1. Jichhajja munat jilanacajja, naya Nefejja jumanacaru Diosan arjañ tucuytwa. Mä jucʼa cunanacac kellkerista; ucanacan puriñapan chekpach waquisitapsti yattjja. Jacob jilajjan mä kawkha arunacapaqui kellkaraquiristjja.

2. Ucatwa, cuna arunactejj niy kellkcjjta ucanacaqui kellkañajjajja, jan ucajja mä kawkha arunacjj Criston yatichäwipjjat arsuñajjawa. Ucatwa jumanacaru khanpach arsupjjäma, yatiyäwejjan khanaparjama.

3. Cunalaycutejj chuymajjajj khana cancañat cusisiwa; Dios Tatitusti uqham jaken wawanacap taypina luräwip luri. Jakenacan lajjraparjam jupanacaru parli, jupanacan amuyañapataqui. Ucat Dios Tatitojj amuyupar khana chuyririwa.

4. Ucatwa, qhittejj Tatitojj nayaru uñachayquitusa, qhitiraquitejj oraken juchanacap apakeri Diosan Chitapar bautizcani, uca Diosan arjirjjat arsutajjat amtasiñamjj muniristwa.

5. Ucatwa, Diosan Chitapatejj kollanäsajja take asqui cancañar phokhañataqui umampi bautizascani, kawkha jucʼamps waquisejja jiwasanacan bautizasiñasa; jisa, umampisa bautizasiñasajja, jan kollanätas laycu!

6. Jichhasti, munat jilanacajja, jumanacaru jisctʼapjjerisma cunjamasa Diosan Chitapajj umampi bautizasisa take asqui cancañar phokhejja?

7. Janit jupan kollanätapjj yatipcta? Ucampisa kollanäcchisa, jupajj jaken wawanacaparu uñachayi jupan Awqui nayrakatana janchinsa llampʼuptayasitapjja, camachitanacap phokhas Awquiru jaysatapat juparu ircatatapsa uñachayaraqui.

8. Ucatwa, jupan umamp bautizasitap khepatjja, Kollan Ajayojj urpila quipca jupjjaru sarakanïna.

9. Uqhamaraqui, jupan cunjam lurañ uñachayañapajj jaken wawanacaparu thaquin chekätapjj puncun cʼullcʼütapjj uñachayi, cuna thaquin puncunjamatejj jupanacajj mantañapäquis ucjja.

10. Jupasti jaken wawanacaparu nayar arcapjjeta saraquiwa. Ucatwa, munat jilanacajja, Awquin camachitanacap jan phokhañ munasa Jesusar arcapjjsnati?

11. Awquejj sänjja: Juchanacat cutiquipstapjjam, juchanacat cutiquipstapjjam. Munat Yokajjan sutipjjaru bautizasipjjam.

12. Uqhamaraqui Yokan arupajj nayar puritänjja, sasa: Qhititejj nayan sutejj-jjaru bautizasqui, ucarojj Awquejj Kollan Ajay churani, nayar churquitu uqhama. Ucatwa nayar arcapjjeta. Cunanactejj nay lurir uñjapquistajja, ucanacjj lurapjjam.

13. Ucatwa munat jilanacajja, nayajj yattwa, jumanacatejj take chuymampi Yokar arcapjjätajja, Diosan nayrakatapan ñank jan lurasa, jan sallkjasa, take chuymampi munasa, juchanacamat cutiquipstasa, bautizasisa Criston sutip jumanacjjaru catjjaruñ munatamjjat Awquiru ircatasa, jisa, Khespiyirimaru Tatitumarojj umaru arcasa jupan aruparjama, ucatwa jumanacajj Kollan Ajay catokapjjäta. Jisa, ucat ninampi Kollan Ajayump bautizañajj purini, ucat jumanacajj alajjpach qhitanacan lajjrapat arsuñatac chʼamanïpjjäta, Israelan Kollanaparu jachʼaru aptäwinac artʼañatac chʼamanïpjjäta.

