1. Ucatsti qhitajja, Uñtam! –situwa. Nayasti iyaw sasaw uñt-ta, ucat walja orakenacaru, pʼekechirin marcanacaruw uñjta.

2. Ucatsti qhitajj situwa: Cuns uñjta? –sasa. Ucjjaruw nayajj sista: Walja marcanacampir pʼekechirin sarayat marcanacaruw uñjta.

3. Jupasti nayarojj situwa: Ucanacajj gentilenacan orakenacapamp pʼekechirin marcanacampiwa.

4. Ucatsti gentilenacan marcanacap taypinjja, mä jachʼa iyawsiri tamar ut-tʼayat uñjta.

5. Qhitasti nayar situwa: Take yakha tamanacat sipan ajjtcañäquis uca taman ut-tʼayatätap uñjam. Ucajj Diosan kollan jakenacaparuw jiwayi, jïsa, jupanacaruw mutuyi, tʼakhesiyaraqui, mä jiru yucumpiw ñachʼjjatapjje, ucat tʼakhesiñar irpapjjaraqui.

6. Ucatsti nayajja, uca jachʼa ajjtcañ tamaruw uñjta; uca tamarusti supayan ut-tʼayatätap uñjaracta.

7. Ucjjarusti uñjaractwa: kori, kollke, seda sawutanaca, chʼiyär wila sawutanaca, ñutʼu sawut lienzonaca, take cunayman jila alan isinaca. Ucatsti, kʼañusis sarnaker warminacaruw uñjta.

8. Qhitasti situwa: Uñjam uca kori, kollke, seda sawutanaca, chʼiyär wila sawutanaca, ñutʼu sawut lienzonaca, jila alan isinaca, kʼañusis sarnaker warminaca. Take ucanacajj uca jachʼa ajjtcañ taman yänacapawa.

9. Uqhämarac ucajja, orakenquirinacamp jachʼar aptayasiñataquejja, Diosan kollananacaparuw tucqhi, ucatsti catuntasin tʼakhesiñar irpapjjaraqui.

10. Ucatsti nayajj uñtasinjja, walja umanac uñjta; uca umanacasti gentilenacaruw jilanacajjan sarakerinacapat jaljäna.

11. Ucatsti qhitajj situwa: Diosan colerasiñapajj jilanacaman sarakerinacapjjaruw jutani –sasa.

12. Nayasti uñtasinjja, gentilenac taypin mä jakeruw uñjta; uca chachasti jilanacajjan sarakeripat walja umanacamp yakhachatänwa. Ucat uñjaracta Diosan Ajayupar uca jakjjar sarakeri, jupar chʼamañchiriraqui; jupasti uca walja umanacanjam saräna, arsut orakencapcän uca jilanacajjan sarakerinacapar jicjjatañcama.

13. Ucatsti Diosan Ajayuparuw uñjaracta, yakha gentilenacar chʼamañchiri. Jupanacasti catuntatäsin tʼakhesïwipat mistusinjja, uca walja umanac maqhatapjjäna.

14. Ucatsti walja tama gentilenacaruw arsut orakjjanquir uñjta. Ucatsti Diosan colerasiñapan jilanacajjan sarakeripjjar jutir uñjaracta. Jupanacasti gentilenacamp take toker ananucutaw uñjasipjjäna, usuchnokataw uñjasipjjaraquïna.

15. Ucatsti Diosan Ajayupajj gentilenacampïtap uñjta. Jupanacasti jachʼaptapjjänwa, oraksti tutïcaspas uqhäm catusjjapjjaraquïna. Ucatsti jupanacan jankʼötap uñjta, suma uynaktʼanïpjjatapamp jiwaquïpjjatapamp uñjaracta. Uca jakenacasti, jakenacajjajj janïr jiwarayatäpcäns ucqhajj jiwaquïpcäns ucar uñtatäpjjänwa.

16. Ucatsti naya Nefejj uñjtwa, catuntäwit antutnucutäpcäns uca gentilenacajja, Tatitun nayrakataparuw altʼapjjäna. Tatitun chʼamapasti jupanacampïnwa.

17. Ucatsti uñjaraquïyätwa, cuna oraket-tejj jutapcän uca oraken kheparir gentilenacajj umanacjjans wañjjans mayachthapisipjjän jupanacamp nuwasiñataqui.

18. Ucatsti Diosan chʼamapan jupanacampïtap uñjta, uqhämaraquiw uñjta, Diosan colerasiñapajja, nuwasiñatac mayachthapisipcäns ucanacjjar jutatapa.

19. Naya Nefisti uñjtwa, catuntäwit khespiyatäpcän uca gentilenacajj Diosan chʼamapïpana, yakha marcanacan amparapat khespiyatäpjjatapa.

