1. Jichhasti, cunjjat-tejj niy parlapcsma uca asqui laymjjat naya Jacobojj wastat jumanacar parlapjjsma, munat jilanacajja.

2. Cunalaycutejj jicjjatapctan uca arsüwinacajja, jumanacataquejj janchi token arsüwinacawa. Ucalaycu, cunjämatejj nayar uñachayatänjja, walja wawanacasan jan iyawsatap laycuw janchi token tucusipjjani. Ucampis Diosajj waljaniruw qhuyapayasini, wawanacasasti cutsuyatäniwa, cuntejj Cutsuyiripjjat cheka yatiñajj jupanacar churcani uc jicjjatapjjañapataqui.

3. Ucatwa, niy sapcsmas uqhäma, judionac taypir Criston jutañapajj waquisi. (Wasaypʼuw allajjpach qhitajj nayar situ, Cristo sutinïñapjjata). Cawquïr judionacatejj aca orakenquirinacat sipan ñankhäpqui ucanac taypiruw jupajj jutani. Jupanacasti juparojj cruzjjaruw chʼac-catani, cunalaycutejj ucajja, Diosasan amuyuparjam lurasiñapaw waquisi. Janiraquiw cawquïr yakha acapachanquir marcas Diosapar chʼac-catirejj utjquiti.

4. Cunalaycutejja, uca jachʼa muspharcañ luräwinacatejj yakha marcanac taypin luratäspajja, jupanacajj Diosaruw cutiquipstjjapjjaspa, jupan Diosapätap yatjjapjjaraquispa.

5. Ucampis, sallka sacerdot luräwinacapata, ñankha luräwinacapata, Jerusalenanquirinacajj jupatac jan altʼiriw tucuni, jupan chʼac-catatäñapataqui.

6. Uqhämasti, jupanacan ñankha luräwinacap laycuw jupanacjjar tʼunjañanacajj purini, uqhämarac machʼanaca, jachʼa usunaca, wila wartäwinacas puriraquini. Qhitinacatejj jan tucqhatäpcan ucanacajja, take marcanac taypiruw chʼeketatayatäpjjani.

7. Ucampis Tatit Diosajj aqhäm siwa: Nayar iyawsapquitan uca ur purincan ucqha, uqhämarac nayan Cristötajj iyawsapcan ucqhasa, awquinacamamp arusjäwi lurcta uqhämarjamaw janchi token marcanacarojj cutsuyatäpjjani orakjjanquir tuti orakepata.

8. Ucatsti jayapach chʼeketatäwipat tant-thapitäpjjani, lamar kotan utjir islanacata, acapach oraken pusi thiyanacapatpacha. Gentilenacan marcanacapasti, nayataquejj wali jachʼäniwa –siw Diosajja, jupanacar tuti churat orakenacapar apañataqui.

9. Jïsa, gentilenacan pʼekechirinacapajj jupanacataquejj uywir awquinacapäpjjaniwa. Pʼekechirinacan warminacapasti jupanacan uywirinacapäpjjaniwa. Tatitun arsüwinacapajja, gentilenacataquejj wali jachʼawa. Qhitis ucarojja, janiw chekäquit –saspajja?

10. Aca orakejj jumanacan tuti churat orakemäniwa –siw Diosajja. Gentilenacasti aca orakjjar qhuyapayatäpjjaraquiniwa.

11. Aca orakesti gentilenacataquejj antutat sarnakañ orakëniwa. Janiraquiw pʼekechirinacajj gentilenacatac aca orakjjan utjcaraquiniti.

12. Aca orakeruw chʼamañchä, take yakha marcanacat jarcʼakasiñapataqui.

13. Qhititejj Sionaru nuwascan ucajja, tucusiniwa –siw Diosajja.

14. Naya Tatitu, alajjpach pʼekechirejja, jupanacan pʼekechiripäyäwa, qhitinacatejj arunacajjar istʼquitan ucanacataquejj wiñayatac khanäyäwa. Ucatsti qhititejj nayaru saytʼir mä pʼekechiri utjaycan ucajj tucusiniwa.

