1. Jichhasti munat jilanacajja, thaqui mantasinjja cunanactejj lurañamäqui ucanacjjata jumanacajj chuymanacamana lupʼipjjpachätawa. Ucampis cunats ucanacjjat chuymanacamana lupʼipjjta?

2. Janit amtapcta? Nayajj jumanacaru acjj sapjjäyäsma: Kollan Ajay catokañam khepatjja alajjpach qhitanacan lajjrapat parlapjjasmawa sasa. Ucatjja, cunjamats alajjpach qhitanacan lajjrapat parlapjjasma jan Kollan Ajay catokasinjja?

3. Alajjpach qhitanacajj Kollan Ajayun chʼamapampi parlapjje. Ucatwa Criston arunacapjj arsupjje. Criston arunacapajj yatiyapjjätamwa take cunanactejj lurañamäqui acunacjjata. Ucatwa, nayajj jumanacaru sapjjäyäsma: Criston arunacapampi chʼamañchasipjjam.

4. Ucatjja, nayan jumanacar aca arunacjj arsutajj khepatjja, janitejj jumanacajj ucanacjjat amuyapcätajja, ucajj jumanacan jan jisctʼañam jan puncu lekʼetams laycüniwa. Ucatwa jumanacajj janiw khanarojj irpatäpcätati, antisas chʼamacanacan tucusipjjañamawa.

5. Ucat wastat jumanacar sapjjsmajja, jumanacatejj thaquir mantapjjätajja, Kollan Ajay catokapjjätajja, ucajj uñachayapjjätamwa take cunanactejj lurapjjañamäqui ucanacjja.

6. Jisa, acajja Criston yatichäwipawa. Janiraquiw jucʼampi yatichäwipajj churatäcaniti, janir jupajj jumanacaru janchina uñstayascani ucapachcamajja. Jupasti jumanacaru janchin uñstayascani ucapachajja, cunanactejj jumanacaru sapcätamjja uca cunanac lurasa jaysapjjäta.

7. Jichhasti naya Nefejja janiw jucʼampi sisquiristi. Ajayojj arsuñajj tucuyi. Nayasti llaquisiñataqui jaytatätwa, jaken jan iyawsañapata, ñankhätapata, jan yatiñapata, jan altʼat pʼekenïtapatjja. Cunalaycutejja, yatiñajj jupanacarojj khanpach churatäc-chisa, jisa, jucʼampi khana arurjam ucajj churatäc-chisa, jupanacajj janiw yatiñ thakapquiti, janiraquiw jachʼa yatiñ amuyapcaraquiti.

8. Jichhasti munat jilanacajja, ucjjat jichhacam chuymanacaman lupʼitanacamata amuytwa nayajja. Ucjjat arsuñajjan waquisitapajj nayaru llaquiyaraquitu. Jakenacaru Diosat mayaisiñ yatichqui uca Ajayuru jumanacatejj yäkapjjasmajja, jumanacajj yatipjjapunisma mayisiñan jumanacataqui waquisitapjjatjja. Ñankha ajayojj janiw jakeru nayisiñjja yatichquiti, antisasa jupan Diosat mayisiñapan jan waquisitapjja yatichi.

9. Ucampis nayajj jumanacaru sapjjsma, sapa cuti jumanacajj Diosat mayisipjjañama, jan chʼam thayjtayasisa. Janiw cuns Tatitutac lurañamäquiti janitejj nayrakat Criston sutipjjaru Awquit mayiscätajja, luräwimar jumanacatac jupan kollanaptayañapataqui, luräwiman jumanacatac asquïñapataqui.