20. Ucatsti jupanacan jachʼaptapjjatap uñjta; jupanac taypinsti mä libro uñjta.

21. Qhitajj ucat situ: Aca kellkatajj cun sañtejj munqui ucjj yat-tati?

22. Nayasti juparojj sistwa: Janiw yatcti –sasa.

23. Ucat situ: Ucajja mä judion lacapat juti. Ucat nayajj kellkat uñt-ta. Qhitasti aqhäm saraquituwa: Uñjctas uca kellkatajja, judionacan sarnakäwipjjat kellkatawa; cuna arusjäwinactejj Tatitojj Israelan utapamp lurcäns ucanacaw ucanqui. Ucancaraquiw kollan Diosan arjirinacapan jutir urunacat walja yatiyäwinacapajja. Uca kellkatasti, bronce tʼalpha lekʼetanacjjar kellkatäquis ucar uñtasitawa, janiraquiw uqhäm waljäquiti. Ucampis Tatitojj Israelan utapamp arusjcänsa arscaraquïns ucanacaw utji. Ucalaycu, uca kellkatajj jachʼa asquiw gentilenacataquejja.

24. Tatitun qhitapasti situwa: Uca kellkatan mä judion lacapat mistutapjj niy uñjtawa. Uca judion lacapat mistcän ucapachajja, Tatitun arupan khanätapaw ucancäna; tunca payan apostolosti Tatitut ircatapjje; cunjämatejj chekäqui ucarjama. Uca chekasti Diosan Chitapanquiwa.

25. Uqhämasti, ucanacajj phokhatpachaw judionacat mistu gentilenacataqui, Diosancqui uca chekarjama.

26. Judionacat gentilenacar Chitan tunca payan apostolop toke parlasitap khepatjja, jumajj uñjtawa, mä jachʼa ajjtcañ taman ut-tʼayäwipa. Ucasti yakha tamanacat sipan jucʼamp ajjtcayawa, cunalaycutejj Chitan asqui yatiyawi patjja, walja khanäqui sumäcaraqui uca chekanac apakapjje, ucatsti Tatitun walja arusjäwinacap apakapjjaraqui.

27. Take ucanacsti lurapjjaraquïwa, Tatitun cheka thaquip ñankhaptayañataqui, jaken wawanacapar juyqhuptayañataqui, chuymanacap chʼollkheptayañataquiraqui.

28. Uqhämasti, jumajj uñjtawa, uca kellkatan uca jachʼa ajjtcañ taman amparapancatapa, ucatsti uca kellkatatjja, khanäquis sumäquisa ucawjanacan chhaktatap uñjaractajja. Uca kellkatajj Diosan Chitapan kellkatapawa.

29. Khanäquis walipunïcaraquis ucanac uca kellkatat apakat khepatjja, kellkatajj gentilenacan marcap taypir apatawa; ucatsti gentilenacan takpach marcanacapar apatäcasasti, uqhämaraqui, walja umanac uñjctas uca qhurcatanquirinac taypir apatäsasa, catuntäwit khespitäpcan uca gentilenac taypinsa, niy jumajj uñjtawa, kellkatat sumäquis khanäquis ucawjanac chhaktayapjje, ucawjanacajj jaken wawanacapan amuyupataquejj khanänwa, cunjäm khanatejj Diosan Chitapan utjquis uqhäma, jïsa, Chitan arunacapat take ucanac apakapjjatap laycusti, waljaniw lanktasipjje, jïsa, Satanasan jupanacjjar wali chʼaman saytʼañapcama.

30. Ucampis jumajj uñjtawa, cawquïr gentilenacatejj catuntatäsin antutnucutäpcänjja, take yakha marcanacat sipan Diosan chʼamapïpan jucʼamp aytatäcänjja take yakha oraket sipan qhustʼatäqui uca orakjjarojja (uca orakesti cuna orakjjat-tejj Dios Tatitojj awquimamp arustʼäwir mantcänjja, sarakerinacapan tuti orakenïñapäcäns ucawa); ucalaycu, jumajj uñjtawa, Diosajj janiw muncaniti jilanacam taypincqui uca quituntat sarakerinacamar gentilenacan kʼal tucqhañapjja.

31. Janiraquiw jilanacaman sarakerinacaparus gentilenacan tucqhañapjj muncaraquiniti.

32. Diosajj janiraquiw muncaniti, gentilenacan wiñayatac uca ajjsarcay juyqhu cancañan utjapjjañapjja, cunjämtejj jumajj uñjctas uqhäma. Diosan Chitapan yatichäwinacapat khanäqui sinti sumäcarac ucawjanac apakapjjatap laycu. Ucanacsti ajjtcañ tamaw apake, cunjämtejj jumajj uca taman ut-tʼatätapjj uñjcta uqhäma.

