1. Ucatsti naya Nefejj uca bronce tʼalpha lekʼetanacjjar kellkatäcän ucanac leetʼatajjatjja, jilanacajjajj nayar jacʼachasin sapjjetu: Leetʼctas ucanacasti, camsañarac munisti? Ajayu yänacäcaspas uqhämat amuyañäspa? Ajayurjamat phokhasini, janit janchirjam lurascani?

2. Naya Nefisti jupanacarojj sistwa: Ajayun arupaw arjirirojj ucanac khanstayi; cunalaycutejj Ajay tokew arjirinacarojj khanstayasi take cunanacatejj jaken wawanacaparojj janchi tokerjamajj lurascan ucajja.

3. Ucalaycu, leetʼctsa ucanacajj janchi tokempin ajay tokempin lurasiñapjjatawa. Cunalaycutejj Israelan utapajj acat jayarus jachʼarus take acapach orakjjar chʼeketatatäniwa, uqhämaraqui take marcanac taypiru.

4. Acajj jichhajj waljaniw Jerusalenanquirinacajj waljanit jan yatcjjapjjeti. Jïsa, takpach tamanacatjja jilpacharuw apasjjapjje. Ucanacasti lamar islanacan acan qhayan chʼeketatatäpjjewa. Cawqhantejj jupanacajj utjapqui ucjja, janiw qhitis yatipctanti. Yakha tokeruw apatäpjje ucac yatipjjtanjja.

5. Jupanacar apat khepatsti, acanacaw jutir urunacan jupanacamp lurasiñapjjat yatiyasi, qhitinacarutejj jucʼampjarojj Israelan Kollanap laycu ananucutäcani pejjtuntatäcaraquini. Cunalaycutejj chuymanacap jupa contrajj kalarayasipjjani; ucalaycuw take marcanac taypir chʼeketatatäni, take jakenacan uñisitäpjjaraquini.

6. Ucampis, gentilenacamp uywayasitap khepata, gentilenacjjar Tatitojj amparap aytcani uca khepata, mä unañchäwjam uchat khepataracjja, wawanacapajj gentilenacan amparapjjaruw ichutäpjjani, phuchanacapasti callachinacapjjaruraqui. Acajjay acanacjjat parlasqui ucanacajja, janchi toket parlasi; cunalaycutejj uqhämaw Tatitumpin awquinacasampin arusjäwipajja. Ucatsti jutir urunacan jiwasanacamp lurasiñapäc ucat yatiyi, uqhämarac Israelan utapanquir take jilanacasat yatiyaraqui.

7. Ucajj sañ munaraqui, cunapachatejj take Israelan utapajj chʼeketatatäcani, pejjtuntatäcaraquini ucapachajj purininiwa; ucürunsti Dios Tatitojj mä jachʼa chʼaman marc gentilenac taypin saytʼayani, jïsa, aca orakjjan saytʼayani. Jupanacampiw sarakerinacasajj chʼeketatayatäjjani.

8. Sarakerinacasan take toker saratatapjjatap khepatsti, Dios Tatitojj mä muspharcañ luräwi gentilenac taypin kalltani. Ucaw wali jachʼa asquïni jiwasan sarakerisataqui. Ucalaycuw jakthapisi, jupanacajj gentilenacampiw mankʼayatäpjjani, amparanacapjjaruw ichutäpjjani, callachinacapjjaruw apatäpjjaraquini.

9. Uca luräwisti gentilenacataquejj wali asquiraquïniwa. Janiw jupanacataquiquit asquïcani, jan ucasti, Israelan takpach utapataquejj asquiraquïniwa, cunalaycutejj cuntejj alajjpach Awquejj Abrahanamp lurcän uca arusjäw amtayani: Jumat sarakerinacajj take acapach orakenquir familianacaw qhuyapayatäni.

