1. Tatitojj, nuwasiri tamanacan Tatitupajja, Jerusalenampit Judampitjja, take waquisqui ucamp take chʼamañchqui ucamp apake; cunatejj jacañatac waquisqui uca tʼantʼa apake, take um apakaraqui;

2. Chʼaman jake, nuwasir jake, taripir jake, arjiri, amuyun jake, chuyman jake;

3. Pheska tuncanir sarayiri, yäkcañ jake, amuytʼayir jake, cuns wali sum lekʼsur jake, wali sum parltʼir jake.

4. Ucatsti jupanacarojj jiscʼalalanac churä jupanacar sarayiritaqui. Ñuñusquir wawanacaw jupanacarojj apnakani.

5. Jakenacajj tʼakhesiyatäpjjaniwa. Sapa mayniw yakhan tʼakhesiyatäni; sapa mayniraquiw masipan tʼakhesiyatäni. Jiscʼalalajj janiw chuymanir yäkcaniti. Khoru jakesti janiw asqui jaker yäkcaraquiniti.

6. Cunapachatejj jakejj awquipan utapan jilapar catcanejja, siscaraquinejja: Jumajj isinïtawa. Nanacar sarayapjjeta, aca tʼunjäwejj amparaman jan puriñapataqui;

7. Ucürusti jupajj arsuniwa: Janiw nayajj cʼumaraptayirïcäti, cunalaycutejj janiw utajjan tʼantʼas isis utjquiti. Jan nayar uscustati jaken sarayiripäñajjataqui.

8. Cunalaycutejj Jerusalenajj tucqhatäjjewa. Judasti tincutaraquiwa, jupanacan parlatanacapamp luratanacapampiw Tatitaru saytʼi, jupan khapak nayrapar colerayañataqui.

9. Uyñakapan cunjamätapaw jupanacaru ircati; ucatsti jupanacan juchapajj Sodoman juchapjamätap arsuraqui. Jupanacasti uc imantañataquejj janiw chʼamanïquiti. Ay jupanacan almanacapata! cunalaycutejj jupanac pachpataquiw ñankh utjayasipjje.

10. Asqui jakenacar sapjjam, jupanacamp walic sarascatapa. Jupanacajj quipca luratanacapan achunacap mankʼapjjani.

11. Ay ñankha jakenacata! Jupanacajj tucusipjjaniwa; amparanacapamp luratapajja, jupanacjjaruw cutjjatani!

12. Marcajjar tʼakhesiyirinacajj waynuchunacaquiwa. Warminacaquiw jupanacarojj sarayi. Ay nayan marcajja, jumar irpirinacajj pantjayapjjtamwa, saräw thaquinacam tucqhapjjaraqui.

13. Tatitojj arjjatañataquiw saytʼi; marcar taripañataquiw saytʼaraqui.

14. Uva yapumpi, jan cunaninacat apsupctas ucanacamp jumanacajj quipca utanacaman kʼal mankʼantapjjta; ucat Tatitojj marcapanquir chuymaninacamp sarayirinacampejj chʼajjwar mantani.

15. Cun lurañs munapjjta? Marcajjaruw tʼunjapjjta, jan cunaninacan ajanunacap usuchjapjjta –siw nuwasiri tamanacan Tatitupajja.

16. Tatitojj jucʼamp sascaquiwa: Sionan phuchanacapan jachʼa jachʼa tucur chuymanïtapata, pʼek waytas uñanakasis sarnakapjjatapata, sarnakasas uñtcañ sarnakapjjatapata, pasjascasas cayunacapamp qʼirekeyas sarnakapjjatapata.

17. Tatitojj Sionan phuchanacaparojj kholsut janchiptañataquiw sunakepar jawkʼantani. Ucatsti jupanacan jamasawja janchinacap uñachayaraquini.

18. Ucürunjja, Tatitojj chhulluchhull cʼachachanacapan cʼajquirïtap apakani; ñicʼutapan chʼokasiñapa, phajjsjam morokʼo cʼachachanac apakaraquini.

19. Cuncar warcuntasiñanaca, amparar uchasiñanaca, chalinanaca;

20. Sombreronacapa, chara cʼachachasiñanacapa, pʼeker ñachʼasiñanacapa, kʼapquir cʼachachasiñanacapa, jinchur uchasiñanaca;

21. Anillonacapa, nasar uchasiñ cʼachachasiñanaca,

22. May may suma isinacapa, mantanacapa, phullunacapa, kori phichʼinacapa.

23. Espejonacapa, ñutʼu sawut lienzonacapa, rebozonacapa, willillanacapa. Take ucanac Tatitojj ucürojj apakani.

24. Ucatsti suma kʼapquir lantjja, thujsaniwa; suma wacʼa lantjja, wiqhanokatäñaw utjani; suma chhajjrat ñicʼut lantejj kʼara pʼekew utjani; suma wacʼa lantsti, cotensio wacʼaw utjani; jiwaquïñ lantejj nacsutanacaw utjani.

25. Chachanacamajj espadampiw tincupjjani. Chʼaman jakenacamasti nuwasïwin tincupjjaraquini.

26. Jupan puncunacapajj llaquisipjjaniwa, jaqhusipjjaraquiniwa. Jupasti kʼala chʼusa tucqhatäniwa; lakʼjjan konuraquini.