1. Jichhasti munat jilanacajjay, jumanacaruw parlañ munapjjsma, cunalaycutejj naya Nefejja, janiw amuyapjjañam muncti, gentilenacat sipan jucʼamp asquïpjjatama. Jumanacajj janitejj Diosan camächitanacap phokhapcätajja, take jumanacajj uqhämaw tucusipjjaraquïta. Uqhämaraqui, uca parlat arunacäpan gentilenacan kʼala tucqhatäñap janiw amuyapjjañamäquiti.

2. Cunalaycutejj nayajj jumanacaruw sapjjsma: Tatitojj janiw qhitimpis arusjäwir mantquiti, jan ucasti, Israelan Kollanapäqui uca Yokapar juchat cutiquipstas iyawsirinacampiquiw arusjäwirojj manti. Ucat take gentilenacatejj juchat cutiquipstapqui ucanacaw Tatitun arusjäw jakenacapäpjje, cawquïr judionacatejj juchat jan cutiquipstapcan ucanacajja, jakonucutäpjjaniwa.

3. Jichhasti, judionacjjampit gentilenacjjampit jucʼamp yatiyañ munapjjerisma. Cuna kellkatjjat-tejj niy parlctsa uca kellkatan mistutap khepata, gentilenacatac kellkakatap khepata, ucatsti wastat Tatitutac lluchʼintatätap khepatsti, uca kellkat arunacar iyawsirinacajj waljanïpjjaniwa. Jupanacasti ucanacjj sarakerinacasat jiltʼirinacaruw apapjjani.

4. Ucapachajj sarakerinacasat jiltʼirinacajj jiwasjjat yatjjapjjani, cunjäms Jerusalenat mistunipctan ucjjata, cunjämtejj jupanacajj judionacat sarakapqui ucanacjjataraqui.

5. Jesucriston yatichäwinacapajj jupanac taypin khanañchatäniwa. Ucat awquinacapan yatitäcän ucanacajj cutjtayatäni, uqhämaraqui awquinacapajj yatcän uca Jesucristot yatiñajj wasitat cut-tayatäni.

6. Ucat jupanacajj wal cusisipjjani, cunalaycutejj Diosan amparapat jupanacatac qhuyapayäwïtap yatjjapjjani. Chʼamac qʼilinacajj nayranacapat willirtani. Janïr walja mitanac sarakquipan jupanacajj mä jankʼo suma jakenacar tucupjjani, cusiscayar tucupjjaraquini.

7. Ucatsti chʼeketatat judionacajj Cristor iyawsañ kalltapjjani. Orakjjan jupanacajj mayachthapiñ kalltapjjaraquini. Jupanacat take qhitinacatejj Cristor iyawsapcan ucanacajja, suma munat jakenacaruw tucupjjani.

8. Ucatsti take orakenacana, familianacana, lajjranacana, marcanac taypin Dios Tatitojj luräwip lurañ kalltani, jakenacapar cut-tayañataqui, acapach orakjjana.

9. Asqui cancañampiw Dios Tatitojj jan utjirininacarojj taripani; acapach orakenquir llampʼu chuymaninacataquisti, chekapar uñjasaw saytʼani. Lacapan lawapampiw oraker jawkʼantani; laca ispillupan samakeñapampiw ñankha jakenacar jiwarayani.

10. Dios Tatitojj jakenac taypin jachʼa tʼakjjtañ utjayañap urojj mäquiw jacʼachasisinqui. Ñankha jakenacarojj tucqhaniwa; ucampis jupan jakenacaparojj qhuyapayasiniwa. Jïsa, ñankha jakenacar ninamp tucqhañap waquiscan ucqhasa.

11. Cinturapan wacʼapajj asqui cancañäniwa. Chekapäñasti jiqhanipan wacʼaparaquïniwa.

12. Ucapachaw lobojj ovej kallump utjani. Tigresti chiwu kallumpi, vaca kallumpi, ancut leonampi, chʼaman vacamp chicaw iquini. Mä jiscʼalalaw ucanacarojj awatini.

13. Vacamp osompejj chicaw mankʼapjjani; kallunacapasti chicaw iquipjjani; leonasti torjam khachʼu mankʼani.

14. Ñuñur wawasti aspidan putupjjan anatani. Jan ñuñur wawasti basiliscon putupjjaruw amparamp llamqhani.

15. Take kollan kollujjan jupanacajj janiw usuchjapcaniti, jiwayapcanisa, cunalaycutejj orakejj Tatitun yatiñapan phokhantatäniwa, cunjämatejj umanacajj lamaran phokhatäpqui uqhäma.

16. Ucalaycu, take orakenacan cunanacapaw yatiyatäni. Jïsa, take cunanacaw jaken wawanacapar yatiyatäni.

17. Janiw cuna jamasat luratas janejj khanstayatäcaniti. Janiw cuna chʼamacan luratanacas jan khanarojj uñstayatäcaniti. Take cunatejj orakjjan lluchʼintatäqui takpach ucanacajj jararatäniwa.

18. Ucatwa, take cunanacatejj jaken wawanacapar yatiyatäqui ucanacajj ucürun yatiyatäni. Walja pachataquiw Satanasajj jaken wawanacapan chuymanacapjjarojj jan chʼamanïcaniti. Jichhasti, munat jilanacajjay, arsüwinacajj tucuyjjañajjawa.