1. Jichhajja cuna arjäwinacjjat awquejjajj arscänjja, cunanacatejj Egiptor apata Josejjat yatiycänjja ucanacjjat naya Nefejj arsü.

2. Cunalaycutejj take jupan jathapjjat jupaw chekpach Diosan arjäna. Cawquïri arjäwinac kellkcänjja uca arjäwinacatsipan jucʼampi jila yatiyäwinacajj jucʼaquipuniwa. Jupasti nanacjjat yatiyäna, uqhamaraqui nanacan jutiri mitanacajj-jjata. Ucanacasti tʼalpha kʼellu alquimia lekʼetanacaru kellkatawa.

3. Ucatwa awquejjan Josean jutiri cunanacjjat yatiyäwinacapat arsuñ tucuyatap khepatsti, Lamanan wawanacaparu jawsäna, yokanacaparu phuchanacaparusa. Jupanacaru saraquïna: Taynajjan yokanacapäpcta phuchanacapäpcta, juma yokanacajja phuchanacajja, arunacajjar istʼañam muniristjja.

4. Cunalaycutejj Dios Tatitojj siwa: Jumanacan camachitanacajj phokhapjjañamarjamaw aca orakena jachʼaptapjjäta. Uqhamaraqui camachitanacajj jan phokhapjjañamarjama nayan nayrakatajjata jarcʼakatäpjjätawa.

5. Ucampis yokanacajja phuchanacajja, janiw amay imäwiru sarakquiristti jan jumanacaru qhuyapayäma, cunalaycutejj yattwa, jumanacatejj sarnakañamäquisa uqham uywatäpjjätajja janiw ucat saranucupcätati.

6. Ucatwa, jumanacatejj ñankhachatäpjjstajja, nayajj qhuyapayäwejj jumanacjjaru jaytapjjsma, ñankhachäwina jumanacan pʼekemjjat apakatäñapataqui, awquiman taycamana pʼekenacapjjaru puriñapataqui.

7. Ucatwa, nayan qhuyapayäwejj laycu Dios Tatitojj janiw jumanacan tʼunjatäñam jaytcaniti. Ucatwa jupaw jumanacaru jathanacamaru wiñayataqui qhuyapayätam.

8. Ucat awquejjan Lamanan yokanacaparu phuchanacaparu parlañ tucuyatap khepatsti, Lemuelan yokanacap phuchanacapa jupan ucaru jawsayaraquïna.

9. Jupanacaru arsuraquïna sasina: Payïri yokajjan yokanacapäpcta phuchanacapäpcta, juma yokanacajja phuchanacajja, cuna bendicïwjj Lamanan yokanacapampiru phuchanacapampir jaytcta uca quipca qhuyapayäwjj jumanacjjaru jaytapjjsma. Ucat janiw kʼal tʼunjatäpcätati, antisas khep khepürunacanjja jathamajj qhuyapayatäniwa.

10. Cunapachatejj awquejjajj jupanacaru parlañ tucuycän ucapachajja jupaw Ismaelan yokanacaparu arsüna, jisa, take Ismaelan utaparu.

11. Jupanacaru arsuñ tucuyatap khepatsti Samaru parlänwa aqham sasina: Qhuyapayatätaw jumajja uqhamaraqui jathamajja, cunalaycutejj Nefi jilamjamaw orakjj tutjam catokätawa. Jathamasti jupan jathapampi jaqhutäniwa; jumasti jilamaru uñtatäyatawa. Jathamasti jathaparu uñtataraquïni. Take urunacaman qhuyapayataraquïtawa.

12. Ucatwa Lehi awquejjan chuymapan amuyunacaparjam Tatitun jupanquiri Ajayuparjam take utaparu arsutap khepatjja, jupajj awquirquipstjjänwa. Ucatsti jupajj jiwjjänwa, imantatäjjaraquïnwa.

13. Ucatsti jupan jiwatap mä jucʼa urunac khepatsti, Lamanamp Lemuelampi Ismaelan yokanacapampejj nayampi kʼapisipjjänwa, Tatitun eojjäwinacap laycu.

14. Cunalaycutejj jupan aruparjam jupanacaru arsuñajj naya Nefiru wactʼitu. Cunalaycutejj nayajj walja cunanaca niy jupanacaru arsjjäyätjja, uqhamaraqui janir jiwcasinjja awquejjajj jupanacaru parlaraquïna. Ucanacat waljajj yakha tʼalpha lekʼetanacjjaru kellkatawa, cunalaycutejj yakha tʼalpha lekʼetanacajjarojja sarnakäwinacata jucʼamp kellkatawa.

15. Aquïrinacjjarusti chuymajjan cunanacapa kellktwa, uqhamaraqui tʼalpha kʼellu alquimia lekʼetanacjjaru kellkantat kellkatanacatjj walj kellkakaractwa, cunalaycutejja kellkatanacat cusista, chuymajjasti ucanacjjat wal lupʼi, ucanac kellkaraqui wawanacajjan yatekañapataqui sum catokañapataquiraqui.