14. Ucampis munat jilanacajja, Yokan arupajj nayar puritu aqham sasa: Juchanacamat cutiquipstañam khepatjja, nayan camachitanacajjar phokhañ munatamjjat uman bautizasisa Awquir ircatañamjja ninampi Kollan Ajayumpi bautizäwi catokañam khepatjja, jisa, machaka lajjrat arsuñatac chʼamanïñam khepatjja, jisa, alajjpach qhitanacan lajjrapat parlañatac chʼamanïñam khepatjja, jumanacajj janitejj nayar jucʼamp catokapquitätajja, ucat jumanacatac jucʼamp sumäsapänwa nayar jan uñtʼañanacamajja.

15. Awquin arupjj aqham sisquir istʼaracta: Munatajjan arunacapajj chekawa, chekaparaquiwa. Qhititejj tucusïwcamajj thurtʼasquejja ucajj khespiyatäniwa.

16. Jichhasti munat jilanacajja, uca laycojja nayajj yattwa, janitejj mä jakejj jaquiri Diosan Yokapan luräwiparjam arcasa tucusïwcam thurtʼascanejja, janiw jupajj khespiyatäcaspati.

17. Ucat ac amtasipjjam: Nayajj Tatitu Cutsuyirimaru cunanac lurir uñjta. Uca cunanac lurañapjjat yatiyapjjaracsma. Ucat uca cunanac lurapjjaraquim jumanacajja. Ucanacajj nayaru uñachayatänwa jumanacan yatiñamataqui cawquïri puncut-tejj jumanacajj mantañamäqui ucjja. Uca puncusti juchanacat cutiquipstañawa, uman bautizasiñawa. Ucat ninampita Kollan Ajayumpita juchanacamajj pampachatäpjjani.

18. Ucat uca wiñay jacañaru irpiri cheka cʼullcʼu thaquincapjjätawa. Jisa, puncut mantapjjtawa; Awquin Yokan camachitanacaparjam lurapjjtawa; Awquimpit Yokampit ircatiri Kollan Ajay catokapjjaractawa. Ucjjatsti jupajj aqham arsüna: Jumanacatejj thaquinjam mantanipjjätajja, catokapjjätaw sasina. Ucatsti Kollan Ajay catokapct uqhajja, arsüwipajj phokhasi.

19. Jichhasti, munat jilanacajja, jumanacaru jisctʼapjjerisma, uca cheka cʼullcʼu thaquir mantañam khepatjja, take cunas niy luratäjjeti? Nayajj jumanacaru janiwa sapjjsmawa, cunalaycutejja Criston arup laycu jumanacajj jan pächasis jupar iyawsañam laycuquiwa aqhacam jutapjjta, qhititejj khespiyañatac chʼamanïqui jupan asquïtanacapjjaru kʼal kemtʼasisa.

20. Ucatwa, Cristoru jan pächasisa nayrakataru sarasipcaquiñamawa, phokhatpach cʼajquiri suyañanïsa, Diosaru take jakenacar munasiñanïsa. Ucatwa, jumanacatejj Criston arupat chʼamañchasisa nayrakataru sarasipcaquïtajja, tucusïwcam thurtʼasipcaraquïtajja, aqham siw Awquejja: Jumanacajj wiñay jacaña catokapjjätawa.

21. Jichhasti, amuyapjjam munat jilanacajja, ucajj thaquiwa. Janiw alajj pachat aynachanjja yakha thaquisa sutisa utjquiti, jakenacan Diosan khapak marcapanjj khespiyasipjjañapataqui. Jichhasti, amuyapjjam, ucajj Criston yatichäwipajja. Awquimpina Yokampina Kollan Ajayumpina mä sapa cheka yatichäwiparaquiwa. Ucasti mä sapa jan tucusiri Diosawa. Uqhamäpan.