Nefin Payïri Kellkatapa

1. Ucatsti naya Nefin jilanacajjar yatichañ tucuyatajj khepatjja, Lehi awquejjajj walja cunanacjj jupanacaru yaticharaquïna, Tatitun jupanacataqui sinti jachʼa cunanac luratapjjata, jupanacar Jerusalen oraket irpasa.

2. Jupanacan umanacjjan cutcatañanacapjjata, jupanacan jachʼa kota lamaran jan mankʼantatäñapataqui Diosan jupanacar jan jiwayas qhuyapayäwinacapjjatsa jupajj jupanacar parläna.

3. Jupanacajj catokapcänjja uca arsut orakjjata, Jerusalenat jaltañajjataqui Tatitun nanacaru yatiyas sinti qhuyapayatapjjats jupanacar parlaraquïna.

4. Cunalaycutejj jupaw säna: Mä uñjäw uñjtwa. ucat Jerusalenan tʼunjatätapjjat yattwa. Jiwasanacatejj Jerusalenan kheptʼapjjasänjja, jiwapjjaraquisänwa.

5. Jupajj saraquïna: Ucampisa, llaquinacajj jiwasanacan utjcchïnsa, jiwasanacajj mä arsut orakjj catokapjjtanjja; uca orakesti take yakha orakenacatsipan qhustʼatawa. Dios Tatitusti nayampi amtäw luraraquïna aca oraken jathajjataqui mä tuti orakëñapataqui. Tatitojj amtäwir mantasajja aca orak nayaru wawanacajjaru siñayatac churapjjestu, uqhamaraqui qhitinacatejj yakha orakenacat Tatitun amparapan acsar irpsutäpquejja uca jakenacarurac churaraquiwa.

6. Ucatwa, nayan utjquejja uca Ajayun khanañchäwiparjamawa, naya Lehejja acjj yatiyta: Jan Tatitun amparapan irpanitäsina, janiw qhitis aca oraker jutcaniti.

7. Ucatwa qhitirutejj jupajj irpancanejja ucanacataqui aca orakejj yakhachatawa. Jupajj churqui uca camachitanacaparjam jupanacatejj juparu lokapcanejja, aca orakejj antutatäwi orakëniwa jupanacataqui. Ucatwa janiw cunapachas catuntäwiru puriyatäpcaniti, jan ucajja, ñankha luräwinac laycuquiw ucaru puriyatäpjjani; cunalaycutejj ñankha luräwinacatejj sint utjcanejja, orakejj jupanacatac ñankhachatäniwa. Ucampis asqui jakenacataqui wiñayatac yakhachatäniwa.

8. Ucampis, aca oraken utjatapjjata yakha marcanacan janira yatiñapajja suma amuyañawa, cunalaycutejj walja marcanacajj aca orakjjar jutapjjaspawa, tuti churäwitaqui mayaujan jan utjañapcama.

9. Ucatwa naya Lehejja mä arsüwi catokta aqham siri: Dios Tatitojj Jerusalen oraket irpscani ucanacan jupan camachitanacap phokhañanacaparjamawa jupanacajj jachʼaptapjjani aca orakjjana, take yakha marcanacatjj jithektatäpjjaraquini, jupanacan quipcanacataqui aca orakenïñapataqui. Jupanacatejj jupan camachitanacap imapjjanejja aca orakjjan jachʼaptatäpjjaraquini, janiraquiw qhitisa utjcaniti jupanacar turiyiri, tuti orakepjj jupanacat apakeri. Jupanacasti sumanacasaw wiñayatac aqhan utjapjjaraquini.

10. Ucampis cunürutejj jupanacajj jan iyawsas tʼuqhartapcani, uca sinti jachʼa qhuyapayäwinacjj Tatitun amparapat catokasinjja, acapach orakjj take jakenacjj luräwjjat yatisinjja, orake luräwitpacha Tatitun wali jachʼa muspharcañ luräwinacapjj uñtʼasinaracjja, take cunanacjja iyawsañamp lurañapatac chʼam catokasinjja, kalltäwitpach take camachitanac catokasinjja, jupan jan wati sumätap laycu aca qhustʼata arsuta orakeru irpatäsinjja – jisa, nayaw sapjjsma, cunüruntejj jupanacajj Israelan Kollanaparu, cheka Mesiasaru, jupanacan Cutsuyiriparu Diosaparu ajjalnucupcani uqhajja, ucürutejj purcanejj uqhajja, Asquïquis Ucan taripäwinacapajj jupanacjjaruw purini.

