1. Ucatsti wasitata chʼusa wasararu sarjjapjjäyäta; ucapachat ucsarojj niyapuni inti jalsu toksaru sarapjjäyäta. Chʼusa wasaranchʼusa wasaranjja wawachasipjjänwa.

2. Tatitun nanacar qhuyapayäwinacapan sinti jachʼätap laycu, nanacajj wasaran chʼoke aychjj mankʼasa jacasipcstsa, warminacajjajj wawanacaparu walja millqʼi ñuñuyapjjäna; chachanacjam chʼamanïpjjaraquïna. Ucapachatjja jupanacasti jan thuthusisaw sarañ kalltapjjäna.

3. Uqham uñjapjjtanwa, Diosan camachitanacapajj phokhatäñapawa. Jaken wawanacapatejj Diosan camachitanacapjj imapquejja, jupaw jupanacaru mankʼayi, chʼam churaraqui, thac churaraquiwa, cuntejj lurañanacapataqui camachit churcänjja ucjj jupanacan phokhañanacapataqui. Ucatwa nanacatac waquiscänsa ucjj churapjjetäna, nanacajj wasaran sarnakapcäyäta ucchañcamajja.

4. Ucancasipcaquïyätwa walja maranacajja. Jisa, quimsakallk maraw wasarancapjjäyäta.

5. Ucatsti mä orakeru puripjjäyäta. Uca orakerusti Jilarquiri sasa sutiñchapjjäyäta, uqhan walja achumpin mamuray misqʼimpin utjatap laycu. Take ucanacasti nanacan jan jiwarañajjataqui Tatitun waquichatänwa. Jachʼa kota lamararuraquiw uñjapjjäyäta, ucarojj Irreantum sasaw sapjjäyäta; uca arusti walja umanaca sañ muni.

6. Ucatsti jachʼa kota lamara lac jacʼana, chʼujllanacajj uttʼayapjjäyäta. Nanacasti walja tʼakhesïwinacampi chʼama luräwinacampi wali mutupcchïyätsa, jisa, take ucanacjj kellkañajjatac jan nanacan chʼam utjañcama, uqham mutupcchïyätsa, jachʼa kota lamara lacaru purisinjja nanacajj sinti cusisipjjäyätwa. Ucaujaruraquiw Jilarquiri sas sapjjäyäta, uqhanjja walja ach achutap laycu.

7. Ucatsti naya Nefi walja urunaca Jilarquiri orakenquipanjja, Tatitun arupajj nayaru purinitäna sasina: Sartam, kolluru saram. Ucatsti nayajj sartasaw, kolluru maqhatäyäta, Tatituru artʼasiraquïyätjja.

8. Ucatsti Tatitojj nayaru arsunitu, sasina: Cunjamatejj nayajj uñachaycämajja uqhamaw mä barc luräta, jakenacamaru uca jachʼa umanac qhurcataru apañajjataqui.

9. Nayasti säyäta: Tata cawqharus metal jicjjatiri saräjja umatatayasa irnakañanac lurañajjataqui, uñachayquistas uqham jachʼa barc lurañataquiraqui?

10. Ucatsti Tatitojj cawqharu sarañajjäcäns uc yatiyitäna metal jicjjatañajjataqui irnakañanac lurañataqui.

11. Ucatsti naya Nefejj lakʼo lipʼichinacata mä phusäñ luräyäta; nina phusäñjj luratajjatjja nina nactayañataqui pä kala lekʼeyätä.

12. Cunalaycutejj uqhacamajja Tatitojj janiw walja nina nanacan utjañap jaytcänti, nanaca wasaran sarapcäyäta ucchañcamajja, jupan acjj satap laycu: Mankʼamjj mojjsaptayäwa, jumanacan jan payañanacamataqui.

13. Nayasti jumanacan khanamäyawa chʼusa wasara taypina. Jumanacatejj camachitanacajj phokhapjjätajja, nayajj thacjj jumanacataqui waquicharapïma; ucatwa camachitanacajj imapjjañamarjamawa arsut oraksaru irpatäpjjätawa; nayan jumanacaru irpatajj yatipjjaraquïtawa.

