1. Ucatsti, ajayun apatäsin take ucanac uñjatajjat khepatjja, naya Nefejj awquijjan chʼujllaparuw cut-täyäta.

2. Ucatsti, awquijjajj jilanacajjar parlcän ucanacjjat jupanac pur chʼajjwasquir uñjta.

3. Cunalaycutejj jupajj chekpachan take cunat sipan jachʼäquis ucanacat jupanacar parläna; ucanacasti amuyañataquejj chʼamänwa, janitejj ucanacjjat Tatitur jisctʼañatac alcatapcasp ucajja. Jupanacasti kalarat chuymanïsinjja janiw Tatiturojj alcatapcänti, cunjämtejj lurapjjañapäcän uqhäma.

4. Naya Nefisti, jupanacan chuymapan kalätap laycu, uqhämaraqui uñjcäyät ucanacatjj wal llaquisïyäta, cunalaycutejj yatïyätwa, uñjcäyäts ucanacan phokhasiñapa, jaken wawanacapan ñankhamp atipjayasipjjatap laycu.

5. Ucatsti llaquinacajjamp atipjataw uñjasiscäyäta, cunalaycutejj nayan llaquinacajjan take yakhanacat sipan jachʼäcaspas uqhäm amuyäyäta, marcajjan tʼunjatäñanacap yatisina, tincüwip uñjasinaraqui.

6. Ucatsti chʼam catjjatasin jilanacajjar parljjayta, cunat-tejj chʼajjwapcän uc yatiñ munasa.

7. Jupanacasti sänwa: cuntejj Awquisajj olivon cheka layminacapjjat parlqui ucanacajj janiw amuyañjamäquiti, gentilenacjjat parlqui ucas amuyañjamäcaraquiti.

8. Nayasti jupanacarojj sistwa: Tatitur ucanacjjat jisctʼasipjjtati?

9. Jupanacasti nayarojj sapjjetuwa: Janiwa, Tatitojj janiw uqhämanacjj nanacar yatiyapquituti.

10. Ucat nayajj jupanacar sista: Cunjämarac Tatitun camächitanacapsti jan phokhapjjtasti? Cunjämarac chuymanacaman kalätap laycust tucusiñ munapjjtasti?

11. Cuntejj Tatitojj sisqui ucsti, janit amtapctasti? Jumanacatejj chuymanacam jan kalaptayapcäta ucat nayar iyawsañamp mayisipquitäta, catokañatac iyawsasajja, camächitanacajj chʼamachasis phokhasajja, ucanacajj chekpachan jumanacarojj yatiyatäniwa.

12. Acajj sapjjsmawa: Israelan utapajja, awquinacasampïcän uca Tatitun Ajayup tokew olivo alimp uñtasiyata; jichhasti, janit jiwasast Israelan utapat khakhakatäpctansti? Janit jiwasajj Israelan utapan mä laymipäpctanjja?

13. Uqhämasti, awquisajj chekpach layminac wastat alcatayañat parlasajja, aqhäm sañ muni: Phokhatpach gentilenac toket khep khepürunacanjja, cunapachatejj sarakerinacasajj jan iyawsir tucupcani, jïsa, walja maranacataqui, uqhämaraqui Mesiasajj jaken wawanacapar janchit uñstcani ucat walja mitanac khepatjja, ucapachaw Mesiasan phokhatpach evangeliopajj gentilenacatac jutani. Ucatsti gentilenacat jiwasan sarakerinacasat jiltʼirinacarojj jutaraquini.

14. Ucürun jiwasanacan sarakerisat jiltʼirinacajj yatjjapjjani Israelan utapat jupanacan sarakerïtapa, Tatitun arusjäwi toke marcapätapa. Uqhämasti jupanacajj qhitinacäquitejj lakʼa achilanacapajj uc yatipjjani, ucatsti Khespiyiripan evangeliop uñtʼapjjani, cuntejj jupajj lakʼa achilanacapar churcän uca. Ucat jupanacajj Khespiyiripat yatipjjani, jupan cheka yatichäwinacapata, cunjämatejj jupar jutañäqui ucat khespiyasiñäc uc yatipjjañapataquiraqui.

15. Uqhämasti, ucürun janit jupanacast wal cusisipcani? Janit jupanacan wiñay Awquiparu, Karkaparu, Khespiyäwipar jachʼar aptapcani? Jïsa, janit ucürun jupanacajj chʼamsa mankʼsa cheka alit catokapcani? Jïsa, janit jupanacajj Diosan cheka tamapar mantapcani?

16. Acajj nayaw sapjjsma: Jïsa, uqhämäniwa –sasa. Wasitat Israelan utap taypin amtatäpjjani. Jupanacajj olivo alin cheka laymipäsinjja, wasitat cheka olivo alir alcatayatäpjjani.

17. Awquisajj uqhäm sañ muni; take ucanacajj janiw purincaniti, gentilenacamp chʼeketatayatäpcän ucapachcamajja; ucasti gentilenac tokew ucanacajj purinini, gentilenacar Tatitun chʼamap uñachayañapataqui. Ucjj luraniw jupajja, cunalaycutejj judionac toketjja, janiw catokatäcaniti, jan ucajj Israelan utapampisa.

18. Ucat awquisajj jiwasan sarakerisatac jan parlquiti, jan ucasti takpach Israelan utapat parlaraqui; cuna arusjäwitejj khep khepürunacan phokhascani ucjj uñachayasaraqui. Uca arusjäwsti Tatitojj Abrahan awquisampiw luräna, aqhäm sasa: Juman sarakeriman take acapach orakenquir familianacajj bendicitäni.

