1. Ucatsti gentilenacatejj Diosan Chitapar istʼasipcani cunürutejj jupanacar uñstcani aru toksa, chʼama toksa, jupanacan lanktañanacap apakañataqui,

2. Janitejj Diosan Chitapatac chuymanacapar kalarayapcaraquinejja, jupanacajj awquiman sarakerip taypin jaqhutäpjjaniwa; jïsa, Israelan utapamp chic jaqhutäpjjaniwa, wiñayataquiw arsut orakjjan qhuyapayat jakenacäpjjani; janiraquiw wasitat catuntäwir anaquitäpcaniti; Israelan utapasti janiw wasitat pejjtuntatäcaniti.

3. Jaken almanacap mankhapachar irpañatac supayampin wawanacapampin ut-tʼayatäqui uca jachʼa ajjtcañ tamajj allquejja, jakenacatac uca jachʼa pʼiyajja, jïsa, uca jachʼa pʼiya, cunatejj jakenacar tucqhañatac allitäqui ucanjja phokhäpjjaniw uc allirinacajja, jupanacan kʼal tucusitäñapcama –siw Diosan Chitapajja. Ucasti janiw alman tucusiñapa, sañ munquiti. Uca jan tucusir mankhapachar almajj jakontasisp ucqhaquïspawa.

4. Cunalaycutejja, ucajj supayan catuntäwiparjamawa, Diosan asqui taripäwiparjamaraquiwa, take qhititejj jupan nayrakatapan ñankha ajjtcañ luräwinac lurapqui ucanacataquejja.

5. Ucatsti qhitajj naya Nefiruw aqhäm sas parlitu: Jumajj uñj-jjtawa, gentilenacatejj Diosar cutiquipstapjjanejja, jupanacataquejj take cunas waliquïscaniwa. Ucatsti yatjjaractawa cawquïr arusjäwinactejj Tatitojj Israelan utapampejj lurcän ucanacjjata. Istʼjjaractawa, qhitinacatejj juchanacat jan cutiquipstapcan ucanacajja, tucusipjjaniwa.

6. Ucalaycu, ay gentilenaca, jupanacatejj Diosan Chitapatac chuymanacap kalaptayapcan ucanacata!

7. Cunalaycutejja, cunüruntejj nayajj mä jachʼa muspharcañ luräw jaken wawanacap taypin lurcä ucürojj purininiwa –siw Diosan Chitapajja; ucasti mä jan tucusir luräwiwa, mä cunataquisa jan ucajj yakha cunataquisa, jupanacan sumancañapatac wiñay jacañanïñapatac amuyayañataquiwa, jan ucajj jupanacan chuymap kalarayañataqui amuyunacapan juyqhuptañapataquisa, catuntäwit catuntäwir puriyatäñapcama, uqhämaraqui, janchinacapans ajayunacapans tʼunjatäñaparu, parlctsa uca supayan catuntäwiparjamaraqui.

8. Ucatsti allajjpach qhitajj uca arunac parljjayasinjja, nayaruw jisctʼitu: Amtastati cuna arusjäwinactejj Awquejj Israelan utapamp lurqui ucatjja? –sasa. Nayasti juparojja, jïsa –sistwa.

9. Ucat jupajj saraquitu: Uñtam, ajjtcañanacan taycapäquis uca jachʼa ajjtcañ tamaru, ucan takanapajj supayawa.

10. Ucjjarojj sascaquituwa: Uñjam, pä tamaquiw utji: Mayajj Diosan Chitapan tamapawa, yakhasti supayan tamaparaqui; uqhämasti qhitinacatejj Diosan Chitapan jan tamapancapqui ucanacajja, ajjtcañ taman taycapäquis uca jachʼa tamancapjjewa; ucasti orakpachan kʼañusir warmipawa.

11. Ucatsti uñtasajja, take orakpachan kʼañusir warmiparuw uñjta. Juparusti walja umanacjjan kontʼatäsquir uñjta, take orakjjar chʼamaniraquïnwa, take orakenac taypina, familianac taypina, lajjranacampin marcanacampin taypipanaraqui.

12. Ucatsti Diosan Chitapan tamaparuw uñjaracta. Ucanquirinacasti jucʼaniquïnwa, walja umanacjjan kontʼatäcän uca kʼañusir warmin ñankha luratanacap laycu, ajjtcañanac luratap laycuraqui. Ucampis Chitan tamapan take orakjjan saratatatäsquir uñjaracta; ucanacasti Diosan kollananacapawa. Jupanacan orakjjan chʼamanïtapajj jucʼaquïnwa, uñjctsa uca kʼañusir warmin ñankha luratanacap laycu.