16. Jisa, Tatitun cunanacapanjj cusista; cunanactejj uñjcäyäts istʼcäyäta ucanacjjat chuymajjajj wal lupʼiscaquiwa.

17. Ucampis Tatitojj sinti sumäsajja jachʼa muspharcañ luräwinacapjj nayar uñachaycchitänsa, chuymajjajj arsu: Ay, cunja jan wali jakëts nayajja! Jisa janchejjata chuymajjajj llaquisi; ñankha luräwinacajjata wal llaquisiraqui.

18. Sinti jasac nayjjaru jutqui uca yantʼäwinacata juchanacata nayajj kʼala muytataraquïtwa.

19. Cunapacharaquitejj cusisiñ munctjja ucapachajj chuymajjajj aykowa juchanacajj laycu. Ucampis qhitirutejj iyawsctjja ucjj nayajj uñtʼta.

20. Diosajjajj kemirejjawa. Wasaran tʼakhesïwinacajj taypina nayaru irpitu. Jachʼa pʼiya umanacjjana jupajj nayaru imitu.

21. Munasiñapjj nayan phoktʼayi, janchejjan naqhatäñapcama.

22. Timanacajjaru pejjtuntiwa, nay nayrakatan qhathatiñapcama.

23. Urunacanjj artʼäwejj istʼitu; arumanacansti yatiñjj uñjäwinacan churitu.

24. Urunacanjja take chʼamajjampi juparu mayisinjja jan ajjsarañ chuymaniru tucta. Jisa, arojj alayaru apayta, alajjpach qhitanacasti sarakanisa nayaru yanapir tumpapjjetu.

25. Ajayupan chhekhanacapjjaru janchejjajj sinti jachʼa kollunacjjaru apsutänwa. Nayranacajjasti jachʼa cunanacjja uñjaraquïnwa, jisa, mä jaketaqui sinti jachʼa cunanacjja. Uca laycu camachit catokäyätjja jan ucanacjj kellkañajjataqui.

26. Ucatjja, nayatejj uqham jachʼa cunanacjj uñjtjja, Tatitutejj jaken wawanacaparu walpin qhuyapayas jupanacaru sarakanisina, jupanacaru walja qhuyapayäwimpi tumpejja, cunats chuymajjajj jachi? Cunats llaquisiñ kherwana kheptʼejja? Cunats janchejjajj cʼachhat cʼachhat inachʼusar tucojja, chʼamajjas chhaktejja, llaquisïwinacajj laycu?

27. Cunats janchejj laycu juchanac lurtjja? Jisa, cunats yantʼäwinacaru jaystjja, ñankhäqui ucan mayaujanïñapataqui nayan chuymajjana, sumancatajjaru tʼunjañataqui, nayaru llaquiyañataqui? Cunats timajjat colerastjja?

28. Pʼarjjtam nayan chuymajja! Jan jucʼampi juchanacan chʼam thayjtayasimti. Cusisim nayan chuymajja, jan mayaujs churamti timajjataqui.

29. Timanacajjat wasitatampi jan colerasimti. Llaquinacajjata jan chʼamajjaru chhaktayamti.

30. Cusisim nayan chuymajja, Tatituru artʼam, aqham sasa: Tatay, jumaruw wiñayataquejja yupaychäma, jisa, chuymajjajj jumana cusisini, nayan Diosajja, khespiyatäwejjan karkapa.

31. Tatay, nayaru cutsuyitätati? Timanacajjan amparanacapata antutayitätati? Juchan uñstatpat nayaru qhathatiyitätati?

32. Mankhapachan puncunacapajj nayaru jistʼcatatäpan, chuymajjan pʼaquitätaps ajayojjan altʼataps laycu. Tatay, asqui cancañaman puncanacapjja janic nayaru jistʼcatitasmati, nayan aynacha kherwana thaquinjam sarnakañajjataqui, pampa thaquinjam nayan chekac sarañajjataqui!

33. Tatay, asqui cñancaña isimampi nayaru llawthapiquitasma! Tatay, timanacajjata jaltañajjataqui mä thac lurarapiquitasma! Thaquejjaru nayrakatajjan chekaptayaquisma! Janic lanktañ kal thaquejjar uchasmati, antisas thaquejjar nayrakatajjan kʼomachaquisma, jan thaquejjan jarcʼañanac uchasa, antisas timajjan thaquiparu uchasa!

34. Tatay, jumaru iyawsma, wiñayataqui jumar iyawsaraquïma. Janiw janchin amparaparu iyawscäti cuñnalaycutejj yattwa, janchin amparapar iyawsirejj ñankhachatawa. Jisa, ñankhachatawa qhititejj jakeru iyawsqui, jan ucajja, quipca amparapjam janchi uchasqui.

35. Jisa, nayajj yattwa, Diosajj mayisiriruw jilarquir churani. Jisa, nayatejj jan inamay mayiscäjja, Diosajjaw churitani. Ucatwa, jumaru arojj artʼäma, jisa, jumaru artʼäma, nayan Diosajja, asquïtajjan karkapa. Jisa, nayan arojjajj wiñayataquiw jumaru maqhatanïtam, nayan karkajja nayan wiñay Diosajja. Uqhamäpan.