2ri Jalja
Wila jachʼa kota lamar jacʼanquiri chʼusa wasararu Lehejj familiapampi sari–Jupan Lamana, Lemuel jilïri yokanacapajj jupa tok thuthusipjje–Nefimpi Samampejja arunacaparu iyawsapjje–Tatitun Nefiru arsüwinacapa.
1. Ucatsti Tatitojj awquejjaru arsüna. Jisa, mä samcana jupar arsüna, sasina: Lehi, qhuyapayatätaw jumajja, lurctasa ucanacata. Uqhamaraqui, iyawsirïtam laycu, cuntejj siscäyäsmajja ucanac aca marcaru yatiyatam laycuraqui, jupanacajj jumar jiwayañ munapjjtamwa.
2. Ucatsti Tatitojj awquejjaru camachita samcan churäna, jupan familiaparu irpsuñapataqui chʼusa wasararu mistuñapataqui.
3. Ucatsti Tatitun aruparu jaysänwa, ucat cuntejj Tatitojj lurañapatac siscänjja ucjj luränwa.
4. Ucatsti chʼusa wasararuw mistüna. Utapsa, tuti churata orakenacapsa, koripsa, kollkepsa, jachʼa alani cunanacaps jaytanucuraquïnwa. Janiw cunas jupamp apcaraquïnti, jan ucajja familiapjja, juyranacjja, chʼujllanacapac apäna; ucat chʼusa wasararu misturaquïna.
5. Ucat Wila lamara irana jacʼanquiri thiya pampanacaru sarakanïna. Ucat chʼusa wasaran saräna, Wila jachʼa kota jucʼamp jacʼanquiri thiya pampanacanjama. Familiapampi chʼusa wasaran saräna; familiapansti utjäna, Saria taycajja, Lamana, Lemuela, Sam sat jilïrinacajja.
6. Ucatsti quimsüru chʼusa wasaran sarcän uqhajja, chʼujllanacapjj uttʼayäna mä kherwanjja, mä uma jawira iranana.
7. Ucatsti mä loktäw kʼulmpi kalat luränjja; Tatituru mä loktäwi loktaraquïna; Dios Tatitusaru yuspagara churaraquïna.
8. Ucatsti, jupajj jawiraru Laman sutimpi sutiñchäna. Jawirasti Wila lamaran lacaparuw waranokäna. Kherwasti thiyanacancänwa jawiran lacap jacʼana.
9. Awquejjajj jawira umanacan Wila jachʼa kotan uma jalsuparu waranokatap uñjasinjja, Lamanarojj arsünwa, sasina: Jumajja aca jawirjamäquisma, sapa cuti take asqui cancañ jalsuru jalantasajja!
10. Lemuelar arsuraquïna, sasina: Jumajj aca kherwjamäquisma, chʼollkhe, jan tʼuqhartiri, jan onjjtcaya Tatitun camachitanacaparu imañataqui.
11. Lamanan Lemuelan jan altʼiri pʼekenïtapatjja, jupajj ucjj arsünjja. Jupanacasti walja cunaymananac lurasajj awquip toke thuthusipjjäna, jupan uñjäw uñjiri jakëtap laycu, tuti orakepsa, koripsa, kollkepsa, jachʼa alani cunanacaps jaytanucusa chʼusa wasaran tucusiñapataqui jupan Jerusalen oraket jupanacar irpsutap laycuraqui. Jupanacajj sapjjaraquïna: Ucanacjj luränjja chuymapan tʼajjmara lupʼïwinacap laycu sasina.
12. Uqhamaw Lamanamp Lemuelampejja, jilïrinacäsinjja, awquipjjat thuthusipjjäna. Jupanacaru lurcänsa uca Diosan luräwinacapjj jan yatitap laycu jupanacajj uqham thuthusipjjäna.
13. Diosan arjirinacan arunacaparjama uca jachʼa Jerusalen marcan tʼunjatäñapar janiraquiw iyawsapcänti. Jupanacasti awquejjan jacañap apakañ chʼamtʼiri Jerusalenanquiri judionacjamaraquïnwa.
14. Ucatsti awquejjajj Lemuel sat kherwanjja Ajayumpi phoktʼatäsa jupanacaru chʼamampiw arsüna, jupanacan janchinacapan qhathatiñapcama jupan nayrakatapana. Jupasti jupanacan pejjtuntatäñapcamaw arsüna, jupa toke arusiñ ajjsarañapcama. Ucatwa cuntejj lurañapatac jupanacaru siscänjja ucjj jupanacajj lurapjjäna.
15. Awquejjasti mä chʼujllan kamäna.
16. Ucatsti, naya Nefejja, sinti waynäsinjja, ucampis jachʼa tansäsinsa, Diosat jan amuyata cunanacjj walpin yatiñ munasinsa, Tatituru artʼasïyäta. Jupasti nayaru tumpitänwa. Chuymajjaru llampʼuptayaraquitänjja, cuntejj awquejj arscäna take uca arunacaru iyawsañajjataqui. Uca laycojja janiw nayajja jilanacajj-jam juparu ayniscäyätti.
17. Cuntejj Tatitojj Kollan Ajayupampi nayaru yatiyquitu ucanac Samaruw arjjayas yatiyaracta. Ucatsti jupajj arunacajjaru iyawsänwa.
18. Ucampisa Lamanamp Lemuelampejj janiw arunacajjaru yäkañ munapcänti. Nayasti jupanacan chuymanacapan chʼollkhëtapat llaquisisinjja, jupanacataqui Tatituru artʼäyätwa.
19. Ucatsti Tatitojj nayaru arsusïna, sitäna: Qhuyapayatätaw jumajj Nefi, iyawsatam laycu, cunalaycutejj altʼata chuymampi jumajj take munañamampi nayaruw thakesta.
20. Nayan camachitanacajj imañamarjamajja jachʼaptätawa; mä arsut orakeru irpataraquïyatawa, jisa, jumanacataqui mä orakew nayan waquichata, jisa, mä suma orake take yakha orakenacatsipana.
21. Jilanacaman jumjjaru cutcatapjjañaparjamasti jupanacajj Tatitun nayrakatapat jarcʼakatäpjjaniwa.
22. Jumatejj camachitanacajjar imätajja, jilanacamjjaru uchatäyatawa sarayiritaqui, yatichiritaquiraqui.
23. Cunalaycutejja, cunürutejj jupanacajj nayjjaru cutcatapquitanejja, ucürunjja jachʼa ñankhachäwimpi jupanacaru ñankhachä nayajja. Jupanacasti janiw jathamjjaru chʼamanïpcaniti, janitejj jathamajja nayjjaru cutcatapcaraquitanejja.
24. Jathamasti nayjjaru cutcatcaraquitanejja, jupanacajj juman jathamataqui jawkʼañjamäniwa, jupanacaru amtthapiyasiñataqui.