1. Ucatsti, awquijjajj uñjcän ucanac nayan uñjañ munatajjatjja, Tatitun ucanac nayar uñachayañatac chʼamanïtap iyawsasina, chuymajjan ucjjat lupʼisquipanjam Tatitun Ajayupan irpataw uñjasta, jïsa, mä jachʼa kolluruw irpitu. Uqhäm kolljja, janipuniw cunapachas uñjirïcti, janiraquiw cunapachas uqhäm jachʼa kollurojj cayujj tactʼirïcäyät-ti.

2. Ajayusti situwa: Cuns muntajja?

3. Nayasti ucjjaruw sista: Awquijjajj uñjcäns ucanac uñjañ munta.

4. Ajayusti nayarojj saraquituwa: Awquimajj parlcän uca kokar uñjatap iyawstati?

5. Nayajj ucjjaruw saracta: Jïsa, awquijjan take arunacapar nayan iyawsatajj-jja jumajj yat-tawa.

6. Uqhäm arscta ucqhaw, Ajayojj jachʼa arut aqhäm sas artʼi: Tatitumpi Alajjpachanquiri Diosampejj jachʼaru aptayatäpan. Jupajj takpach orakjjar Diosawa. Jïsa, take cunanacjjaruraquiwa. Qhuyapayatätaw jumajj Nefi, Alajjanquir Diosan Yokapar iyawsatam laycu. Ucat uñjañ munctajj ucanac uñjaraquïta.

7. Jichhasti, acajj mä unañchaw churatäyäta. Cuna kokan achupat-tejj awquimajj malltʼcänjja, uca kokar uñjasinjja, mä jakeruw alajjpachat sarakanir uñjaraquïta. Juparusti uñjätawa, ucat jupar uñjasinjja, jupan Diosan Yokapätapat ircatäta.

8. Ucatsti Ajayuw situ: Uñtam! –sasa. Nayasti uñtasaw mä kok uñjta, awquijjas uñjcän uca kokar uñtata. Uca kokajj jiwaquipunïnwa, janiraquiw ucat jucʼamp sumajj utjcaspati. Uca kokajj pharakay jankʼönwa, qhunut sipan jucʼamp jankʼoraquïnwa.

9. Ucatsti kokar uñjasin Ajayurojj sista: Take kokat sipan sumäquis uca kok nayar uñachayatam uñjta.

10. Jupasti nayarojj situwa: Cuns muntajja?

11. Ucjjaruw nayajj arsuracta: Cuntejj ucajj sañ munqui uc yatiñ munta. Mä jakejj maynimp parlquejja, uqhämaw nayajj jupamp parläyäta, cunalaycutejj jupajj jake uynakanïnwa; ucampis Tatitun Ajayupätap yatïyäta. Mä jakejj masipar parljjayquejja, uqhämaw parljjayitu.

12. Ucatsti, Uñtam! –situwa. Nayasti jupa tok uñt-ta, juparusti janiw jucʼamp uñjcti, naya jacʼatjja, sarawayjjataynawa.

13. Ucatsti uqhäm uñchʼuquisaw Jerusalen jachʼa marcar uñjta, yakha marcanacarus uñjaracta. Ucatsti, Nazaret marcaruw uñjta. Uca marcansti, mä jan chach uñtʼiri warmiruw uñjaracta. Jupasti jankʼönwa, sinti jiwaquipunïnwa.

14. Ucatsti, alajjpach jistʼartir uñjta. Alajjpach qhitaw sarakanisin nayrakatajjar saytʼasi, ucat situ: Nefi, cuns uñjtajja?

15. Nayasti juparojj sistwa: Take yakha warminacat sipan mä suma khosi warmiruw uñjta.

16. Jupasti nayarojj situwa: Diosan qhuyapayäwip sarakaniñap amuytati?

17. Nayasti juparojj saractwa: Jupan wawanacapar munatapjj yat-twa, ucampis janiw yatcti, cun sañtejj take acanacajj munqui ucjja.

18. Ucat jupajj situ: Uñjctas uca jan chach uñtʼiri warmejja, Diosan Yokapan janchi taycapäniwa.

19. Ucatsti warmirojj Ajayun apatäsquir uñjta; ucat mä kawkhatac Ajayun apatätap khepatjja, qhitaw parlitu, ucat situ: Uñtam! –sasa.

20. Nayasti iyaw sasaw uñt-ta, ucat warmir wasitat uñjta, mä waw ichtʼatäsquiri.

21. Ucat qhitajj situ: Acaw Diosan Chitapajja, jïsa, Wiñay Awquin Yokapasa! Awquimajj uñjcäns uca kokajj cun sañtejj munqui uc amuytati?

22. Ucjjaruw arsta: Jïsa, ucajj Diosan munasiñapawa; ucasti jaken wawanacapan chuymanacaparuw chʼeketatasqui. Ucalaycuw ucajj take cunanacat sipan muncayajja.