11. Jisa, jupaw yakha marcanacjj jupanacan ucar irpanini, ucanacar ch,amjj churaraquini. Jupajj jupanacan utjiri orakenacapjj jupanacat apakani, jupanacaru chʼeketatatäyani, jawkʼatäyaraquini.

12. Jisa, mitanac mitanac sarakapcani uqhajja wil wartäwinacajja jachʼa tumpäwinacajj jupanac taypin utjaniwa. Ucatwa, yokanacajja, amtasiñamjj muniristjja, jisa, arunacajjaru yäkañamjj muntjja.

13. Jumanacajj pʼarjjtapjjaquisma, jiwatjam iquit pʼarjjtapjjaquismasa, jisa, mankhapachan iquipatsa. Uca ajjsarcañ cadenanacsti, cunanacampitejj ñachʼantatäpcta ucanacjj apsus thalarasipjjaquisma; uca cadenanacasti jaken wawanacaparu ñachʼantejja jupanacaru catuntata irpantañataqui jan tucusiri llaquisiña jaqhusiña pʼiyaru.

14. Pʼarjjtapjjam! Lakʼat sartapjjam, qhathatquiri awquiman arunacapjj istʼapjjam, qhitin janchiptejj niy imantapcäta chʼuju chʼuchʼu amay imäwiru, cawqhat-tejj janiw qhiti sariris cut-tancaspati. Cawqharutejj take orakenquirinacajj sarapqui uqharojja mä jucʼa ururojja nayajj saräwa.

15. Ucampis Tatitojj ajayojjar mankhapachat cutsuyiwa. Nayasti khapak cancañap uñjtwa. Nayasti munañapan amparanacapana wiñayatac khomthapitaraquïtwa.

16. Tatitun leyinacapjj camachinacapjj imapjjañamjj munt nayajja. Jisa, kalltäwitjja ucajj chuymajjan llaquisiñapawa.

17. Walja cuti chuymajjajj ancha llaquisiñjj kʼepi, cunalaycutejj ajjsarta, jumanacan chʼollkhe chuymanïta laycu Diosajj phokha colerasiñapampi inas jumanacjjar jutapjjchiristam jumanacan phatʼsutäñamataqui, wiñay tucjatäñamataqui.

18. Jan ucajja, inas mä ñankhachäwejj jumanacjjaru purapjjchiristam walja mitanacan sarakatapcama; ucat inas jumanacjjaru espadampi machʼampejja tumpapjjchiristam, inas jumanacajj uñisitäpjjchïta, supayan catuntañaparjama munañaparjama apnakatäpjjchïta.

19. Ay yokanacajja, ucanacajj janic jumanacjjar puripjjeristamti, antisas jumanacajj Tatitun ajllita qhuyapayata jakenacapäpjjaquisma. Ucampis, thaquinacapajj wiñay asquiwa, ucat jupan munañaparjam lurpan.

20. Jupasti saraquïna: Jumanacan camachitanacajjar phokhapjjañamarjamajja, aca oraken jachʼaptapjjätawa. Ucampis, camachitanacajjar jumanacan jan phokhapjjañamarjamajja, nayan nayrakatajjat jarcʼakatäpjjätawa.

21. Jichhasti, nayan yokanacajja, lakʼat sartapjjam, jakëpjjam, mä amuyumpi mä chuymampi amtapjjam, take cunanacanjja chicapjjam jan catuntäwiru puriñanacamataqui, nayan chuymajjan jumanacat cusisiñapataqui, chuymajjan jumanacat cusisisa acapach oraket mistuñapataqui, amay imäwiru jan llaquisiñamp jaqhusiñampi imantatäñajjataqui;

22. Jachʼa ñankhachäwimpi jan ñankhachatäñamataqui, asqui Diosan colerasiñapjj jumanac pachpjjar tucjañcam jan puriyasiñamataqui, jisa, ajayuru janchiru wiñay tucjañcam jan puriyasiñamataqui.