10. Jichhasti jilanacajjay, amuyapjjañam munirista, janiw orakenquir takpach familianacajj qhuyapayatäcaspati, janitejj Tatitojj amparap orakenquirinacar uñstaycasp ucajja.

11. Ucalaycu, take orakenacan uñjcañaw Dios Tatitojj amparap uñstayani, arusjäwinacapamp yatichäwipampejj Israelan utapanquirinacar puriñapataqui.

12. Ucat jupajj catuntäwit wastat jupanacar irpjjani; jupanacasti tuti churat orakenacapan mayachthapisjjapjjani. Ucatsti urpunacampit chʼamacanacampit mistjjapjjani. Ucatsti, Tatitun jupanacan Khespiyiripätap yatipjjani, Cutsuyiripätapa, Israelan Chʼamanipätap yatipjjaraquini.

13. Ucatsti, takpach oraken kʼañusir warmipäc uca jachʼa ajjtcañ taman wilapasti, ucanquirinacan pachpa pʼekepjjaruw purini, cunalaycutejj jupanac puraw nuwasipjjani, quicpa amparanacapan espadapasti pachpa pʼekenacapjjaruw puriraquini. Ucatsti quipca wilapampiw machantasipjjani.

14. Israelan utapa, jumaru nuwasir take marcanacajja, jupanac pur nuwasiñataquiw cutcatasipjjani. Cuna pʼiytejj jupanacajj allipcänjja, Tatitun marcapar uca pʼiyar jalantayañataquejja, uca quicpa pʼiyaruw jupanacajj jalantapjjani. Uca nuwasirinacasti takpachaw tucqhatäpjjani. Tatitun cheka thaquip ñankhaptayqui uca kʼañusir warmisti tucqhatäniwa. Jïsa, uca jachʼa ajjtcañ tamajj lakʼa tucuñapcamaw tincutatani, llojjesitapasti wali jachʼäniwa.

15. Cunalaycutejj Diosan arjiripajj siwa: Satanasajj jaken wawanacapan chuymanacapjjar jan jucʼamp chʼamanïcjjan ucürojj niy jacʼachasisinquiwa, cunalaycutejj take jachʼa jachʼa tucur jakenacampin, ñankh lurir jakenacampin yawirat aljamäpcan ucürojj mäquiw jacʼachasisinqui. Cunürutejj jupanacajj phuchcatatäpcan ucürojj jancʼachasisincaraquiwa.

16. Diosan phokhatpach colerasiñap jakenacan wawanacapjjar puriycan ucapachajj niyaw jacʼanqui; cunalaycutejj jupajj janiw muncaniti ñankha jakenacan asqui jakenacar tucqhañapjja.

17. Ucalaycuw jupajj asqui jakenacarojj chʼamapamp imani, jupan phokhatpach colerasiñapas purisincpan, jupanacajj imatäpjjaniwa, timanacapar ninamp phhichhantas tucqhatäñapcamasa. Uqhämasti, asqui jakenacajj janiw ajjsarañapäquiti, arjirin aqhäm satap laycu: Jupanacajj khespiyasipjjaniwa, ninatjamäcasp ucas khespiyasipuniniwa.

18. Jilanacajjay, nayaw jumanacar sapjjsma: Take acanacajj jancʼaquiw purinini. Jïsa, aca orakjjanjja, wila warañaw utjani, ninamp jewkʼempiw utjaraquini. Ucatsti jakenacjjaruw ucanacajj janchi token jutani, jupanacatejj Israelan Kollanaparu chuymanacap kalarayasipjjan ucajja.

19. Acajjay asqui jakenacajj janiw tucusipcaniti; take qhititejj Sion contra nuwascan ucan phatʼanucutäñap urojja, chekpachan purininiwa.

20. Ucatsti Tatitojj mä thac marcapataquejj waquichani, Moisesan arunacap phokhasiñapataqui. Jupajj siwa: Dios Tatitumajj jumanac taypin nayjam mä arjiriruw aptani; take cunanactejj jupajj sapcätam ucanac istʼapjjäta. Take qhititejj uca arjirir jan istʼcani ucajja, marcap taypit jaksutäniwa.

