1. Ucatsti jilanacajjaru aqham sasaw arjjäyäta: Wasitat Jerusalenaru maqhatapjjañäni; iyawsasajja Tatitun camachitanacap phokhapjjaraquiñäni. Jupajj take oraketa jucʼampi chʼamaniwa, ucatsti cunats Labanan pheska tuncapatsipan jan chʼamani, jisa, jupan tunca warankanacapatsipansa?

2. Ucatwa maqhatapjjañäniwa. Moisesjam chʼamanïpjjañäni, cunalaycutejj chekpachaw jupajj Wila lamara umanacaru arsüna, umanacasti ucsar acsar jaljtapjjaraquïna; awquinacasasti maysat maysaru waña orakenjam catuntatäwipat jaltanipjjäna. Faraonan nuwasir tamanacapasti arctapjjaraquïna; Wila lamara umanacansti ajjscatapjjaraquïna.

3. Jichhasti, jumanacajj ucan chekätapjj yatipjjtawa. Mä alajjpach qhitan jumanacaru arjjayatap yatipjjaracta. Cunjams pächasipjjasma? Jïna, maqhatapjjañäni, camisatejj Tatitojj awquinacasaru khespiycänjja uqham jiwasanacaru khespiyañataquejja chʼamaniwa, uqhamaraqui, egiptonquirinacaru lurcän uqham Labanar jiwayañatac chʼamaniraqui.

4. Uca arunacjj arscäyät uqhajja jupanacajj colerasipcaquïnwa, thuthusisipcaquïnwa. Ucampisa nayaru arcapjjetäna Jerusalenan anka perkanacaparu puriñcama.

5. Ucatsti arumäjjänwa, nayasti jupanacaru säyätwa ankajj perkanacaru imantasiñapataqui. Jupanacan imantasitanacap khepatjja, naya Nefejja marcaru lluscuntäyäta, sarascaquïyäta Labanan utap tokeru.

6. Nayasti Ajayun irpatäyätwa, jan nayrajj yatisinjja cuntejj lurañajjäcänsa ucanacjja.

7. Ucampis sarascaquïyäta, ucat Labanan utaparu jacʼachasajja mä jakeruw uñjäyäta. Jupasti nayrakatajjana oraken liwisitäna, vinomp machatapata.

8. Jupjjaru purisina, jupan Labanätap amuyäyätwa.

9. Espadapar uñjaraquïyäta, ucat espadan lluchʼuntañ jirupat sicsüyäta. Catuñapasti koritcam luratäna; sinti qhusa lekʼsutaraquïna; cuchil jirupan sinti qhustʼata chʼollkhe jirut luratapjj uñjaraquïyäta, yakha chʼollkhe jirunacatsipana.

10. Ucatsti Ajayojj nayan Labanaru jiwayañajjataqui eojjetäna, ucampis chuymajjan säyät nayajja: Janipiniw cunapachas nayajj jaken wilap wartcti. Ajjsararaquïyätwa. Janiraquiw juparu jiwayañ muncaraquïyätti.

11. Ucat Ajayojj wastat nayaru sitäna: Tatituw amparanacamaru jupjj catuytam sasina. Nayajja jupan nayaru jiwayañ chʼamtʼatapjj yatiraquïyätwa. Jisa, jupajj janiw Tatitun camachitanacaparu yäkcaraquïnti, nanacan yänacajj jupajj apakapjjaraquitäna.

12. Ucatsti Ajayojj wastat nayar sitänjja: Juparu jiwayam. Tatitojj amparanacamaruw catuytamjja.

13. Jupan asqui munañanacap camachayañataquejja Tatitojj ñankha jakenacaru jiwayi. Mä jaken jiwañapajj jucʼamp sumawa, mä marcan jan iyawsasa tʼuqhartañapat tucusiñapatsipana.

14. Ucatsti naya Nefejja uca arunacjj istʼasina, amtaraquïyätjja cuna arunactejj Tatitojj wasarana nayaru arsquitänjja, sasina: Jathanacaman camachitanacajjar phokhataparjamawa, jupanacajj arsuta orakenjj jachʼaptapjjani.

15. Jisa, nayajj lupʼiraquïyätwa, janitejj jupanacajj leyinïpcaspajja jupanacajj janiw Tatitun camachitanacapjj Moisesan leyiparjam phokhapcaspati.

16. Yatiraquïqätwa, leyejja uca tʼalpha kʼellu alquimia lekʼetanacjjaru kellkantatänwa.

17. Uqhamaraqui, Tatitun nayan amparanacajjaru Labanar catuyatap yatiraquïyätwa nayan camachitanacaparjam kellkatanac catuñajjataqui.