15. Ucatwa; jamas chʼamac luräwinaca, jak jiwayañanaca, ajjtcañ luräwinac nayan tucqhañajjajj waquisi, jaken wawanacapatac lurctsa uca arsüwinacan janchi token jacquipan phokhasiñapataqui.

16. Uqhämasti, Sionaru nuwasirirojja; judiöpasa, gentilëpasa, mitʼanïpasa, jan mitʼanïpasa, chachäpasa, warmïpasa, take ucanacaw tucusini, cunalaycutejj ucanacaw take oraken kʼañusir warmipajja. Qhitinacatejj jan nayampïquejja, nayaru nuwasiwa –siw Diosasajja.

17. Cunalaycutejja, cuna arsüwinactejj jaken wawanacapatac lurcäyät ucanacjja, janchi token jacquipan uca arsüwinacajj phokhä.

18. Uqhämasti munat jilanacajjay, aqhäm siw Diosasajja: Sarakerinacamarojj gentilenacan amparap tokew tʼakhesiyä. Ucampis gentilenacan chuymap llampʼuptayä, jupanacan jumanacatac awcjamäñapataqui. Uqhämasti, gentilenacajj qhuyapayatäpjjaniwa, Israelan utap taypin jaqhutäpjjaraquini.

19. Ucatwa aca oraker wiñayatac yakhachä juman sarakerinacamataqui. Ucanac taypin jaqhutäpcanis ucanacataquiraqui, aca oraken jupanacan tuti orakepäñapataqui. Ucajja mä ajllit orakewa, take yakha oraket sipana –sasaw Diosajj situ. Ucatwa, take ucan utjir jakenacan nayar yupaychañapajj waquisini –siw Diosajja.

20. Jichhasti munat jilanacajjay, qhuyapayir Diosasan ucanacjjat uqhäm jachʼa yatiñ jiwasanacar churatap laycojja, jupat amtasipjjañäni, juchanacas apanucupjjañäni. Janiw jiwasanacajj jakonucutäctanti, janirac pʼekenacas pʼenkat altʼapcañäniti. Tuti orakesat alis-sutäpjjtanwa, ucampis ucat jucʼamp suma oraker irpatäpjjaractanwa. Tatituw lamar kotarojj jiwasan thaquisar tucuyi, jiwasanacasti mä lamar islancapjjtanwa.

21. Ucampis Diosan arsüwinacapajj lamar islanacanquirinacataquejj jachʼawa. Uqhämasti, islanac satap laycojja, aquïrit sipan yakhanacaw utjpacha. Ucanacjjan jilanacasajj utjasipjjaraqui.

22. Cunalaycutejj mä kawkhat kawkharuw Tatitojj amuyuparjam munañaparjamajj Israelan utapat jakenacarojj irpsu. Jichhasti, qhitinacatejj khakhakatäqui take ucanacat Tatitojj amtasi; ucat jiwasanacatjj amtasiraquistu.

23. Uqhämasti, chuymanacamar cusisiyapjjam. Amtapjjaraquim, jumanacajj quipca amuyumarjam lurañamataquejj janiw jarcʼatäpctati. Jan tucusir jiwañ thaquir sarañ munapjjstajja, ajllisipjjam, jan ucasti, wiñay jacañ thaquir sarañ munapjjstasti, uc ajllisipjjaraquim.

24. Uqhämasti, munat jilanacajjay, sumancthapipjjam, Diosan munañapampi, jan supayan munañapampi, janirac janchin munañapampisa. Amtasipjjam, Diosamp sumancthapisinjja, jupan qhuyapayäwipampiquiw khespiyatäpjjtajja.

25. Uqhämasti, Diosajj jacatatäwin chʼamapamp jumanacar jiwañat jactaypan, uqhämaraqui juchanacan tʼakhesiyäwipar phokhañan chʼamapamp jumanacar wiñayatac jiwañat jactayaracpan, Diosan wiñay khapak marcapar catokatäñamataqui, kollan qhuyapayäwi toke jumanacan jupar yupaychañamataqui. Uqhamäpan.