21. Jichhasti, naya Nefejja, jumanacaruw khanañchapjjsma, cawquïr arjirit-tejj Moisesajj parlcän ucajja, Israelan Kollanapänwa. Ucat jupajj asqui cancañamp taripani.

22. Asqui jakenacasti janiw cunats ajjsarapjjañapäquiti; janiw jupanacat pejjtuntatäpcanejja. Jan ucasti, supayan marcapaw pejjtuntatänejja, ucasti jaken wawanacap taypin ut-tʼayatäni, cawquïr marcatejj janchirjam jacañ taypin ut-tʼayatäqui uca.

23. Cunalaycutejja, ucapachajj jancʼaw purinini, ucürunsti kamiriptañatac ut-tʼayat take tamanacajja, take janchjjar chʼamanïñatac ut-tʼayat tamanacasa, take orakenquir jakenacan amuyuparjam wali aytat tucuñatac ut-tʼayat iglesianacasa, janchin ñankha munarcañanacap thakeri, orake yänac thakeri, take cunayman ñankhanac lurañ munir tamanacasa, jïsa, take qhitinacatejj supayan marcapancapqui ucanacaw ajjsarapjjañapäqui, lakhakepjjañapäqui, qhathatipjjañapäqui ucanacajja. Jupanacaw lakʼar tucuñapcam altʼayatäpcan ucanacajja, jupanacaraquiw yawirat aljam japuchcatatäpcan ucanacasa. Ucasti arjirin arunacaparjamawa.

24. Cunapachatejj asqui jakenacajj nayrakatar irpsutäpcan uca urojj mäquiw jacʼachasisinqui, cunjämatejj vaca kallunacajj tamat irpsutäquis uqhäma. Israelan Kollanapasti munañaparjamaw jakenac apnakañatac utjantasiñapa, uqhämarac chʼamampi, munañan cancañampi, jachʼa khapak cancañampiraqui.

25. Jupasti oraken pusi thiyapatpach wawanacapar apthapini. Ovejanacaparusti jactʼaniwa. Jupanacasti juparojj uñtʼapjjaniwa; mä tamaquiw utjani, mä awatiriquiraquiw utjani. Jupaw ovejanacaparojj mankʼayani; chʼijsti jupan jicjjatapjjaraquini.

26. Tatitun marcapan asqui cancañap laycuw Satanasajj jan chʼamanïcaniti. Ucatarac jupajj walja maranacajj jan antutatäcaspati, marcan chuymapjjar jan chʼamanïtap laycu, cunalaycutejj marcajj asqui cancañan utjasini, Israelan Kollanapasti sarayaraquiniwa.

27. Jichhasti naya Nefejja, jumanacaruw sapjjsma, take ucanacajj janchirjam puriniñapawa.

28. Ucampis take orakenaca, familianaca, lajjranaca, jakenacajja, Israelan Kollanapanjja sumaw utjasipjjani, jupanacatejj juchanacat Dios toker cutiquipstapcan ucqhajja.

29. Jichhasti ucanacjjat jan jucʼamp jiljañ munasaw naya Nefejj acqhar tucuyta.

30. Uqhämasti, jilanacajjay, bronce tʼalpha lekʼetanacjjar kellkatäqui ucanacan chekätap amuyapjjañam munirista. Ucanacasti jakeruw khanañchi, Diosan camächitanacaparojj jaysirïñapawa.

31. Ucalaycu, janiw jumanacajj amuyañamäquiti nayamp awquijjampic ucanac ircatapquirists yatichapquists uqhäma. Uqhämasti, jumanacatejj camächitanacar jaysapjjätajja, tucuycam thurtʼasipjjaraquïtajja, khep khepa urun khespiyatäpjjätawa. Ucajj uqhämäscapuniwa. Uqhamäpan.