1. Istʼapjjam, ucatsti ischʼuquipjjam, Jacobon utapa, Israel sutimpi sutichatäpcta ucanaca, Judan umanacapat mistupcta, jan ucajja, bautismo umanacat mistupcta ucanaca, Tatitun sutipjjar juräwi lurapcta ucanaca, Israelan Diosapat amtasipcta ucanaca. Ucampis janiw juräwi lurapctati cheka cancañansa asqui cancañansa.

2. Ucampis jumanacajj kollan marcanquirït –sapjjtawa. Janiw jumanacajj Israelan Diosapar alcatapctati, arctirinacan Tatitupäquipana. Jïsa, nuwasiri tamanacan Tatitupaw sutipajja.

3. Nayajj kalltatpach khanañchta nayra yänacjjatjja. Ucanacasti lacajjat mistu; ucatsti uc uñachayta, jïsa, acatjamat ucanacjj uñachayta.

4. Juman chʼurqhisirïtam yatitajj laycuw ucjj lurta. Cuncamajj mä jirur uñtatawa, paramasti broncer uñtataraquiwa.

5. Nayasti kalltatpach jumar yatiysma; janïr cunas purinquipan ucanac uñachaysma. Ucanac yatiysma juman jan aqhäm sascañamataqui: Wacʼan diosajjaw ucanac luratayna; jaken lurat wacʼan diosajjampi umatatayas lurat wacʼan diosajjampiw camächit churatayn acanac lurañataquejja –sasa.

6. Jumajj take ucjj uñjtawa, istʼaractawa. Janit ucanac arsuñ muncta? Machak yänac uñachaysma ucqhatpachsa, jan yatcäyätas uca imantat yänac uñachaysma.

7. Ucanacajj luratäjjew jichhajja, ucampis janiw kalltatpachäquiti, ucanacajj jumaruw yatiyasïna janïr istʼcasmas uca ur nayräjja juman jan sañamataqui: Niy ucanacjj yatjjäyätwa –sasa.

8. Jïsa, jumajj janiw istʼctati, yatcaractasa; jïsa, ucapachat jinchumajj jistʼantasi, cunalaycutejj juman jan chek sarnakañamjja, yatïyätwa, puracancta ucqhatpach camächit pʼaquir sutimpejj uchatäyätajja.

9. Ucampis sutijjar munat laycuw colerasiñajjarojj jayarstʼayä, wakaychatäñajjataquiraquiw naya pachpajj chuym limisï, jumar jan phatʼanucuñataqui.

10. Acajj jumarojj kʼomaptaysmawa; llaquisiñ nina taypit jumar ajjlliracsma.

11. Naya laycu, jïsa, nayar munasitajj laycuw lurä, sutijjan jan kʼañuptayatäñapataqui, janiraquiw khapak cancañajj yakhar churcäti.

12. Istʼitay Jacobo, nayan jawsat Israelas istʼaraquita. Cunalaycutejj naya quicpäsctwa; nayaw nayrïrïtjja, nayaraquiw tucuyätjja.

13. Amparajjaw oraken takanap ut-tʼayi, cupi amparajjaw maysat maysa alajjpachanac utjayaraqui. Ucanacaruw jawsta, ucanacasti chicpachaw nayar uñstapjjetu.

14. Takpach jumanac tantachasipjjam, ucatsti istʼapjjaraquim: Qhitis jupanac taypin utji ucanac yatiyañapataquejja? Tatituw juparojj muni. Jïsa, jupanac laycu arsutäqui uca arurojj phokhaniwa. Munañaparjamaw Babilonian sarayani; amparapasti caldeonacjjaruw puriraquini.

15. Tatitojj saraquiwa: Naya Tatituw parlta; jïsa, arsuñapataquiw jawsta apaniracta, jupasti sarnakäwipjj sumaptayaniwa.

16. Nayar jacʼachasinipjjeta. Janiw kalltäwitpach jamasat parlcti; cunapachatejj ucajj khanañchascän ucapachatpach parlta; Dios Tatitump Ajayupampisti nayaruw qhitanitu.

17. Aqhäm siw Tatitojja, Khespiyirimajja, Israelan Kollanapajja: Nayaw jupar qhitanta, naya Tatit Diosama, qhititejj waquiscay yatichtam, sarnakañamäc uca thaquinjam irparactam, jupaw ucjj luri.

18. Jumajj camächitanacajjar yäkaquisamäna; ucatjja sumancañamajj jawirjamäsapänwa; asquïñamasti lamaran mathapinacapjamäsapänwa.

19. Sarakerimasti chʼalljamäsapänwa, jumat sarakerinacasti kota lacan utjir jiscʼa kalanacjam waltʼataraquisapänwa. Jupan sutipasti janipuniw chhaktayatäcasapänti, janiraquiw nayrakatajjats jakonucutäcasapänti.

20. Babiloniat mistupjjam, caldeonac taypit jaltjjapjjam, cusiscañ arump khanañchapjjam; take token yatiyapjjam, orak thiyacam uca yatiyäw apapjjam ucatsti sapjjam: Tatituw Jacob lokeriparojj khespiyi –sasa.

21. Jupanacasti janiw umat pharjayasipquiti; jupajj chʼusa wasaranjam irpäna; jupanacataquejj karkat um jalsuyäna; kark pʼujrurant-tayäna ucat umajj jalsüna.

22. Take ucanac lurquipansa ucat jucʼampinacsa, janiw sumancañajj ñankha jakenacatac utjquiti –siw Tatitojja.