33. Ucat Diosan Chitapajj sï: Gentilenacatjja, qhuyapayasïwa, Israelan utapat jiltʼirinacarusti, jachʼa taripäwimpiw sartʼä.

34. Ucatsti Tatitun qhitapajj parljjayituwa: Aqhäm siw Diosan Chitapajja, Israelan utapat jiltʼirinacar tʼakhesiyatajj khepatjja, (cawquïr jiltʼat-tejj parlcta ucajja, awquiman sarakerinacapawa) ucalaycu, taripäwimp jupanacar sartʼatajj khepata, gentilenac toke jupanacar tʼakhesiyatajj khepata; cunapachatejj gentilenacajj sintipun lanktasipjjani, Chitan yatichäwinacapat khanäqui sumäcarac ucawjanac uca ajjtcañ tamamp apakatätap laycojja, uca taman kʼañusir warminacan taycapätap laycuraquejja –siw Chitajja, qhä urunjja, gentilenacat qhuyapayasï, nayan quicpa chʼamajj toke jupanacar jutañajjcama, arunacajjatsti walpachaw khanäni, sumaraquïni –siw Chitajja.

35. Cunalaycutejj Chitajj siwa: Sarakerinacamarojj naya quicpaw khanañchasï, jupanacasti cunanactejj churcä ucanacjjat kellkapjjani. Ucanacasti khanäniwa sumaraquïniwa. Ucat juman sarakerinacamampin jilanacaman sarakerinacapampin tucqhatätap khepata, chuyma kalarayasiñar puripjjatap khepataracjja, take acanacajj imantatäniwa, Chitan churäwipamp chʼamapamp gentilenacatac uñstañapataqui.

36. Ucanacansti nayan arunacajjaw kellkantatäni, ucajj karkajjawa, khespiyañajjaraquiwa –siw Chitajja.

37. Qhuyapayatäniw ucürun Sionajjar ut-tʼayañatac chʼamachasirejja, cunalaycutejj Kollan Ajayun churäwipamp chʼamapampiw jupanacan utjani. Jupanacatejj tucuycam thurtʼasipjjanejja, khep khepa uronjj jachʼaruw aptatäpjjani Chitan jan tucusquir khapak marcapan khespiyasipjjaraquini. Cunj jiwaquis kollu patanacan sumancañat yatiyirinacajja, jachʼa cusiscañ yatiyäwinac yatiyirinacasa.

38. Ucatsti jilanacajjan sarakerinacapan jiltʼirinacap uñjta; uqhämaraquiw uñjta, judio jaken lacapat mistcäns uca Diosan Chitapan kellkatapajja, gentilenacat mistsüna, jilanacajjan sarakerinacapat jiltʼquis uca jakenacaru.

39. Ucan mistutap khepatsti yakha kellkatanac uñjaracta; ucanacasti Chitan chʼamapïpan gentilenacat jupanacar mistüna; uca kellkatanacasti gentilinacar amuytʼayañataquiwa, jilanacajjan sarakeripat jiltʼir jakenacar amuytʼayañataquiraquiwa, uqhämarac take acapach orakjjan chʼeketatat judionacaru; Diosan arjiri nacampin Chitan tunca payan apostolonacapampin Diosan arjiri nacampin kellkatanacapan chekätapjjata.

40. Qhitasti aqhäm sasaw parlitu: Gentilenac taypin uñjcta uca khepïr kellkatanacajj Chitan tunca payan apostolonacancqui uca nayrïr kellkatanacan chekätap ut-tʼayani. Khanawjanacamp jiwaquïqui ucawjanacamp apakatäquis ucanac yatiyaraquini; take familianacaru, lajjranacaru, jakenacaru, Diosan Chitapan Wiñay Awquin Yokapätapa, acapach oraken Khespiyirïtapa, take jakenacan jupar jutjjañap waquisitapa. Jan uqhäm lurapcaspa ucasti, janiw jupanacajj khespiyatäpcaniti.

41. Chitan lacap toke ut-tʼayatäcani uca arunacarjamaw jupanacajj jutapjjani. Chitan arunacapasti yatiyatäniwa sarakerinacaman kellkatanacapana, uqhämaraqui Chitan tunca payan apostolopan kellkatanacapansa. Uqhamäsinsti paypachaw mayar apthapitäjjani, maya Diosaqui mä Khespiyiric take orakjjan utjatap laycu.

42. Take marcanacar jupan uñstañap urojj jutasquiwa, judionacampiru gentilenacampiru. Ucanacar uñstatap khepatsti, jupajj gentilenacampir judionacampiruw uñstaraquini. Khepanquirinacasti nayrancapjjaniwa, nayranquirinacasti khepancapjjaniwa.