14. Jisa, Tatitojj saraquïna: Arsut orakeru purisinjja, jumanacajj yatipjjätawa naya Tatitun Diosätajj-jja; naya Tatitun jumanacaru tʼunjatäñat khespiyatajj-jja, jisa, Jerusalen oraketa jumanacaru apsutajj-jj yatipjjätawa.

15. Uca laycojja, naya Nefejj chʼamtʼäyäta Tatitun camachitanacap phokhañataqui, jilanacajjar eojjaraquïyätjja iyawsirïñapataqui chʼamachʼasiñanacapataqui.

16. Ucatsti nayajj kalata umatatayasa apscäyätjja uca metalata irnakañanacjj luräyäta.

17. Jilanacajjasti nayan mä barcjj lurirjamätajj uñjasinjja, nayjjat thuthusiñ kalltapjjänwa, sasa: Jilajjajj tʼajjmarawa; mä jachʼa barcjj lurcaspas uqham amuyasisquiwa. Jisa, aca jachʼa umanacjjaru maqhatcaspas uqham amuyasiscaraquejja.

18. Uqham jilanacajjaw naya tok thuthusipjjäna; janiraquiw irnakañ munapcaraquïnti, nayan barc lurañataqui amuyuns chʼamanïtajjar jan iyawsatap laycu. Janiraquiw nayan Tatitun yatichatätajjar iyawsapcaraquïnti.

19. Ucatsti chuymanacapan chʼollkhëtapata naya Nefejj sinti llaquisïyäta. Ucatsti jupanacajj nay llaquisir uñjasinjja, chuymanacapan cusisipjjäna, nayat wal cusisiñanacapcama; jupanacasti sapjjaraquïna: Barc lurañataqui juman jan chʼamanïtamjj yatipjjtwa nanacajja, juman jan suma amuyunïtam yatitajj laycu. Uca laycusti janiw jumajja mä aqham jachʼa cunjj lurcasmati.

20. Jumajja awquis quipcaquïtawa; jupajj chuymapan jan amuyuni lupʼïwinacapan irpsutawa. Jisa, jupaw Jerusalenatjj jiwasanacaru irpsunipjjestu; jiwasanacasti aca walja maranac chʼusa wasaran sarnakapjjaractan; warminacasasti jachʼa usur jakësinjja irnakapjjäna, wasaran wawachasipjjaraquïna, take cunanacat tʼakhesipjjaraquïna, jiwac jan jiwapcaraquïnti. Jupanacatejj janir Jerusalenat mistcasina jiwapjjasapänjja, ucajj jucʼamp sumäsapänwa jupanacataqui aca tʼakhesïwinac tʼakhesiñatsipana.

21. Jisa, uca walja maranacaw chʼusa wasaran tʼakhesipjjtanjja. Ucampisa janitejj jutapcasänjja, uca maranacanjja yänacasampi tuti churata orakesampi cusisipjjasänwa.

22. Jerusalenanquir jakenacan asqui marcätapjj yatipjjaracta, jupanacan Diosan leyinacapjja, camachinacapjja, take camachitanacapjj Moisesan leyiparjam imatap laycu. Ucatwa jupanacan asqui marcätapjj yatipjjtwa. Awquisasti jupanacaru tariparaquïna, jiwasaru irpsupjjaraquistäna, jiwasan jupan arunacapar yäkatanacas laycu. Jisa, jilasasti jupjamaraquiwa. Uqham arunacampi jilanacajjajj nanaca toke thuthusipjjäna, kʼellisipjjaraquïna.

23. Ucatsti naya Nefejj jupanacaru sasaw arjjäyäta: Israelan wawanacapäcäna uca lakʼa achilanacasajj janitejj Tatitun arunacaparu istʼapcasapänjja, egiptonquirinacan amparapat irpsutäpcasapäns uqham amuyasa iyawsapjjtati?