19. Ucatsti naya Nefejja, walpun ucanacjjat jupanacar parljjayta; jïsa, judionacan khep khepürunacan nayrapachjamar cut-tayatäñapjjat parljjayaracta.

20. Judionacana, jan ucajj Israelan utapan nayra pachjamar cut-tayatäñapjjat parlcänjja, uca Isaiasan arunacap jupanacatac wasitat arsurapta. Jupanacar cutjtayatäñap khepatsti, janiw wastat jupanacajj pejjtuntatäpcaspati, chʼeketatayatäpcaraquispasa. Ucatsti nayajj walja jucʼampinac jilanacajjar parljjayta, jupanacan sumaptañapcama, Tatit nayrakatan llampʼuptañapcamaraqui.

21. Ucatsti jupanacajj wastat nayar parlapjjetu, aqhäm sasa: Awquisajj samcan uñjqui ucajj cuns sañ muni? Samcan uñjquis uca kokajj camsañs munaraqui?

22. Nayasti jupanacarojj saractwa: Ucajj jacañ kokat amtayañataquiwa.

23. Jupanacasti sapjjaraquituwa: Awquisajj uñjqui uca alir sarir jiru lawajj camsañs munaraqui?

24. Nayasti jupanacarojj sistwa: Ucajj Diosan arupar uñtasitawa; qhititejj Diosan arupar istʼcaspa, ucjjar chʼamamp catuntasinejja, janipiniw cunapachas tucuscaniti, janiraquiw timan yantʼäwinacapasa, nina naqhir michʼinacapas jupanacjjar juyqhuptayas atipapcaniti. Janiraquiw tʼunjañ tokerus irpcaraquiniti.

25. Ucat naya Nefejja, jupanacarojj ewjjta Tatitun arupar yäkañanacapataqui; jïsa, kawkhatejj chuymajjan chʼamajj utjcän ucampiw jupanacar ewjjta, Diosan arupar jupanacan yäkañanacapataqui, jupan camächitanacapar jan karjasis take cunan phokhañ amtasiñanacapataqui.

26. Jupanacasti nayarojj sapjjetuwa: Cuna uma jawirtejj awquisajj samcan uñjcän ucajja, camsañs muni? –sasa.

27. Nayasti jupanacarojj saractwa: Awquisajj uñjcän uca umajja, kʼañu cancañar uñtasitawa. Awquisan amuyupajj yakha cunaymaninac laycu llactʼatänwa. Ucat uman ajjtcañ kʼañütapjj jan amuycänti.

28. Nayajj jupanacar saractwa: Mä ajjsarcañ pʼiyänwa, ucasti ñankha jakenacarojj jacañ kokat jarcʼakäna, Diosan kollananacapat jarcʼakaraquïna.

29. Jupanacarojj saractwa: Ucajj ajjsarcañ mankhapachar uñtasitawa. Ucasti ñankha jakenacatac waquichatätap Diosan qhitapajj yatiyitu.

30. Ucatsti jupanacarojj sascactwa: Diosan chekapar uñjañapajj ñankha jakenac asqui jakenacat jaljtayäna, uc awquisajj uñjaraquïna. Chekapar uñjañapan cʼajcañapasti, nina lawrjamaw wiñayatac Diosar maqhati, ucasti jan tucuyaniraquiwa.

31. Jupanacasti nayarojj aqhäm sasaw jisctʼapjjetu: Ucajj yantʼa urunacan janchi mutüwir uñtasitati? Jan ucajj janchin jiwatap khepat alman khepïr utjäwipamp sasicha? Jan ucajj acapachanquir yänacjjatch parli?

32. Ucat nayajj jupanacar sista: Ucajj tucusir yänacampir uqhämarac ajayumpir uñtasitawa, cunalaycutejj urojj purinispawa cunapachatejj jakenacajj luräwinacaparjam taripatäpcaspa, jïsa, yantʼa urunacan tucusir janchin luräwinacaparjama.

33. Uqhämasti, jupanacatejj ñankh luraspach jiwapjjaspajja, jupanacajj ajay yänac tokenjja, jakonucutäpjjaraquispawa, cunalaycutejj ucanacajj asqui cancañanquirïpjjewa; uqhämasti jupanacajj Diosan nayrakatapar uñstapjjañapawa, luräwinacaparjam taripatäñataqui. Luräwinacapatejj kʼañüchejja jupanac quicpajj kʼañüpjjaraquiniwa; kʼañüpjjchi ucasti, janipiniw jupanacajj Diosan khapak marcapan utjapcaspati. Uqhamäspa ucasti, Diosan khapak marcapajj kʼañuraquïspawa.

34. Acajj jumanacaruw sapjjsma: Diosan khapak marcapajj janiw kʼañüquiti, janiraquiw cuna kʼañus ucarojj mantcaspati, ucat mä kʼañu chek waquichañajj waquisi, cunatejj kʼañüc ucataqui.

35. Ucatpí mä chekajj waquichatajja, jïsa, cunjjat-tejj nayajj parlctsa uca ajjsarcañ mankhapacha, ucan ut-tʼayiripasti supayawa. Uqhämasti jakenacan almanacapan khepa utjäwipajj Diosan khapak marcapan kamañawa, jan ucajj ucat jakonucutäña, cuna asqui cancañat-tejj parlcta ucalaycu.

36. Uqhämasti, ñankha jakenacajj asqui jakenacatjj jacäwin tʼakakatäpjjaniwa, uqhämarac kokapata, ucan achupasti take yakha achunacat sipan muncañawa; jïsa, ucajj Diosan take yakha churäwinacapat sipan jucʼamp jachʼawa. Uqhäm nayajj jilanacajjar parljjayta. Uqhamäpan.