1. Ucatsti Tatitojj camächit churitu; ucat nayajj metalan kalanacat tʼalpha lekʼetanac lurta, ucanacjjar marcajjan sarnakäwipat uchañajjataqui. Lurcäyäts uca tʼalpha lekʼetanacaruw awquijjan kellkatap ucharacta, uqhämaraqui wasaran saräwinacajjata, awquijjan jutir urunacat yatiyäwinacapsa. Ucatsti walja jutir urunacat nayan quicpa yatiyäwinacajj ucanacjjar ucharacta.

2. Cunapachatejj ucanac lurcäyät ucapachajja, janiw aquïr tʼalpha lekʼetanac lurañajjatac Tatitut camäch catokañ yatcäyät-ti. Ucat awquijjan kellkatapampi, awquinacapan sutinacap kellkatampi, wasaran lurapcäyät ucanacat jilpachaw kellkasi; cuna tʼalpha lekʼetanacat-tejj niy parlcta ucanacjjaru. Ucat chekpachan aquïr tʼalpha lekʼetanac janïr lurcäyät ucapach lurascän uca sarnakäwinacajja, nayrïr tʼalpha lekʼetanacan jucʼamp kellkata.

3. Ucatsti aca tʼalpha lekʼetanac camächitarjam luratajj khepatsti, naya Nefejja, camächit catokta ucar kellkañajjataqui; kollan luräwinacata, cunatejj jutir urunacan lurascan uca arjäwinacata. Ucanacsti suma khanäqui muncayäcarac ucjjat kellkañajjataquiw camächit catokaracta. Cunanacatejj ucan kellkatäcän ucanacajj marcajjar yatichañatac imasiñapataqui, cawquïr jakenacatejj aca orak catupcan ucanacataquiraqui. Uqhämaraqui, Tatitun yatitäqui uca chʼiqhi amtäwinacapataqui.

4. Ucat naya Nefejj yakha tʼalpha lekʼetanacjjaruw kellkta. Ucan jucʼamp phokhatpach yatiyi marcajjan nuwasïwinacapjjata, chʼajjwäwinacapjjata, tʼunjäwinacapjjataraqui. Ucat ucjj lurta, marcajjarusti maytwa, cuntejj jiwatajj khepat lurañapäcan uca. Uca camächitasti siwa: Aca tʼalpha lekʼetanacajj mitat mitaru, jan ucajja, arjirit arjiriru churatäñapataqui, Tatitojj yakha camächit churcan ucapachcama.

5. Aca tʼalpha lekʼetanacjj cunjämats lurtjja uc kheparojj kellkä. Ucampis jichhajja, niy sisctsa ucarjamaw kellkascaquï. Ucjj lurtwa kollan yänacan jucʼamp imatäñapataqui, marcajjan yatiñapataquiraqui.

6. Ucampis janiw alek cuns aca tʼalpha lekʼetanacarojj kellkcti jan ucasti, cunatejj amuyujjarjamajj kollanäqui ucac kellkta. Jichhasti, nayatejj pantjastjja, nayrapachanquirinacajj uqhäm pantjasipjjaraquïnwa. Janiw mayninacan pantjasitap laycojj kʼom mistuñ munquirist-ti. Ucampis nayan utjquitus uca tʼuqhasïwijj laycuw uqhäm sista.

7. Cunalaycutejj cunanacatejj yakhep jakenacataquejj janchitaquis ajayutaquis wali yäkatjamäqui ucanacajja, yakhepanacataquejj ucanacajj janis cunäcaspas uqhäm amuyapjje, ucat ucanacarojj cayunacapampis takjjatapcaspajj uqhäm lurapjje. Jïsa, quicpa Israelan Diosaparuw jakenacajj cayunacapamp takjjatapcaspas uqhäm lurapjje. Cunats cayunacapamp takjjatapcaspajj uqhäm lurapjje, sistjja? Jupajj janis cunäcaspas uqhäm amuyapjje, janiraquiw ewjjanacapan arupar yäkapquiti.

8. Ucampis jupajj jutaniwa, Diosan qhitapan arunacaparjamajja, Jerusalenat awquijjan mistunitap sojjta patac mar khepata.

9. Orakenquirinacasti juparojj taripapjjaniwa, janis jupajj cunataquïcaspajj uqhäma, jupanacan ñankhätap laycu. Ucat jupanacajj jupar asutʼini. Jupasti asutʼiyasiquiniwa; jawkʼjjaniwa, jupasti amuquiw mutuni. Jïsa, jupanacajj thuscatapjjaniwa, jupasti amuquiw tʼakhesini, jachʼa munasiñanïtap laycu, jakenacan wawanacapatac pʼek chʼoktʼasirïtap laycuraqui.

10. Egipto sat oraketa, catuntäwit irpsutäpcänsa uca lakʼa achilanacajjan Diosapasti, wasaran imatäpcänsa ucanacan Diosapasti, jïsa, Abrahanan Isaacan Jacobon Diosapajja, jupa quipcaw mä jakjjam catuyasi qhitan arunacaparjamajja, ñankha jakenacan amparanacaparu jupan aytatäñapataqui, Zenocan arunacaparjamasti, cruzjjar chʼac-catatäñapataquiraqui, Neuman arunacaparjamasti mä sepulturar imantatäñapataqui, Zenosan arunacaparjamajja, jupajj quimsa chʼamac urut parli. Uca quimsa urusti jiwañapat lamar islanacan utjasirinacatac mä unañchawïñapataqui, uca unañchäwisti Israelan utapat sarakerinacatac jucʼampïñapataqui.