23. Ucat jupajj aqhäm sasaw parljjayitu: Jïsa, ajayutac jachʼïr cusiscañawa.

24. Uca arunac arsusinsti: Uñtam! –situwa. Nayasti, uñtasajj Diosan Yokapar jaken wawanacap taypin sarasquir uñjta; waljaniraquiw jupan cayunacapar quilltʼasisajj jupar yupaychapjjäna.

25. Ucatsti, awquijjajj uñjcän uca jiru lawajja, Diosan arupamp sasitaynawa, ucasti jacquir uma jalsu tokeruw irpäna, jan ucajja, jacañ kokaru. Uca umanacasti Diosan munasiñaparuw uñtasitayna; ucatsti jacañ kokarojj Diosan munasiñapäcaspas uqhäm uñjaracta.

26. Qhitasti wastat nayar situ: Uñtam! Diosan qhuyapayäwip sarakaniñap uñjaraquim –sasa.

27. Uñtasinsti acapach jakenacan khespiyiriparuw uñjta, qhitit-tejj awquijjajj parlcän ucaru. Ucatsti cawquïr arjiritejj jupan jutañap nayräjjajj thac waquichcani ucaruw uñjaracta. Diosan Chitapasti purinïnwa, ucat jupamp bautizayasïna. Bautizasitap khepatsti, nayajj alajjpach jistʼartir uñjta. Kollan Ajayusti alajjpachat sarakani, ucatsti palom sat jamachʼir uñtataw jupjjar thoknokaraquïna.

28. Ucat juparojj uñjta, jakenac taypir chʼamamp jachʼa khapak cancañamp kollan luräwinac luriri. Jake tamanacasti jupar istʼañataquejj mayachthapisipjjänwa. Ucatsti jupanacan taypipan jupar jiscʼachir uñjaracta.

29. Yakha tunca payanir jupar arquir uñjta. Ucatsti jupanacajj nayrakatajjat Ajayun apatäpjjänwa, janiraquiw jupanacar jucʼamp uñjcti.

30. Ucatsti qhitajj wastat nayar parlitu: Uñtam! –sasa. Nayasti uñtasajj alajjpach wasitat jistʼartir uñjta, allajjpachanquiri nacarusti jaken wawanacapan uc sarakanir uñjaracta, jupanacasti kollan luräwinac jupanac taypin lurapjjäna.

31. Ucat wasitat nayar parlitu: Uñtam! –sasa. Nayasti uñtasaw Diosan Chitapar uñjta, jaken wawanacap taypinjam sarasquiri. Waltʼat jake tamanacaruw uñjta. Ucanacasti usutäpjjänwa, cunayman usunacampi tʼakhesiyata, supayanacamp ñankha ajayunacamp mantatanacaraqui. Qhitasti parljjayituwa, take ucanac uñachayaraquitu. Jupanacasti Diosan Chitapan chʼamapampiw cʼumaraptayatäpjjäna; supayanacamp ñankha ajayunacampisti alis-sutäpjjaraquïnwa.

32. Ucatsti qhitajj wasitat parlitu: Uñtam! –sasa. Uñtasinsti Diosan Chitaparuw uñjta. Juparusti jakenacajj catuntapjjänwa. Jïsa, wiñay Diosan Yokapajja acapach orakenquirinacan taripataw uñjasi. Nayasti uc uñjta, ucjjat ircataracta.

33. Naya Nefisti juparojj mä cruzjjar warc-catat uñjta, oraken jaquir jakenacan juchanacap layc jiwayatätap uñjaracta.

34. Jiwayapjjatap khepatsti, orakenquir waltʼat jakenacar tantachasir uñjta, Chitan apostolonacap contra saytʼañataqui, cunalaycutejj Tatitun qhitapajj uca tunca payanirojj uqhäm sutichäna.

35. Orakenquir waltʼat jakenacajj mayachthapisipjjänwa. Jupanacarusti mä jachʼa utan uñjta, cunjämtejj awquijjajj uñjcänsa uca utar uñtataraquïnwa. Tatitun qhitapasti wastat parlitu: Uñjam! jakenacampir yatiñ cancañapampiru. Jïsa, Chitan tunca payan apostolonacap contra saytʼañataquiw Israelan utapajj mayachthapisi.

36. Ucatsti uca wali jachʼa utajj acapach oraken jachʼa jachʼa tucuñar uñtasitawa; uc nayajj uñjta, ucjjat ircataracta. Uca utasti tincuwa, tincüwipasti wali jachʼapunïnwa. Tatitun qhitapasti wasitat nayar aqhäm situ: Uqhämaw tʼunjasini take marcanacamp familianacamp lajjranacamp jakenacampejja, take qhititejj Corderon tunca payan apostolap contra saytʼasipcan ucanacajja.