1. Ucatsti jupanacajj Tatituru yupaychapjjäna, nayampi saranakapjjaraquïna. Mayja lekʼsuta jachʼa cʼullunac lekʼsupjjäyäta. Cunjamatejj barcon jachʼa cʼullunacap lurañajjäcänjja ucjja mä kawkha cuti Tatitojj uñachayitäna.

2. Naya Nefisti janiw jaken yatitaparjam uca jachʼa cʼullunac lurcäyätti, janiraquiw jakenacajj lurapqui uqham barcjj lurcaraquïyätti. Ucatsipana cunjamatejj Tatitojj uñachayquitänjja uqham luräyätwa. Ucatwa, jakenacajj lurapquejja, barcojj janiw uqhamäcänti.

3. Naya Nefisti kolluru wal sarasinjja Tatitut wali mayisirïyätwa. Ucat Tatitojj wali jachʼa cunanacjja uñachayitäna.

4. Ucatsti nayan barc Tatitun aruparjama luratajj khepatjja, jilanacajjajj ucan qhusätapjj uqhamaraqui wali suma luratapjj uñjaraquïna. Ucatwa jupanacajj Tatitun nayrakatapana wastat chuymanacaparu llampʼuptayapjjäna.

5. Ucatsti Tatitun arupajj awquejjaru purïna, nanacan sartañajjataqui barcor mantañajjataquiraqui.

6. Khepärmanthisti, take cunanacjj waquiyasina, wasarat achunacampi aychanacampi, walja walja mamuray misqʼimpi, Tatitun camachit churataparjama juyranacjj waquiyasinjja, jachʼa barcor mantapjjäyäta, take cunanacajjampi jathanacajjampi, take cuntejj nanacamp apapcäyätjja ucanacampi. Sapakat mayni maraparjamaw mantapjjäyäta. Ucatwa takeniw barcor mantapjjäyäta, warminacajjamp wawanacajjampi.

7. Awquejjasti pani yokall waw chʼusa wasarana wawachayasïna. Uca panita jilïristi Jacob satäna, sullquïristi Jose sataraquïna.

8. Ucatsti takeni barcor mantasina, take juyranacajjsa, apañajjataqui camachit catokapcäyäta ucanacs nanacampi apantasinjja, jachʼa kota lamararu mantapjjäyäta, arsut orak tokeru thayana apatäpjjaraquïyäta.

9. Walja urunaca thayan nayrakataru apatätajj khepatjja, jilanacajjampi, Ismaelan yokanacapampi, uqhamaraqui warminacapampejj sinti cʼuchisipjjänwa, jupanacan thokoñapcama, cantañapcama, awkañapcama, jisa, cuntejj jupanacar ucsaru apcäna uca chʼamat armasiñanacapcama. Jisa, ancha khorjamaw aytasipjjäna.

10. Naya Nefisti sinti ajjsarañ kalltäyäta, sasina: Ñankhanacasata Diosajj inas jiwasanacampi coleraschini, jiwasanacar jawkʼapjjaracchini jiwasanacan jachʼa kota lamar pʼiyanacan mankʼantatäpjjañasataqui. Ucatwa naya Nefejja wali amuyuni jupanacar arsusiñ kalltäyätwa. Ucampis jupanacajj nayampi colerasipjjäna sasina: Janiw sullcajjan nanacjjar sarayirïñapjj munapcti.

11. Ucatsti Lamanamp Lemuelampejj phalanacamp nayaru ñachʼantapjjetäna, wali usuchnokapjjaraquitäna. Ucampis Tatitojj jupanacan uc luratapjj jaytjjäna jupan chʼamapjj uñachayañapataqui, ñankha jakenacjjat arscäna uca aru phokhañapataqui.

12. Ucatsti, jupanacajj nayaru jan onjjtañajjcam ñachʼantapquitäna ucapachatjja, uca Tatitun waquichata morokʼ irpirejja janiw jucʼampis uñachtʼaycjjänti.

13. Ucatwa, cawqharutejj barc sarayañapäcänjja ucjj jupanacajj janiw yatipcänti. Ucatsti khoru thayajj thaytaraquïna, jisa, mä jachʼa ajjsarcañ chʼamaca thayaw sartaniraquïna. Quimsa urojja umanacjjaru kheparu cuttayatäpjjäyäta; ucapachata jupanacasti sinti ajjsarapjjäna, jachʼa kotan ajjscatapjjañäniwa sasina; ucampis janiw nayaru antutapquitänti.