23. Pʼarjjtapjjam yokanacajja. Asqui cancañan arjjatiri isipamp isthapipjjam. Cuna cadenanacampitejj ñachʼantatäpcta ucanacat thalarasipjjam, chʼamacat mistupjjam, lakʼat sartapjjaraquim.

24. Jan wasitat jilamaru cutcatapjjamti. Jupan uñjäwinacapajj khapakänwa: camachitanacjj jupajj imi, Jerusalenat mistcäyätans ucapachatjja. Jupajj Diosan amparanacapan apnakatawa, jiwasaru arsuta orakeru irpaniñataqui. Janitejj jupajj jiwasampïcasapänjja, wasaran mankʼat jiwarapjjasänwa. Ucampis jumanacajj jacañap apakañ chʼamtʼapjjäyäta. Jisa, jupajj walja llaquisiñampiw jumanac laycu tʼakhesïna.

25. Jumanac laycu nayajj wal ajjsartwa qhathatiracta jupan wasitat tʼakhesiñapjjata, jupajj jumanacjjar chʼamjj wactʼäwjj catuñ chʼamtʼcasapänsa uqham amuyatanacam laycu. Ucampis nayajj yattwa, jupajj janiw jumanacjjar chʼamjj wactʼäwjj catuñ chʼamtʼquiti. Antisasa jupajj Diosan khapak cancañapar thake, jumanacan wiñay sumancañam munaraqui.

26. Jupan khana arumpi jumanacar parlatapata jumanacajj thuthusipjjtawa. Usuchjañ arunacampiw parlapjjet sasaw sapjjtajja. Nanacatac colerasi sas sapjjaractajja. Ucampis uca usuchjañ arupajja jupanccäna uca Diosan arupan chʼamapänjja. Cuntejj colerasiñaw sapcta jumanacajja, ucajja cheka cancañänwa, Diosancquisa ucarjama. Jupasti janiw chʼamanïcänti ucjj jarcʼañataqui, antisas jan ajjsarasa jumanacan ñankha luräwinacamat yatiyapjjäyätamwa.

27. Diosan chʼamapan jupampïñapajj waquisiwa, jupan jumanacar camachit churañapcama, jumanacan ucjj jaysañaman waquisiñapcamasa. Ucampis janiw jupati lacap jistʼarcäna, antisasa Tatitun jupanquiri Ajayupajj lacap parlañapatac jistʼarayänjja. Jupansti janiw lac jistʼthapiñatac chʼamajj utjcänti.

28. Jichhasti Laman yokajja, uqhamaraqui Lemuel, Sam, uqhamaraqui Ismaelan yokanacapäpcta uca nayan yokanacajja, amuyapjjam, jumanacatejj Nefin aruparu yäkapjjätajja janiw tucusipcätati. Jumanacatejj jupar yäkapjjätajja nayaw qhuyapayapjjäma, jisa, nayan nayrïri qhuyayäwejja.

29. Ucampis janitejj jumanacajj jupar yäkapcätajja, nayrïr qhuyayäwejja apakäwa, jisa, nayan qhuyayäwejja. Ucasti jupjjarüniwa.

30. Jichhasti, Zoram, jumaru parlsma: Jumajj Labanan lokeripätawa. Ucampis Jerusalen oraketa irpanitätawa. Juman Nefi yokajjamp wiñayatac chekpach sumancañamjj nayajj yatiractwa.

31. Ucatwa juman chekapätam laycu, juman jathamajj jupan jathapampiw qhuyapayatäni, aca orakjjan walja maranac jachʼaptas utjañapataqui. Janiraquiw cunasa jupanacaru usuchjcaniti, jupanacan aca orakjjan wiñay jachʼaptañapar jarcʼcaraquiniti; jan ucajja jupanac taypinquiri ñankha luräwinacaquiw jupanacar usuchjani jachʼaptañapar jarcʼaraquini.

32. Ucatwa jumatejj Tatitun camachitanacapjj imätajja, Tatitojj aca orakjj yakhachiwa jathaman sumancañapataqui yokajjan jathapampi.