1. Ucatsti naya Nefejja Tatitumpi parlatajjatjja awquejjan chʼujllapar cuttäyätwa.

2. Ucat jupajj nayaru arsutänjja, sasina: Nayaw mä samca samcta; ucan Tatitojj camachit churitu, jumampina jilanacamampina Jerusalenaru cuttañanacamataqui.

3. Cunalaycutejj Labanajj judionacan sarnakäwinacap kellkataniwa; uqhamaraqui juman lakʼa achilanacaman sutinacapajj jupan utjaraqui. Ucanacasti kellkantatawa tʼalpha kʼellu alquimia lekʼetanacjjaru.

4. Ucatwa Tatitojj nayaru camachit churitäna jumampin jilanacamampina Labanan utaparu sarañamataqui, kellkatanacjj thakañamataqui, ucanacjja chʼusa wasararu apaniñamataqui.

5. Jichhasti, jilanacamajj thuthusipjjewa, cuntejj jupanacaru waytʼcta ucajj chʼamaw phokhañajjataqui sasina. Ucampis janiw nayajj jupanacaru waytʼcti, antisasa ucajj Tatitun camachitapawa.

6. Uqhamajja saram yokajja; ucat jan thuthusitamata Tatitun qhuyapayatäyatawa.

7. Ucatsti naya Nefejj awquejjaru säyätwa: Saräwa, cunanactejj Tatitojj lurañajjatac camachit churquejja ucanacjj luraraquïwa, cunalaycutejja nayajj yattwa, Tatitojj janiw jaken wawanacapar camachit churquiti, jan mä thac waquichasajja cuntejj jupanacar sisquejja ucjj phokhañanacapataqui.

8. Ucatsti awquejjajj uca arunac istʼasinjja sinti cusisitänwa, jupan Tatitun nayar qhuyapayatap yatitap laycu.

9. Naya Nefimpi jilanacajjampejj chʼusa wasaranjja chʼujillanacajjampiw sarawayapjjäyäta, Jerusalen orakeru maqhatañataqui.

10. Ucasti Jerusalen orakeru puripcäyät uqhajja, nayampi jilanacajjamppurawa arusquipasipjjäyäta.

11. Ucatsti suert ajllipjjaraquïyäta, qhitis Labanan utaparu mantañapacänjja ucjj yatiñanacajjataqui. Ucatsti suertejj Lamanaru wactʼäna. Lamanasti Labanan utapar mantänwa, utapansti konusinjja jupampi arusquiparaquïna.

12. Tʼalpha kʼellu alquimia lekʼetanacjjaru kellkantat kellkatanacjja Labanan churañapjj munäna, cuna kellkatanacantejj awquejjan lakʼa achilanacapan sutinacapaw kellkatänjja.

13. Ucatsti, Labanajj kʼapisïna, jupan nayrakatapata juparu alissuraquïna, janiraquiw kellkatanacan jupan utjañapjj muncänti. Uqhamajja juparu sasaw säna: Uñjam, jumajj lunthatätawa. Nayasti jumar jiwayämawa.

14. Ucampisa Lamanajj jupan nayrakatapat jaltänwa; Labanajj lurcäns ucanacjjat nanacaru yatiyapjjaraquitänjja. Nanacasti sinti llaquisiñ kalltapjjäyätjja. Nayan jilanacajjasti wasaranquir awquejjaru cuttirjamäpjjaraquïnwa.

15. Ucampis nayajj jupanacaru säyätwa: Tatitojj chekpachaw jacqui jiwasasti jaccaractan, uqham chekpachansa sapjjsma, janiw awquisan ucjj sarakapcañäniti jan phokhasinjja cuntejj Tatitojj waytʼapquistu ucjja.

16. Ucatwa, chekäpjjañäni Tatitun camachitanacap phokhañataqui. Ucatwa awquisan tuti churata orakeparu sarakapjjañäni, cunalaycutejj jupajj kori, kollke, take cunayman jachʼa alaninacjja ucanjj jaytanucüna. Take ucjj luraraquïna Tatitun camachitap laycu.