18. Ucat Ajayun aruparu jaysäyätwa; Labanar ñicʼutapat catusina, quipca espadapamp pʼekepjj qharekaraquïyätwa.

19. Quipca espadapamp pʼekep qharekatajjatjja, Labanan isinacapjj catüyätwa, nayan quipca janchejjaruw uscusiraquïyätjja, jisa, takpach isinacapjja. Jupan nuwasiñ wacʼapampisti wacʼatasiraquïyätwa.

20. Ucjj luratajj khepatjja cawqhantejj Labanan imantäwipan uc saräyäta. Ucatsti Labanan imantäwip utjcänsa uc sarasajj Labanan lokeriparuw uñjäyäta. Jupasti uca imantäwin llavenacap catüna. Labanan quipca arupamp juparu arjjayta nayamp chic imantäwiru mantañapataqui.

21. Nayajj Laban sat patronapäquiristsa uqham jupajj amuyäna, cunalaycutejj isjja uqhamaraqui nayar uchtʼata espadjj uñjäna.

22. Jupajj Laban patronapan judionacan jilïrinacapampi uca arumana chicatapjja yatisina, nayaru jupanacjjat arjjayitäna.

23. Nayasti juparu arsuraquïyätwa, nayajj Labanäquirists uqhama.

24. Juparu saraquïyätwa, nayajj tʼalpha kʼellu alquimia lekʼetanacjjar kellkantatanacjj jilïri jilanacajjaru apañajjawa. Jupanacasti perkanacat ankancapjjewa sasina.

25. Juparojj eojjaraquïyätwa nayaru arcañapataqui.

26. Nayajj Diosan iyawsiri tamapan jilïrinacjjat arsquirists, uqhamaraqui nayajj jiwayctjja chekpach uca Labanäquiristsa, cawquïrtejj jiwaycta, uqham jupajj amuyasinjja nayaru arquitäna.

27. Nayajj perkanac ankancasquiri jilanacajjan uc sarcäyät ucchañcamajja jupajj walja cutiw judionacan jilïrinacapjjat nayaru arjjayitänjja.

28. Ucatsti Lamanajj Lemuelamp Samampejj nayaru uñjasinjja walpin ajjsarapjjäna. Jupanacasti nayat jaltapjjaraquïna, nayajj Labanäquirists uqham amuyasitap laycu. Uqhamaraqui jupajj nayaru jiwaycaspas jupanacan jacañap apakañ muncaraquïspas uqham amuyapjjaraquïna.

29. Ucatsti jupanacaru artʼäyäta; jupanacasti istʼapjjaraquitänwa. Ucatjja janiw jucʼamp nayat jaltapcänti.

30. Ucatsti, Labanan lokeripajj jilanacajjaru uñjasinjja, qhathatiñ kalltäna, nayan ucjjat jaltirjamaraquïnwa, Jerusalen marcaru cutirjamaraquïna.

31. Ucatjja naya Nefejj jachʼa tansa jakësina, Tatitut walja chʼamjj catokasina, Labanan lokerip catüyätwa, khomthapiraquïyätwa, jupan jan jaltañapataqui.

32. Ucat jupampi parläyäta: Jumatejj arunacajjaru yäkätajja, Tatitojj chekpachaw jacquejja nayast jaccaracta uqham chekpachaw sisma, jumatejj nanacan arunacajjaru chekpach yäkätajja, janiw jacañam apakapcämati sasina.

33. Nayajj mä juräwimpisa juparu arsüyäta, jupan jan ajjsarañapataqui, jupan nanacjam antutat jakëñapataqui, jupatejja chʼusa wasararu nanacamp sarakcaspajj uqhajja.

34. Juparu arsuraquïyätjja sasina: Chekpachaw Tatitojj ucji lurapjjañajjataqui camachit churapjjetu. Janit nanacajj chekapäpcäjja Tatitun camachitanacap imañataquejja? Ucatwa, jumatejj wasarar sarakätajja awquejjan ucaru, mä chekajj jumataquiw utjani, nanacamp chica.

35. Ucatsti arscäyätjja uca arunacajjat Zoramajj kamas catüna. Zoramasti uca lokerin sutipäna. Jupasti arsünwa wasararu sarakañapataqui awquejjan ucaru. Mä juräwi nanacamp luraraquïna, ucapachat ucsarojja jupan nanacamp kheparañapataqui.

36. Nanacasti jupan nanacampi kamasiñapjja munapjjäyätwa judionacan nanacan wasarar jaltatajjat jan yatiñapataqui, jupanacan jan nanacaru arctasa jiwarayañapataqui.

37. Ucatsti Zoramajj nanacamp juräwi lurcänjj ucapachatjja janiw jucʼampi jupat ajjsarapcäyätti.

38. Ucat tʼalpha kʼellu alquimia lekʼetanacjj apasinjja, Labanan lokerip irpasinsa, wasararu mistupjjäyätwa awquejjan chʼujllaparu sarapjjaraquïyäta.