13. Ucatsti uca ajjtcañanacan jachʼa taycaparuw uñjta, ucasti waltʼat jake tamanac take gentilenacan orakenacap taypin tant-thapïna, Diosan Chitapar nuwasiñatac saytʼasiñataqui.

14. Ucatsti naya Nefejja, Diosan Chitapan chʼamapaniw Chitan tamapan kollan jakenacapjjar sarakanir uñjta, uqhämaraqui Tatitump arustʼapcän uca jakenacjjar sarakasquiri, qhitinacatejj take acapach orakjjar chʼeketatatäpcänsa ucanacjjaru. Jupanacasti nuwasiñataquejj asqui cancañanïpjjänwa, Diosan khapak cancañ chʼamapanïpjjaraquïnwa.

15. Ucatsti uca jachʼa ajjtcañ tamjjar Diosan colerasiñapan sarakanir uñjta; ucat nuwasiñanacamp chʼajjwanacjjat parlirinacampiw utjäna, take acapach orakenquir marcanac taypina, familianac taypinsa.

16. Ucatsti ajjtcañanacan taycapancapqui take uca orakenac taypinjja, nuwasïwinacamp chʼajjwanacat parlirinacamp kalltcän ucqhajja, alajjpach qhitajj aqhäm sasaw parlitu: Uñjam, Diosan colerasiñapajj kʼañusir warminacan taycapjjanquiwa. Acajjay jumajja, take ucanac uñjtajja.

17. Ucatsti cunürutejj Diosan colerasiñapajj kʼañusir warminacan taycapjjar purincan ucqhajja, ucajj take orakjjanquir jachʼa ajjtcañ iglesiawa, ucan takanapasti supayawa. Uqhämasti, ucüruw Awquejj luräwip kalltani cawquïr arusjäwinactejj marcapamp lurcän ucanacan phokhasiñapataqui. Uca marcasti Israelan utapawa.

18. Ucatsti qhitajj: Uñtam –sasaw situ.

19. Nayasti iyaw sasaw uñt-ta, ucat mä jankʼo isimpi istʼat jakeruw uñjta.

20. Qhitasti situwa: Ucajj Chitan tunca payan apostolopat maynïriwa.

21. Take cunanactejj jichhat ucsarojj uñjcät ucanac jupajj kellkani. Jïsa, walja cunanacatejj niy lurascjje ucanac kellkaraquini.

22. Jupasti acapach oraken tucusiñapjjat kellkaraquini.

23. Ucalaycu, cuntejj jupajj kellkcani ucanacajj chekapawa chekaraquiwa. Ucanacasti mä judion lacapat mistur uñjctas uca libron kellkatawa. Cunapachatejj ucanacajj mä judion lacapat mistcänjja, jan ucajja, judion lacapat kellkatajj mistcän ucqhajja, kellkatäcän ucanacajj khanänwa, chekpacharaquïnwa, sinti sumänwa, amuyañjamaraquïnwa, take jakenacataqui.

24. Ucatsti cunanactejj Chitan apostolopajj kellkcan ucanacatjj niy waljanac uñj-jjtajja. Jichhasti, janïr uñjctas ucanac uñjaraquïta.

25. Ucampis jichhat ucsar uñjcät ucanacjj janiw kellkcätati, cunalaycutejj Dios Tatitojj Diosan Chitapan apostoloparuw jupar ut-tʼayi ucanac kellkañapataqui.

26. Yakhanacajj utjaraquiwa, qhitinacarutejj Tatitojj take acanac uñachaycäna ucat kellkapcaraquïna; ucanacasti Chitan cheka cancañaparjam imantatänwa, Israelan utapar jan camächtʼat uñstañapataqui, Tatitun quicpa waquisir pachapana.

27. Naya Nefisti istʼtwa ircataractwa, Chitan apostolopan sutipajj Juan satänwa, ucasti qhitan aruparjamawa.

28. Ucapachat ucsaruw uñjta istʼcaract ucanac jan kellkañajjataquiw naya Nefejj camächit catokta. Ucat niy kellkcta ucajj ucqhaquëjje, uñjcäyät ucanacat mä jucʼac kellkcasasa.

29. Cunanactejj awquijjajj uñjcän ucanac uñjatajjat ircat-ta. Tatitun qhitapaw ucanacjj uñachayitu.

30. Jichhasti, Ajayun apatäcäyät ucapach uñjcäyät ucanacjjat kellkañ tucuyjjtwa. Take cuntejj uñjcta ucanacatejj takpach jan kellkatäc-chejja, cunanactejj kellkcta take ucanacajj chekawa. Uqhamäscapuniwa. Uqhamäpan.