5ri Jalja
Sarian Lehir tokesitapa–Yokanacapan cuttatapata panpachajj cusisipjje–Tʼalpha kʼellu alquimia lekʼetanacanjja cunas kellkatäqui ucata–Lehejja Josean jathapawa–Labanajj Josean jathaparaquiwa–Lehejj Diosan arji.
1. Ucatsti chʼusa wasaran awquejjan ucaru nanacan sarakanitajj khepatjja, jupajj cusisiñamp phoktʼatäjjänwa. Saria taycajjasti sinti cusisiraquïna, cunalaycutejja janir cuttapcäyäta uqhajja jupajj chekpachaw nanacat jaqhusïna.
2. Cunalaycutejj nanacajj chʼusa wasaran jiwarapquirists uqham jupajj amuyasïna. Jupasti awquejjaru tokesiraquïna, juparu arsuraquïna: Uñjäw uñjiri jakequïtaw jumajja. Tuti churata orakesat irpsunipjjesta; yokanacajjasti janiw jichhajj utjcjjeti, jiwasasti chʼusa wasarana jiwararaquiñäni sasina.
3. Uqham arunacampi taycajjajj awquejjaru tokesïna.
4. Ucatsti awquejjajj aqham sas juparu arsuraquïn sasina: Uñjäw uñjiri jakëtajjat yattwa. Janitejj nayajj Diosan cunanacapjja mä uñjäwin uñjquiriscäyätjja janiw Diosan sumätapjj uñtʼquiriscäyätti, antisasinsa Jerusalenan kheptʼiriscäyätjja, jilanacajjampi jiwaraquiriscäyätwa.
5. Ucampisa, nayajja mä arsuta orakjja catokta. Ucanac laycuraquiw nayajj wal cusistjja. Jisa, yatiractwa, Tatitojj yokanacasaru Labanan amparapat khespiyani; jupanacaru wastat irpaniraquini jiwasan ucaru, chʼusa wasararu.
6. Uqham arunacapampi Lehi awquejjajj Saria taycajjaru nanacjjat chuymachäna, nanacajj judionacan kellkatap catuñataqui Jerusalen orakeru wasaran sarasinjja, ucchañcamajja.
7. Nanacajj awquejjan chʼujllaparu cuttapcäyät ucapachajja, jupanacan cusisiñapajj phoktʼatänwa, taycajjasti chuymachataraquïnwa.
8. Jupasti aqham arsu sasina: Jichajj chekpacha Tatitun chachajjar wasararu jaltañapataqui camachit churatapjj yatjjta. Jisa, chekpachansa yatjjaracta Tatitun yokanacajjaru arjjatatapatjja, Labanan amparapat jupanacar khespiyatapatsa, Tatitojj lurañapatac camachit churcänjja ucjj jupanacan phokhañapataqui chʼamjj churatapatsa. Uqham arunacampi jupajj arsüna.
9. Ucatsti sinti cusisipjjäna; loktäwinacjja naqhata loktäwinacjja Tatituru loktapjjaraquïna; Israelan Diosaparu yuspagar churapjjaraquïnjja.
10. Israelan Diosaparu yuspagar churapjjatap khepatjja, Lehi awquejjajj tʼalpha kʼellu alquimia lekʼetanacjjar kellkantatanacjj aptäna. Ucanacan thakasaw arsuyaraquïna kalltäwitpacha.
11. Ucanacanjja Moisesan pheska kellkatapan utjatapjj uñjäna. Ucanacasti acapach oraken luratäñapat yatiyäna; jiwasanacan Adan Eva sat nayrïri awquisat taycasat yatiyaraquïna.
12. Utjaraquïnwa judionacat mä kellkata, kalltäwitpach Judan Sedecias pʼekechiripan sarayañ kalltatapcamasa.
13. Utjaraquïna Diosan kollan arjirinacan arjäwinacapajja, kalltäwitpach Sedeciasan sarayañ kalltatapcamasa. Utjaraquïna Jeremiasan lacapan arsuta walja Diosan arjäwinacajja.
14. Ucatsti, Lehi awquejjajj tʼalpha kʼellu alquimia lekʼetanacjjaru lakʼa achilanacapan sutinacap kellkatapjja jicjjataraquïnwa. Ucatwa jupan Josean jathapätap yatjjäna, jisa, cawquïri Joseatejj Jacobon yokapäcänjja, egiptoru aljantatäcänjja, Tatitun amparapan imatäcansa Jacob awquiparu take familiaparu machʼat jiwañata khespiyañapataqui uca Joseata.
15. Qhititejj jupanacaru jan jiwañapataqui arjjatäna, uca pachpa Diosajj jupanacaru catuntäwitjja egipto oraketa irpsuraquïna.
16. Uqhamawa Lehi awquejjajj lakʼa achilanacapan sutinacap kellkatapjj jicjjatäna. Labanasti Josean jathaparaquïnwa, ucat jupamp awquinacapampejja uca kellkatanacjja imapjjäna.
17. Ucat nayan awquejjajj take ucanac uñjasinjja Ajayumpi phoktʼatäjjänwa, jupan jathapjjat Diosan arjañ kalltaraquïna.
18. Uca tʼalpha kʼellu alquimia lekʼetanacan take jupan jathapat sarakeri marcanacaru, wila masinacaru, lajjranacaru, jakenacaru sarañapjjats yatiyäna.
19. Ucatwa saraquïnwa, aca tʼalpha kʼellu alquimia lekʼetanacajj janipiniw cunapachas tucuscaniti, cunapachas saruntcaraquiniti. Jupasti jathapjjat walja cunanacjj Diosan arjaraquïna.
20. Ucürcamasti nayampi awquejjampejja Tatitojj nanacaru churquitänjja uca camachitanacjj phokhapjjäyätwa.
21. Cuna kellkatanactejj Tatitojj nanacan catuñajjataqui camachit churapquitänjja ucanacjj catupjjäyätwa. Ucanacan thakasinjja ucanac arsuyapjjaraquïyäta; ucanacan sumätapjj amuyasipjjaraquïyäta. Tatitun camachitanacap nanacan wawanacajjatac imapjjañajjataqui ucanacan sinti waquisitapsa amuyasipjjaraquïyätwa.
22. Ucatjja, Tatitun suma amuyuparjamänwa nanacan ucanacjj nanacamp chic apañajjajja, wasaranjja arsut orakeru sarasajja.