1. Lemuel sutin kherwana, mä chʼujllan utjcän ucapachaw awquijjajj take ucanac uñjäna, istʼäna, parlaraquïna, uqhämaraquiw aca tʼalpha lekʼetanacjjar jan kellkañjamäqui ucanac uñjäna, istʼäna, parlaraquïna.

2. Jichhasti, cunjämatejj nayajj aquïr tʼalpha lekʼetanacjjat parlcta ucajja, janiw marcajjan sarnakäwipat phokhatpach kellkcta uca tʼalpha lekʼetanacäquiti. Cawquïr tʼalpha lekʼetanacarutejj marcajjan sarnakäwipat kellkcta ucarojja, Nefi sutimpiw sutichta. Ucatarac uquïrinacajja, Nefin tʼalpha lekʼetanacap satajja, nayan sutijj laycu. Aquïr tʼalpha lekʼetanacasti Nefin tʼalpha lekʼetanacap sataraquiwa.

3. Ucampis aquïr tʼalpha lekʼetanacjjar kellkañataquejj mä camächit Tatitut catokta, marcajjan kollan luräwinacapat kellkat utjañapataquiqui.

4. Yakha tʼalpha lekʼetanacjjaruw pʼekechirinacan sarayäwinacapas marcajjan nuwasïwinacapas chʼajjwäwinacapas kellkatäñapäna. Ucalaycuw aquïr tʼalpha lekʼetanacajj jucʼampis kollan luräwinacataquiwa. Yakhër tʼalpha lekʼetanacasti jucʼampis pʼekechirinacan sarayäwinacapataqui, marcajjan nuwasïwinacapataqui, chʼajjwäwinacapataquiraquiwa.

5. Ucat Tatitojj aca tʼalpha lekʼetanac nayan lurañajjatac camächit churitu, jupan chʼiqhi amuyuparjam lurasiñapataqui. Nayasti janiw ucjj yatcti.

6. Ucampis Tatitojj kalltäwitpach take cun yati. Ucat jupajj mä thac waquichi jaken wawanacap taypin take luräwinacap phokhasiñapataqui. Jïsa, take chʼamajj jupanquiwa take arunacapan phokhasiñapataquejja. Ucajj uqhamäscapuniwa. Uqhamäpan.