajjpachanacanjja aynachanquir acapachanjja sarayañajjatsa, jaken wawanacaparu, jisa, take acapach marcanacjjarojj nayan arojj apañajjatsa?

8. Cunats jucʼampi arojj catokañamat thuthusipjjta? Janit yatipcta, pä oraken yatiyañapajj jumanacataqui ircatäwiwa nayan Diosätajjata, nayan mä marcata yakha marcat quipcjam amtasitajjata? Uca laycojja cuntejj mä marcar arsctjja uca quipca arunac yakha marcar arsuracta. Ucat uca paya marcapuraw jiquiscani uqhajja, uca paya marcan ircatäwipajj mayachthapiraquini.

9. Nayan wasüru jichhüru wiñayataqui quipcätajjata, quipca munañajjarjam arunacajj arsutajjats waljaniru uñachayañajjataqui nayajj ucjj lurta. Nayan luräwejjajj janiw tucuyatäquiti, jaken tucusïwipcama janiraquiw tucuscaniti, ucürut ucsarojja wiñayataqui janiraquiw tucuscaniti. Ucatwa nayan mä ar arsutajjata, yakha ar jan arsquirists uqham jan amuyasipjjañamäquiti.

10. Ucatwa, jumanacan mä Biblian utjatap laycu janiw ucan take arunacajjanïtapjj amuyasipjjañamäquiti. Janiraquiw amuyasipjjañamäquiti nayan jan yakha arunac kellkayatajjatjja.

11. Cunalaycutejja jalsu tokena jalanta tokensa alay tokensa aynacha tokensa jachʼa kota lamar islanacansa nayajj take jakenacar camachit churtwa, cuna arunactejj jupanacar arsctsa uca arunacjj kellkañanacapataqui. Cunalaycutejja cuna kellkäwinacatejj kellkatäcanejja uca kellkäwinacatjja nayaw oraker taripäjja, sapa jakerojj quipca luräwinacaparjama, kellkatäqui ucarjama.

12. Judionacar arsöjja, Jupanacasti ucjj kellkani. Nefi jakenacar arsuraquëjja, jupanacasti ucjj kellkani. Irpscäyätjja uca yakha Israelan utapanquir tamanacaru arsuraquëjja, jupanacasti ucjj kellkani. Uqhamaraqui take acapachanquiri marcanacar parläjja, jupanacasti ucjj kellkani.

13. Ucatsti Nefi jakenacan arunacapajj judionacan utjani. Judionacan arunacapajj Nefi jakenacan utjaraquini. Israelan chhaktata tamanacapan arunacapasti Nefi jakenacanjja judionacan utjaraquini. Nefi jakenacan judionacan arunacapasti Israelan chhaktata tamanacapan utjaraquini.

14. Ucatsti nayan Israelan utapanquiri jakenacajjajj quipca orakenacaparu utaparu mayachthapitäpjjani. Arojjajj mayaruraquiw mayachthapitäni. Qhitinacatejj arojjarus, Israelan utapanquir jakenacajjarus nuwasipcanejja, ucanacar uñachayäwa nayan Diosätajjata, Abrahanamp mä amtäwir mantatajjatsa jathapat wiñay amtasiñajjataqui.