24. Uqhamaraqui janitejj Tatitojj Moisesaru jupanacar catuntäwita irpsuñapatac camachit churcasapänjja jupanacajj catuntäwit irpsutäpcasapäns uqham amuyapjjasmati?

25. Jichhasti, Israelan wawanacapan catuntäwincatapjj jumanacajj yatipjjtawa; jathi irnakañanacan jupanacar churatätapjj yatipjjaractawa, uca irnakañanacasti sinti chʼamänwa lurañataqui. Ucatwa jupanacan catuntäwit irpsutätapan jupanacataqui sumätapjj yatipjjta.

26. Jichhasti jumanacajj yatipjjtawa, Moisesajj Tatitut camachit catokäna uca jachʼa luräwi lurañataqui. Yatipjjaractawa, jupan arupata Wila lamaran umanacapajj ucsaru acsaru jaljtäna, jupanacasti wañanjam maqhatapjjaraquïna.

27. Ucampis yatipjjaractawa, Faraonan nuwasiri tamanacapäcänjja uca egiptonquirinacajj Wila lamaran ajjscatapjjaraquïna.

28. Yatipjjaractawa, jupanacajj chʼusa wasaranjja mana mankʼayatäpjjäna.

29. Jisa, yatipjjaractawa, Moisesan aruparjama, Diosan jupanquiri chʼamapariama, Moisesajj karkaru jawkʼantäna; ucat karkat umajj jalsünwa, Israelan wawanacapan jan umat pharjayasiñapataqui.

30. Dios Tatitupa jupanacan Cutsuyiripajja jupanac nayrakata saräna; urunacajj jupanacaru irpasa, arumanacajj khanjj churasaraqui, take cunanacatejj jaken catokañapataqui waquisqui, take ucanacjj jupanacataqui lurasaraqui. Ucampisa uqham jupanacajj irpatäpcchïnsa, jupanacajj chuymanacap chʼollkheptayapjjäna, amuyunacapa juyqhuptayapjjaraquïna, ñankha arumpi tokesipjjaraquïna Moisesampiru, cheka jaquiri Diosampiru.

31. Ucatsti jupan aruparjamaw jupanacar tʼunjäna; aruparjamaraqui jupanacaru irpäna; aruparjamaraquiwa take cunanacjj jupanacataqui luräna. Janiraquiw cunasa jan aruparjam luratäcänti.

32. Jupanacan Jordan sat jawira maqhatatap khepatsti jupajj jupanacaru chʼamañchänwa uca oraken wawanacaparu alissuñanacapataqui, jisa, jupanacaru chʼeketatayañanacapataqui tʼunjañcama.

33. Jichhasti, quitinacatejj arsut orakencapcäna, lakʼa achilanacasan alissutäpcäna, uca oraken wawanacapajj asqui jakenacäpcaspas uqham amuyasipjjtat jumanacajja? Nayajj jumanacaru sapjjsma, janiwa.

34. Jupanacatejj asqui jakenacäpjjasapänjja, lakʼa achilanacasajj jupanacatsipan ajllitäpcasapänsa, uqham amuyasipjjtat jumanacajja? Nayajj jumanacaru sapjjsma, janiwa.

35. Tatitojj take jakeru quipcjam muni; qhititejj asquïqui, ucajj Diosan jucʼampi qhuyapayatawa. Ucampis uca marcajja sapa Diosan arupar jaychasis janiw catokapcänti; ñankha cancañampi pokotäpjjaraquïnwa; Diosan phokha colerasiñapajj jupanacjjarünwa. Tatitusti orakeru ñankhacharaquïna jupanac toke, lakʼa achilanacasataqui uc qhuyapayaraquïna. Jisa, jupanac toke uc ñankhachäna jupanacan tʼunjatäñapataqui; lakʼa achilanacasataqui uc qhuyapayaraquïna, jupanacan ucjjar chʼamaniptañanacapataqui.

