1. Ay ñankha leyinac uñstayirinacata! Jupanacan churatäqui uca ñankhanac kellkapcarac ucanacata.

2. Asqui taripäw jan utjirininacat apakañataqui, marcajjanquir jan cunaninacat cunatejj jupanacar wactʼqui uc apakañataqui, ijma warminacar catuntañataqui, wajchanacar lunthatañataquiraqui!

3. Camächapjjätas sartʼapcätam uca urunjja? Cuns lurapjjät jayat purincan uca chʼus tucuyañ urunjja? Qhitin ucs jaltapjjäta yanap catokañataquejja? Cawqharus khapak cancañamjj jaytapjjäta?

4. Jan nayampejja, jupanacajj catuntat jakenacamp chicaw quilltʼasipjjani, jiwayatanac taypin liwisipjjaraquini. Uqhämäquipansa, colerasiñapajj janiw apaktquiti, antisas amparapajj jichhacamaw lokatatatäscaqui.

5. Asiria, jumajj colerasiñajjan lawapätawa, amparamanquir thujrusti, nayan jan uñjañ munirijjawa.

6. Mä chʼojjña chuyman marca contraw qhitä. Coler apaktayasiñ marcajjaruw achicä, take apakat yänac apasjjañapataqui, catuntat jakenacar apakañapataqui, jupanacjjarusti thaquinacan ñekʼepäcaspajj uqhäm tacjjatañapataqui.

7. Janis uqhäm lurañapäc-chi, janirac chuymapans uqhäms lupʼc-chisa. Antisas chuymapanjj walja orakenac tʼunjaña, tucqhañac muni.

8. Jupajj siwa: Janit takpach irpirijjajj pʼekechirinacäpqui?

9. Calnojj janit Carquemisjamäqui? Janit Hamatajj Arpadjamäqui? Samariasti janit Damascjamäqui?

10. Cunjämatejj amparajjajj idolonacan marcanacap ut-tʼaycänjja, cawquïr jaken lekʼsut idolonacatejj Jerusalenampin Samariampin lekʼsut idolonacat sipan jucʼamp qhustʼatäqui.

11. Cunjämatejj nayajj Samariampir idolonacapampir lurcäyät uqhämjja, janit Jerusalenampir idolonacapampirojj lurcaraquëjja?

12. Uqhämasti, Tatitun take luräwip Sion kolljjampin Jerusalenampin tucuycan ucqhajja, nayajj Asirion pʼekechiripan jachʼa tucut chuymapan achuparuw jachʼa jachʼa uynakapar mutuyä.

13. Cunalaycutejj jupajj siwa: Amparajjan chʼamapampi nayan chʼiqhi amuyujjampiw ucanac lurta, nayan suma amuyasirïtajj laycu; jakenacan korpanacap apakta, jachʼa alan yänacap lunthat-ta, kamasan jakjamaw ucan utjasirinacarojj altʼayta.

14. Mä tapanc-caspas uqhäm amparajjajj jakenacan jachʼa alan yänacapjj jicjjati, cunjämatejj mä jakejj apanucut cʼawnanac apthapisejja, uqhäm take oraket apthapta. Janiw qhiti chhek jawkʼtiris utjquiti, jan ucajja, lac jistʼaririsa, chhiwekerisa.

15. Hachajj jachʼat arsuniti, qhititejj ucamp phatʼqui uca contrajja? Serruchojj jachʼarut tucuni, qhititejj ucamp qhuchqui uca contrajja? Camisatejj lawajj aytirip contrajj saytʼcaspajj uqhäma, jan ucajja, camisatejj thujrojj lawäcasinac jachʼaptcasp uqhäma?

16. Uqhämasti, Tatitojj, nuwasiri tamanacan Tatitupajja, chʼaman jakenacap taypiruw tʼuqha cancañ qhitanini. Jupan khapak cancañapanjja, mä nin naktayani, nina lawräcaspas uqhäma.

17. Israelan khanapajj mä ninjamäniwa, jupan Kollanapasti nina lawrjamaraquïniwa; mä urunac añawayanacapamp chʼaphinacapampjj nakhantani, mankʼantaraquini.

18. Ucatsti, chʼumipan khapak cancañaparu, purum yapuparuw kʼal nakhantani ajayupsa janchipsa. Ucatsti wiphal ayirejj chʼam thayjtayascaspas uqhamäniwa.

19. Chʼumipan jiltʼir kokanacajj jucʼaquïniwa, mä jiscʼalalans jaqhuñjam jucʼaquëjjaniwa.

20. Ucürunsti Israelat jiltʼirinacampi, jaltapqui uca Jacobon utapanquirinacampejja, jupanacar jawkʼcän ucarojj janiw mayamps kemisipcaniti; antisas Israelan Kollanap Tatituruw chekpachapun kemisipjjani.

21. Jiltʼirinacajj cut-tanipjjaniwa. Jïsa, Jacobon jiltʼirinacapajj chʼaman Diosaruw cut-tapjjani.

22. Israel jakenacamajj lamaran chʼallanacapjamäc-chisa, jupanacat jiltʼirinacaw cut-tanipjjani. Arsut tucusïwisti asqui cancañaruw jilarani.

23. Cunalaycutejj nuwasiri tamanacan Tatitupaw uc-chʼpach orakjjar amtatäc uca mä tucusïw ut-tʼayani.

24. Ucat aqhäm siw nuwasiri tamanacan Dios Tatitupajja: Sionan utjir jakenacajja, Asirianquirinacarojj jan ajjsarapjjamti. Egiptor uñtatas lawamp jawkʼätamjja, juma contras lawap aytcani.

25. Cunalaycutejj acat mä jucʼa pacharuw colerasiñajjajj phokhasini. Jupanacar tucqhañ colerasiñajjas phokhasiraquini.

26. Horeb karkana Madianar jiwarayäwjamaw Nuwasiri tamanacan Tatitupajj jupatac mä jawkʼañ aytani; cunjämatejj lawapajj lamarjjancänjja, uqhäm jupajj aptani, cunjämtejj Egiptojj aptcän uqhäma.

27. Ucatsti ucürunjja, jupan kʼepipajj callachimat apakatäniwa; yucupasti cuncamat apakataraquïniwa; aceitemp jawtʼäw laycuw jucojj tʼunjatäni.

28. Ayataruw puri, Migron chekaw saraquipi; Micmasaruw carronacap jayti.

29. Llajjma umanac chekaw maqhatapjje; Geban chekan korpachasipjje. Ramäjj ajjsariwa; Saulan Gabanapasti jaltiwa.

30. Galliman phuchapa, jachʼat artʼam! Laiscam artʼasajj istʼasiyam. Ay wajcha Anatota!

31. Madmenajj atipjatawa. Gebiman utjirinacasti jaltañataquiw mayachthapisjjapjje.

32. Ucürunjj Noban kheparascaquini. Amparapjj Sionan phuchapan kollup contraw aytani, Jerusalenan kollup contraraqui.

33. Jichhasti, Tatitojja, nuwasiri tamanacan Dios Tatitupajja ajjsarcañjamaw laymir khakhakani. Jachʼa tansanacajj qhuchhokatäniwa. Aytatäñ munir chuymaninacajj altʼayatäniwa.

34. Acerompiw jupajj qʼiqʼi chʼuminac yawini. Libanosti mä chʼaman jaken amparapampiw tincuni.