17. Cunalaycutejja, jakenacan ñankhätap laycu Jerusalenajj tʼunjatäñapäniwa, ucjjata jupajj yatiraquïna.

18. Cunalaycutejja jupanacajj Diosan arjirinacan arunacapjj janiw catokapquiti. Ucatwa awquejjatejja uca oraket jalsuñapataqui camachita catokasinjja ucan kamcasapänjja, jupajj jiwaraquisapänwa. Ucatwa jupan uca oraketa jalsuñapajj waquisipuniwa.

19. Uqhamaraqui, uca kellkatanacjj catuñasajja Diosan suma amuyañaparjamawa, jiwasanacan wawanacasataqui awquinacasan lajjrap imañasataqui;

20. Uqhamaraqui jupanacatac imapjjañasataquiraqui take kollan arjirinacan lacanacapan arsuta arunacjja, cuna arunacatejj Diosan Ajayupanjja chʼamapansa jupanacaru churatäcäna ucanacjja, acapach oraken kalltäwipat jichhürcamasa.

21. Ucatsti uqham arunacampi jilanacajjaru amtayäyätwa, Diosan camachitanacap phokher chekäñapataqui.

22. Ucatsti tuti churata orakejjaru sarakapjjäyäta; korejjaru, kollkejjaru, jachʼa alaninacajjaru apthapipjjaraquïyätwa.

23. Ucanacjj apthapipjjatajjatsti, wastat Labanan utaparu maqhatapjjäyäta.

24. Ucatsti Labanan uc mantapjjäyäta, tʼalpha kʼellu alquimia lekʼetanacjjar kellkantat kellkatanacjja nanacaru churañapjj munapjjaraquïyätwa. Ucanacataquisti korejja, kollkejja, take jachʼa alaninacajja nanacajj juparu churapjjeriscäyätjja.

25. Ucatsti Labanajj yänacajjan sinti waltʼatap uñjasinjja, ucanacjj munapayänwa. Ucatwa nanacaru alissupjjetäna; lokerinacap nanacaru jiwayañataquejja qhitaniraquïnjja, yänacajj jupan catuñapataqui.

26. Ucatsti Labanan lokerinacap nayrakata jaltapjjäyätwa. Yänacajjaru jaytanucuñajjajj waquisiraquïnwa; ucanacasti Labanan amparaparu purïna.

27. Ucatsti chʼusa wasararu jaltapjjäyäta. Labanan lokerinacapasti janiw nanacaru jicjjatanipquitänti. Nanacasti mä karka pʼiyana imanatasipjjäyäta.

28. Ucatsti Lamanajj nayampi kʼapisïna, uqhamaraqui awquejjampi. Lemuelasti kʼapisiraquïna, Lamanan arunacaparu yäkatap laycu. Ucatwa Lamanamp Lemuelampejj walja khoru arunacampi nanaca sullcanacapjjaru jaychasipjjetäna; mä lawampisa nanacaru jawkʼapjjetäna.

29. Ucatsti, mä lawampi nanacaru jawkʼapquitän uqhajja, Tatitun alajjpach qhitapajj jutasina jupanac nayrakatan saytʼäna, jupanacaru saraquïnwa: Cunalaycusa sullca jilamaru lawampi jawkʼapjjta? Janit yatipcta, Tatitojj jupar ajllïna jumanacjjaru sarayiritaqui, jumanacan ñankha luratanacam laycu? Wasitatwa Jerusalenaru maqhatapjjäta, ucat Tatitojj amparanacamaru Labanjj catuyapjjätam.

30. Nanacaru arscasinjja alajjpach qhitajj sarjjänwa.

31. Qhitan saratapatsti, Lamanamp Lemuelampejj wastat aqham thuthusiñ kalltapjjäna: Cunjamaraquist Tatitojj amparanacasaru Labanjj catuychistani? Jupajj wali chʼamani jakechejjaya. Pheska tuncanirus sarayaspawa; jisa, pheska tuncaniruw jiwayaspajja; ucatjja cunats jan jiwasaru jiwayistaspa?