36. Tatituw oraker luräna jakenacan ucjjar kamañapataqui; wawanacaparu luränwa jupanacan orakenïñanacapataqui.

37. Jupasti mä asqui marca ayti, ñankha marcanac tʼunjaraqui.

38. Asqui jakenacaru irpi qhustʼat orakenacaru. Ñankha jakenacarusti tʼunjaraqui; jupanacataqui orakeru ñankhacharaquiwa.

39. Alajjpach alayanjja jupajj sarayiwa. Ucajj jupan sarayäwi konuñapawa, acapach orakesti jupan cayunacapan jantʼacupawa.

40. Qhitinacatejj jupanacan Diosapatac jupar catokapcani ucanacaruw jupajj muni. Jisa, jupajj lakʼa achilanacasaru munäna; jupanacampi amtäwir mantäna, jisa, Abrahanampi, Isaacampi, Jacobompi. Jupajj lurcäna uca amtäwinacar amtaraquïna; ucatwa egipto sat oraketa jupanacar irpsüna.

41. Jupan lawapampi jupanacar wasaranjj tʼakhesiyas chekaptayäna cunalaycutejj jupanacajj chuymanacap chʼollkheptayapjjäna, cunjamatejj jumanacajj lurapcta uqhama. Jupanacan ñankha luratanacapata Tatitojj jupanacaru tʼakhesiyas chekaptayäna. Jupajja jupanac taypina nina chhekhani nina naqhiri catarinacjja jalanakayäna. Achjatanacap khepatsti, jupanacan cʼumaraptayasiñapataquejja jupajj mä thac waquichäna. Jupanacajj lurapjjañapäcänjja ucajj uñjañaquïnwa. Ucampis ucan jan chʼamätap jasaquïtap laycojja waljaniw jiwarapjjäna.

42. Mä kawkha cutejja jupanacajj chuymanacap chʼollkheptayasipjjäna, ñankha arunacampi Moisesaru Diosaru tokesiñcama. Ucampis jumanacajj yatipjjtawa, jupan take cunat jachʼa chʼamapana jupanacajj arsut orakeru irpatäpjjäna.

43. Jichhasti, take ucanac khepatjja, jupanacajj ñankhaptapqui ucürojj purjjewa, jisa, niyapuni ñankhan pokotäpjjewa. Inas jupanacajj jichhürpach tʼunjañjamächi, cunalaycutejj yattwa, jupanacajj tʼunjatäpcani ucürojj puripuniniwa, jan ucajj mä jucʼaniquiw jan tʼunjatäcaniti, antisas ucanacajj catuntäwir irpatäniwa.

44. Uca laycojja Tatitojj awquejjar camachit churäna jupan chʼusa wasarar mistuñapataqui. Judionacasti jupan jacañap apakañ chʼamtʼapjjäna. Jisa, jumanacajj jupan jacañapjj apakañ chʼamtʼapjjaractawa; ucatwa, chuymanacamanjja jumanacajj jak jiwayirinacäpjjtawa, jupanacar uñtatäpjjaractawa.

45. Jumanacajj ñankjj lurañataqui jancʼachasipjjta, ucampis cʼachhataquiw Dios Tatitumar amtirinacäpjjta. Mä alajjpach qhitar uñj-jjapjjtawa, jupasti arsupjjaractamwa. Jisa mä kawkha cuti arupar istʼapjjtawa; mä tʼacu, jiscʼa arumpi jupajj jumanacar arsupjjaractam, ucampis jumanacajj jan chuym chʼalljjtayasirïpjjta, arunacapar chuymampi jan istʼañamcama. Ucatwa jupaw jumanacar arjjayapjjtam khejjokhejj-jam arumpi; ucasti oraker onjjtayänjja, payar payaru jaljtayañcamäcaspas uqhama.

46. Jumanacajj yatipjjaractawa, jupan take chʼaman arupan chʼamapampi acapach orakjj kʼala tucjaraquispawa, pampanacs tʼimpuyaraquispawa. Ucatsti, cunjamats aqham chʼollkhe chuymanacanïpjjasma?

