1. Jichhajja, naya Nefejja aca tʼalpha lekʼetanacjjaruw kellkä nayan sarnakäwinacajjata, pʼekechäwijjata, kollan luräwinacajjata. Uqhämasti, jucʼamp kellkañajjataquejj awquijjampit jilanacajjampit mä jucʼamp parlañajjaw utji.

2. Ucatsti, awquijjajj samcapat parlañ tucuyasinjja, uqhämarac jilanacajjan amuytʼasirïpjjañapatac jupanacar ewjjañ tucuyasinjja, jupajj judionacjjat parläna:

3. Jupanacan tʼunjatäñap khepatjja, jïsa, uca jachʼa Jerusalen marcan tʼunjatäñap khepatjja, waljan catuntatäsin Babiloniar apatäñap khepataracjja, Tatitun amuyuparjam waquiscan ucapach wasitat cut-taniñapjjat parläna. Jïsa, catuntäwipat irpsunitäpjjaspawa. Catuntäwipat irpsunit khepatsti, jupanacajj tuti churat orakep wasitatamp catusjjapjjaspa.

4. Jïsa, awquijjajj Jerusalenat mistuncäns ucapachat sojjta patac mararuw Tatitojj jupatac arjiri judionac taypin sartayaniw sas parläna. Ucasti Mesias, jan ucajja, acapach jakenacan Khespiyiripaniw sasaw säna.

5. Uqhämaraquiw jupajj arjirinacjjat jupanacar parläna: jupanacat waljaniw Mesiasjjat arsupjjäna, qhitit-tejj jupajj parlcän ucjjata, jan ucajja, acapach jakenacan Khespiyiripjjata.

6. Uqhämasti takpach jakenacaw aynachtʼatäpjjäna, chhaktatäpjjaraquïna. Uqhämaquipunïpjjaspawa, janitejj Khespiyirir alcatapcasp ucajja.

7. Mesiasan nayräjjap jutir Diosan arjiripat parlaraquïna. Tatitun thaquip waquichañapataqui.

8. Jïsa, jupaw chʼusa wasaran aqhäm sas artʼani: Tatitun thaquip waquichapjjam thaquinacap chekaptayapjjam, cunalaycutejj mayniw jumanac taypinqui, ucarusti janiw jupan wisqhupan chinuñap jararañataquis asquïcti –sasa. Awquijjajj ucjjat parläna.

9. Betabaran bautizani, Jordanat qhurcatana –sasaw parlaraquïna. Ucjjarusti yaptʼascaquïnwa: Umampiw bautizani, Mesiasarus umampiw bautizaraquini.

10. Mesiasar umamp bautizatap khepatsti, Diosan Chitaparuw uñjaspa, jupar bautizatapat arsuraquispa acapach jakenacan juchanacap apakañat parlaraquispa.

11. Ucatsti, aca arunac parlatap khepatjja, awquijjajj jilanacajjampiw asqui yatiyäwjjat parläna, judionac taypin ucajj yatiyasiñapjjat parlaraquïna. Ucatsti judionacan jan iyawsirïpjjatap laycu tincuñapjjat parlaraquïna. Saraquïnwa: Jutcan uca Mesiasar jupanacan jiwayatap khepatjja, jïsa, jupar jiwayatap khepatjja, jiwatanac taypit jactani, ucatsti Kollan Ajay tokew gentilenacar uñstaraquini.

12. Jïsa, awquijjajj gentilenacjjatsa, Israelan utapjjatsa wal parlaraquïna, jupanacajj mä olivo aljamäcaspas uqhäm parläna, uca olivon layminacapan khakhakatäñapjjat arsüna, ucatsti takpach orakjjar chʼeketatatäñapjjat arsuraquïna.

13. Ucatwa, jupajj säna: Waquisiw jiwasanacan mä amuyump arsut oraker irpatäñasajja, Tatitun arup phokhasiñapataqui, jiwasanacan takpach orakjjar chʼeketatatäñasataqui.

14. Israelan utapan chʼeketatatäñap khepatsti, jupanacajj wasitat mayachthapitäpjjani. Ucajj sañ muni, gentilenacajj Diosan phokha arunacapa catokapjjani, uca khepatjja, cheka olivo alin layminacapajja, jan ucajja, Israelan utapat jiltʼirinacajja alcatayatäniwa, ucajj sañ muni, cheka Mesiasat yatiñaruw puripjjani jupanacan Tatitupätapa, Khespiyiripätap yatipjjaraquini.

15. Uqhäm arunacampiw awquijjajj jutir urunacat yatiyas jilanacajjarojj parläna, walja yakhanacjjat parlaraquïna. Ucanacsti janiw acaru kellkcti, cunanacatejj nayatac waquiscän kellkañajj take ucanacjj yakha lekʼetanacjjaruw kellkta.

16. Take acanacat parlcta ucanacajja, awquijjajj Lemuel sat kherwan mä chʼujllan utjcän uc-chañcamaw lurasïna.

17. Ucatsti naya Nefejja, awquijjan arunacap istʼasinjja, cuntejj jupajj uñjäwin uñjcän ucanacjjata, cunanactejj Kollan Ajay toke arscän uca khepata, uca chʼamjja, Diosan yokapar iyawsatap laycuw catokäna, ucasti jutañapäcäns uca Mesiasawa, ucat naya Nefejj ucanacjjat uñjañ, istʼañ, yatiñ, munaraquïyäta Kollan Ajayun chʼamapampi. Ucasti Diosan churäwipawa, take jupar chʼamtʼas thakapqui ucanacataqui, nayra pachanacansa jupa pachp jaken wawanacapar uñstcani ucapachansa.

18. Cunalaycutejj Tatitojj wasürus jichhürus wiñayataquis quicpaquïsquiwa. Orak ut-tʼayäwitpach thaquejj take jakenacatac waquichata, jupanacatejj juchanacapat cutiquipstasa jupar jutapcaspa ucqhajja.

19. Cunalaycutejja, qhititejj chʼamachasis thakqui ucajja, jicjjataniwa. Diosat jan amuyat yänacasti, Kollan Ajayun chʼamapampiw jupatac khanstayatäni; jichhürunacanjj uca quicparaqui, camisacäntejj nayra pachanacansa, uqhämaraquïniw jutir urunacanjja. Uqhämasti, Tatitun saräwipajj wiñay muyuwa.

20. Ucatsti amtasimay jake, take luräwinacamatjja, taripäwir jawsatäyätawa.

21. Uqhämasti, yantʼa urunacamantejj ñankhar arcstajja, Diosan taripäw konuñap nayrakatanjja, juchanit uñtʼatäpjjätawa. Janiw cuna kʼañus Diosamp chicajj utjcaspati. Uqhämasti, waquisiniw wiñayatac jakonucutäñamajja.

22. Kollan Ajayojj chʼamanïñ cancañ churitu acanac arsuñajjataqui; ucanac jan apanucuñajjataquiraqui.