14. Nanacajj khepar cuttayatäpcäyätsa uca pusïri urunsti, ajjsarcañ chʼamac thayajja sinti ancha khoruruw tucüna.

15. Ucatsti nanacajj jachʼa kota lamara pʼiyanacan mankʼatatïrjamäpjjäyätwa. Nanacansti pusi uru umanacjjar kheparu cut-tayatajj khepatjja, jilanacajjajj amuyañ kalltapjjäna, Diosan taripäwinacapan jupanacjjarütapjjata, jupanacan jiwirjamätapjjatsa janitejj jupanacajj ñankha luräwinacapat cutiquipstapcasapänjj uqhajja. Ucatwa jupanacajj nayan ucjj jutasinjja amparajjanccänsa uca chinuñanacjj jarapjjetäna. Amparanacajjasti sinti pʼusuntatänwa, cayunacajjasti wali pʼusutaraquïnwa, ucanacasti walpin usuraquitäna.

16. Ucampisa Diosajjaru uñjäyätwa, uru pakariw juparu jachʼar aptäyätjja. Janiraqui Tatituru tʼakhesïwinacajjat thuthuscäyätti.

17. Lehi awquejjasti walja cunanacjj niy jupanacaru, uqhamaraqui Ismaelan yokanacaparu sänwa, ucampis sapa maynitejj nayataqui arscchïnjja ucanacaru jupanacajj walja nuwasiñ arunacampi eojjsupjjäna. Awquejjamp taycajjampisti wali chuymanïsinjja, wawanacap laycu walja llaquinacampi llaquisisinsa, iquiñanacapjjaru wali usutaw iquintayatäpjjäna.

18. Jupanacan tʼakhesitaps wal llaquisitaps laycu, jilanacajjan walja ñankha luräwinacap laycuraqui, awquejjamp taycajjampejj Diosapampi jiquisiñataqui acapachata misturjamäpjjänwa. Jisa, kaka ñicʼutapasti lakʼa taypiru liwisiri puriyatïrjamänapajj jacʼäjjänwa.

19. Jacobompi Joseampejja, wawäsinjja, walja chʼamañchaña jupanacataqui waquisipana, taycapan tʼakhesitäpata wal llaquisipjjäna. Warmejjasti wawanacajjasti jachapampi Diosat mayisiñanacapampi janiraquiw jilanacajjan chuymanacaparu llampʼuptaycänti, jupanacan nayaru antutañapataqui.

20. Janiraquiw cunas utjcänti jupanacan chuymanacapar llampʼuptayañataqui, jan ucajja jupanacjjaru tʼunjcaspas Diosan uqham uñstiri chʼamapaquiwa. Uca laycojj jupanacajj jachʼa kota lamara pʼiyanacan mankʼantatäñjamätapjja amuyasisinjja, cuntejj lurapcäna uca luräwita cutiquipstapjjäna, nayaru antutañcama.

21. Ucatsti jupanacan nayaru antutatap khepatjja, nayaw uca morokʼ irpirjj iräyätjja, ucasti wasitat uñachayjjetäna, cunjamtejj muncäyät uqhama. Ucatsti Tatitut mayisïyätjja. Mayisitajj khepatsti thayanacajj tʼacünwa, jallusti apaktaraquïna wali sumatʼacuw tucuraquïnwa.

22. Ucat naya Nefisti barcor sarayäyätwa, wastat arsut orak tokeru umanacjjar sarañajjataqui.

23. Ucatsti walja urunac umanacan saratajj khepatjja, arsut orakerojj puripjjäyäta. Wañjjaru mistupjjaraquïyätjja, chʼujllanac uttʼayapjjaraquïyätjja, ucaruw arsut orake sutiñchapjjäyäta.

24. Ucatsti yapu yapuchañ kalltapjjäyäta, jathanac phawañ kalltapjjara quïyäta; jisa, Jerusalen oraketa apanipcäyätjja take uca jathanacjj orakerojj uchapjjäyäta. Ucatsti ucanacajj jilarquiriw achüna; ucatwa, nanacajj jilarquiri qhuyapayatäpjjäyätwa.

25. Ucatsti wasaran sarasinjja arsut orake chʼuminacanjja cunayman lakʼonacaru jicjjatapjjäyäta, vacampi torompi, asnompi caballompi, chiwumpi, kollunquiri chiwumpi, take cunayman lakʼonacampi, ucanacasti jakenacatac wali. Jicjjatapjjaraquïyätjja take cunayman metalan kalanacjja, korini, kollkeni, wila alquimiani.