1. Ucatsti qhitajj nayar situwa: Uñtam! Sarakerimar uñjam, jilanacaman sarakeripar uñjaraquim. Nayasti iyaw sasaw uñt-ta, ucatsti arsut orak uñjta, waltʼat jakenac uñjaracta. Uca tama jakenacasti, lamaran chʼallajj jan jaqhcayäquejj uqhämänwa.

2. Ucatsti walja jake tamanacaruw mayachthapit uñjta. Jupanacasti jupanac pur nuwasiñataquiw tantachasipjje. Ucatsti, chʼajjwanac uñjta, nuwasiñanacjjat parlirinaca, ucatsti uñjaractwa, cunjämtejj espadajj marcajj taypin tʼunjcän uca.

3. Ucatsti walja mitanacar jiwarir uñjta, uca oraken nuwasïwinac taypin purapat saytʼasiñanac taypinaraqui. Ucatsti walja marcanacaruw uñjaracta. Jïsa, ucanacajj waljänwa, janiraquiw jaqhuñ yantʼcti.

4. Ucatsti churañatac arsut orakjjarojja, mä chʼamac urpuw chhaktayi; ucatsti llijullijunacamp uñjta, khejjokhejjonac istʼta, orak qhathatinacamp cunayman jachʼa khojjokerinac istʼaracta. Ucatsti karkanacamp orakemp pʼujrurant-tir uñjta; jachʼa kollunacasti llojjetat-tapjjänwa, tʼunaraquiw lurasïna. Pampanacasti kʼalaraquiw tʼimphüna; walja marcanac orak mankhar jithintir uñjta. Walja marcarac ninamp naqhir uñjaracta; yakhanacasti orak qhathatinacampiw tʼunjatäpjjäna.

5. Ucatsti ucanac uñjatatjja, chʼamac urpur oraket chhaktawayir uñjta. Ucatsti Tatitun jachʼa ajjsarcañ taripäwinacap laycojja, walja tama tam jakenacar tucusir uñjaracta.

6. Ucatsti alajjpach jistʼartir uñjta; Diosan Chitapar alajjpachat sarakanir uñjaracta. Jupasti sarakanisinjja, jupa pachpaw jupanacar khansti.

7. Kollan Ajayun yakha tunca payanjjar purir uñjaracta. Jupanacasti Diosan ut-tʼayatäpjjänwa, ajllitäpjjaraquïnwa. Ucjjatsti nayajj ircataractwa.

8. Qhitasti nayarojj aqhäm sasaw parlitu: Acajj juman sarakerinacam taypin yatichañataquiw Chitan uca tunca payan discipulopajj ajllita.

9. Ucat situ: Chitan tunca payan apostol sat yanapiripat amtastati? Jupanacaw Israelan tunca tamapar taripcan ucanacajja. Uqhämasti, juman sarakerimat tunca payan chʼamani yanapirinacajj jupanacan taripatäniwa, Israelan utapat sarakerïpjjatam laycu.

10. Uñjctas uca tunca payan yanapiriw sarakerimarojj taripani. Jupanacasti wiñayatac asquiwa, cunalaycutejj jupanacan Diosan Chitapar iyawsapjjatap laycuw isinacapajj jupan wilapan jankʼoptayatäpjje.

11. Qhitasti: Uñtam! –situwa. Nayasti uñtasinjja, quimsa mita asqui jakenac saraquipir uñjta. Jupanacan isinacapajj jankʼönwa, Diosan Chitapan jankʼo isinacapjamaraquïnwa. Qhitasti aqhäm situwa: Acanacaw Chitan wilapïpan kʼomaptayatäpjje, jupar iyawsañanïpjjatap laycu.

12. Naya Nefisti uñjaractwa, pusïr mitat waljanin tucuycam saytʼasin chekancasin jiwapjjatapa.

13. Ucatsti orakenquir walja jakenacaruw mayachthapit uñjta.

14. Qhitasti aqhäm situwa: Uñtam sarakerinacamaru uqhämarac sarakerinacaparusa.

15. Ucatsti uñtasinjja, nayan sarakerijjäc uca jakenacaruw mayachthapit uñjta. Jupanacasti jilanacajjan sarakeripamp nuwasiñataquiw saytʼasipjjäna, nuwasiñataquiw tantachasipjjatayna.

16. Qhitasti aqhäm situwa: Awquimajj uñjcän uca kʼañu umanacajj acawa. Jïsa, jawirat parlcän uca uma mankhejja, mankha pachan jakhepawa.

17. Chʼamac urpunacasti supayan yantʼäwinacapawa. Ucanacasti jaken wawanacaparuw juyqhuptayi, ucatsti chuymanacaparuw chʼollkheptayaraqui, ancho thaquinacanjam irpasa, takenin jiwapjjañapataqui, chhakapjjañapataquiraqui.

18. Awquimajj uñjcän uca wali jachʼa utasti inamay lupʼïwinacaruw uñtasi, jaken wawanacapan jachʼa jachʼa tucüwinacaparuw uñtasiraqui. Mä jachʼa ajjsarcañ jakhew jupanacarojj jalji. Jïsa, Wiñay Diosan cheka cancañapan arupawa, Diosan Chitapäqui uca Mesiasaraquiwa, qhitit-tejj Kollan Ajayojj ircatqui oraken kalltäwipat jichhürcama. Jichhürut ucsarusti wiñayan wiñayapataquiraqui.

19. Qhitajj uca arunac parlcän uc-chañcamajja, jilanacajjan sarakerinacaparuw nayan sarakerinacajj contra nuwasir uñjta, cunjämtejj siscän uqhämarjama. Nayan sarakerinacajjan jachʼa jachʼa tucutap laycu, supayan yantʼäwinacap laycuraquiw sarakerinacajjajj jilanacajjan sarakerinacapamp atipjayasi.

20. Ucatsti uñjaractwa, nayan sarakerinacajjar atipjcäns uca jilajjan sarakerinacapajja, walja tamäsin orakpachar saratatapjjatapa.

21. Ucatsti walja jakenacar tantachasir uñjta; jupanac taypinsti nuwasïwinacamp chʼajjwanacan utjañapjjat parlirinac uñjaracta. Walja mitanac chhaktir uñjaracta; nuwasiñanacana, chʼajjwanac utjañapjjat parlañanacana.

22. Qhitasti saraquituwa: Acanacapí chuymanacap kalarayasiñar puripjjanejja.

23. Ucatsti uca jakenacajj chuymanacap kalarayasisinjja, chʼamac ajjtcañ kʼañu jakeruw tucupjjäna, jayrasiñamp phokhantata, cunayman ajjtcañ luräwinacamp phokhantataraqui.