47. Jichhajja chuymajjajj payar pʼaquitäcaspas uqham jumanacata anch llaquistjja; chuymajjasti usuniraquiwa. Nayajj ajjsartwa cunalaycutejj jumanac inas wiñayan wiñayapatac jakonucutäpjjchïta. Uñjapjjam, Diosan Ajayupajj nayana phoktʼatawa, janchejjan jan chʼamanïñapcama.

48. Ucatsti, uca arunac nay aruspana, jupanacajj nayampi kʼapisipjjäna, jachʼa kota pʼiyanacar nayaru jakontañ munapjjaraquitäna. Jupanac nayjjaru amparanacap lokjjatir jutapcäns uqhajja, nayajj jupanacar sasaw arsüyäta: Diosan chʼamapajj nayana phoktʼatawa, janchejjar ninjam naqhañcama; ucatwa, Take Chʼamani Diosan sutipjjaru sapjjsmawa, jan nayaru llamctʼamti. Qhititejj nayjjar amparanac ayjjatquitanejja ucajj pharsut totorjamaw wañsuni. Diosan chʼamapan nayrakatapana jupajj jan cunäcaspas uqhamäniwa, cunalaycutejj Diosaw juparu jawkʼani.

49. Ucatsti naya Nefejja jupanacaru säyäta: Jan awquim toke jucʼamp thuthusipjjamti; Diosaw nayar camachitjj churitu mä barc lurañajjataqui, ucat nayampi irnakañ kalltapjjam.

50. Jupanacar saraquïyäta: Diosatejj nayaru take cunanacjj lurañajjataqui camachit churquitaspajja, nayajj ucanacjj luriristwa. Jupatejj nayar camachitjj churitaspajja, nayan aca umaru wañaptam sañajjataqui, umajj wañaptaspawa. Nayatejj ucjj siristjja, ucajj luratäspawa.

51. Jichhasti, Tatitutejj uqham sinti jachʼa chʼamanejja, jaken wawanacap taypin uqham walja muspharcañanacjj lurcaraquïnjja, cunjamats jan nayaru yatichitaspa mä barcjj lurañajjataqui?

52. Ucatsti naya Nefejj walja cunanacjj jilanacajjar säyäta, jupanacan pejjtuntatäñapcama; janiraquiw nayaru chʼajjwapcaraquitaspati. Walja urunacaraquiw nayjjaru amparanacap ayjjatañ ajjsarapjjaraquïna, lucʼananacapampisti nayaru llamctʼañs ajjsarapjjaraquïna. Diosan Ajayupajj sinti chʼamanïna, jupanacan nayar llamctʼañ ajjsarañapcama, jupanacan wañsuñata ajjsaratap laycu. Uqhamaw Ajayojj jupanacan irnakäna.

53. Ucatsti Tatitojj nayaru sitäna: Jilanacamaru amparam loktam, jupanacasti janiw nayrakatamanjj wañsupcaniti, antisas nayajj jupanacar thalaräw si Tatitojja. Ucjj luräwa, jupanacan nayan Dios Tatitupätajj-jj yatiñanacapataqui.

54. Ucatsti, amparajj jilanacajjaru loktäyätwa, jupanacasti janiw nayrakatajjan wañsupcänti. Ucampis arscäna uca aruparjam Tatitojj jupanacaru thalaränwa.

55. Ucatsti jupanacajj sapjjäna: Cuntejj thalarapquitu ucan Tatitun chʼamapätap yatipjjta, ucatwa Tatitun jumampïtap chekpach yatipjjaractsa. Jupanacasti nayan nayrakatajjaru orakcam quilltʼasipjjäna, nayar yupaychirjamaraquïna, ucampis nayajj uca lurañap janiw jaytcäyätti, sasa: Nayajj jilamätwa, jisa, nayajj jumanacan sullcamätwa. Ucatjja, Dios Tatitumaru yupaychapjjam; Dios Tatitumajj churapcätamjja uca orakenjja urunacaman waljäñanacapataqui awquim taycamar wakaychapjjam.