11. Cunalaycutejj Diosan arjiripajj aqhäm parläna: Dios Tatitojj chekpachaw take Israelan utapar ucürunjj tumpani; yakhepanacajj arupampiw tumpani, asquïtap laycu, jupanacan sint cusisiñapataqui khespiyasiñapataquiraqui. Yakhepanacarusti tumpaniwa, chʼamapan khejjokhejjonacapampi, llijullijunacapampi, jachʼa chʼamaca jallunacampi, ninampi, jewkʼempi, chʼamac urpumpi, orak jistʼartäwinacampi, jachʼa kollunacan chhaktäwipampi.

12. Take ucanacajj chekpachapuniw purinini –siw Zenos arjirejja. Orakenquir karkanacajj jaljtaniwa. Oraken aykoñanacap laycusti, lamar islanacan utjir pʼekechirinacajja, Diosan Ajayupïpan jachʼat arsuñatac waytʼatäpjjaniwa: Alajjpachan acapachan Diosapaw mutusqui! –sasa.

13. Jerusalenanquirinacasti take marcanacan jawkʼatäpjjani –siw arjirejja, cunalaycutejj jupanacajj Israelan Diosaparuw cruzar chʼac-catapjje, janiw chuymanacapar catokañ munapquiti, unañchanacapar muspharcañ luräwinacapar ina pampar tucuyasa, Israelan Diosapan chʼamapampir khapak cancañapampir jan catokasaraqui.

14. Chuymanacap jistʼantatap laycusti –siw arjirejja, uqhämarac Israelan Kollanapar uñisitap laycojja, janchi token muyupjjani tucusipjjaraquini. Mä ajjtcañjam ñankha arjamaw tucupjjani, take marcanac taypin uñisitäpjjaraquini –saraquiw arjirejja.

15. Ucampis jupanacajj Israelan Kollanapatac jan jucʼamp chuymanacap jistʼantcan ucürojj purcan ucapachajja, Tatitojj lakʼa achilanacapamp lurcän uca arusjäwinacat amtasini –siw arjirejja.

16. Jïsa, ucapachaw jupajj lamaran utjir islanacat amtasini. Jïsa, Israelan takpach utapanquir jakenacaruw pusi thiyatpach mayar apthapï –siw Tatitojja, Zenos sat Diosan arjiripan arunacaparjamajja.

17. Jïsa, take acapach orakew Tatitun khespiyäwip uñjani –siw arjirejja. Take orake, familia, lajjra, marcaw qhuyapayatäni.

18. Naya Nefiw acanacjj marcajjatac kellkta, inach Khespiyir Tatitupat aca arunacajj cunjämats amtasiyaspa.

19. Uqhämasti, Israelan takpach utaparuw parlta, inachay jupanacajj acanac catokapjjaspa.

20. Acajj Jerusalenan kheparapqui ucanacat ajayujjajj chʼalljjtayasi. Ucasti walpun llaquisiyitu, chʼam thayjtayaraquitu tawanacajjan jan chʼamanïñapcama. Janitejj Tatitojj qhuyapayasiñapan jupanacjjat jan uñachayquitasapänjja, cunjämtejj nayra arjirinacajj uñachaycän uqhämjja, nayajj jiwaraquiriscäyätwa.

21. Cunalaycutejj chekpachan jupajj nayra arjirinacaruw jupanacjjat take cunanac uñachayäna, jupanacat waljaniruraquiw nanacjjat uñachayaraquïna. Ucat waquisi jupanacjjat yatiñajja, cunalaycutejj tʼalpha lekʼetanacjjar kellkatawa.

22. Ucatsti naya Nefejja, ucanac jilanacajjarojj yatichta. Ucatsti bronce tʼalpha lekʼetanacjjar kellkatäc ucat waljanac jupanacatac leetʼarapta, cunjämtejj Tatitojj nayra pachan yakha orakenacan utjir marcanacataqejj lurcän ucjjat yatipjjañapataqui.

23. Ucatsti Moisesan kellkatapan kellkatäqui ucanacat waljanac jupanacatac leetʼarapiracta. Khespiyir Tatitupar jucʼamp iyawsañapatac amuyayañataqui, cuntejj Isaias sat Diosan arjiripajj kellkcän ucanac jupanacatac leetʼta, cunalaycutejj kellkatanacjja, nanac pachpataquiw khanañchta, nanacan asquijjataqui yatekañajjataquiraqui.

24. Ucat jupanacar sista: Arjirin arunacap istʼapjjam, juma Israelan utapat jiltʼirinaca, cunalaycutejj mä khakhakat laymïpjjtanwa. Arjirin arunacap istʼapjjam, ucajj Israelan takpach utapar kellkatawa. Ucanacsti jumanac pachpa amuyasiñataquïpan ucanac toke suytʼañanïpjjañamataqui, uqhämarac qhitinacat-tejj khakhakatäpcta uca jilanacamasa, cunalaycutejj uqhäm arjirejj kellke.