1. Ucatsti naya Nefin jilanacajjaru arsuñ tucuyatajjatjja, jupanacajj nayaru sapjjetäna: Nanacajj catokapquirists ucanacat jucʼamp chʼama cunanacjja jumajj nanacaru arjjayapjjestawa.

2. Ucat nayajj jupanacaru aqham sasaw arsüyäta: Khoru jakenacataquejj chʼama cunanacjja nayan chekarjam arsutajj yattwa; asqui jakenac jan juchani uñstayaracta, jupanacan khep khepa urunjja alayaru apcatatäñapat ircataractjja. Ucatwa chekajj chʼamäcaspas uqhamaw juchaninacajj amuyapjje, ucan jupanacaru mankhacam qharintatap laycu.

3. Jichhasti, jilanacajja, jumanacatejj asqui jakenacäpjjasma ucajja, Dios nayrakatan sum sarnakañamataqui chekar istʼas yäkañ munapjjaraquisma ucajja, jumanacajj janiw cheka laycojj thuthusis sapcasmati: Jumajj chʼama cunanacjja nanacjjar arstajja sasa.

4. Ucatsti naya Nefejja, sinti chʼamachʼasisa jilanacajjaru eojjäyätwa Tatitun camachitanacap imañanacapataqui.

5. Ucat jupanacajj Tatit nayrakataru llampʼuptayasipjjäna; ucat jupanacata nayajj wal cusisïyäta, jupanacan asqui cancaña thaquinacanjam sarnakañapjj wal suyaraquïyäta.

6. Take ucanacjj arsupjjäyäta, lurapjjaraquïyäta cunapachatejj awquejjajj Lemuel sat kherwanjja mä chʼujllan kamcäna.

7. Ucatsti naya Nefejja mä Ismaelan phuchapa catüyäta warmejjataqui. Uqhamaraqui jilanacajjajj Ismaelan phuchanacap catupjjaraquïna, jupanacan warminacapataqui. Zoramasti Ismaelan jilïri phuchapa caturaquïna, jupan warmipataqui.

8. Uqhamawa cunaractejj Tatitojj awquejjaru churcäna take uca camachitanacjj awquejjajj phokhäna. Uqhamaraqui naya Nefejja Tatitun walpin qhuyapayatäyäta.

9. Ucatsti arumajja Tatitun arupajj awquejjar arsunïna, camachit churaraquïna, khepärmanthejj jupan wasitata chʼusa wasararu sarañapataqui.

10. Ucatsti awquejjajj khepärmantejj sartasinjja, chʼujllan puncuparu mistüna. Ucat wal muspharasaw jupajj orakjjan uñjäna mä morokʼo irpirjja, wali mayja lurata, qhusa kʼellu alquimiata lurataraqui. Uca morokʼo irpiri mankhansti pä yawriw utjäna. Mä yawristi uñachtʼayäna cawcsarutejj chʼusa wasaran sarapjjañajjäcänsa ucjja.

11. Ucatsti, nanacamp chʼusa wasararu apapjjañajjäcänsa ucanacjja, uqhamaraqui Tatitojj churapquitänjja uca juyranacat take jiltʼirinacsa apthapipjjäyäta. Cunayman jathanacsti apapjjaraquïyäta, chʼusa wasarana ucjj apañajjataqui.

12. Ucatsti chʼujllanacajj apthapisinjja, Laman sat jawir maqhatas chʼusa wasararu sarapjjäyätwa.

13. Ucatsti pusi uru sarapjjäyäta, niyapini aynacha tokeru. Chʼujllanacajjsti wastat uttʼayapjjäyäta; ucaujaru Shazer sasaw sutiñchapjjäyäta.

14. Ucatsti, michʼinacajjamp michʼi illaptʼañanacajjamp apjjarusina, familianacajjataqui mankʼañ jiwayiri wasararu sarapjjäyäta. Familianacajjataqui mankʼañ jiwayatanacajj khepatsti, chʼusa wasaranquiri familianacajjaru wasitat cuttanipjjäyäta, Shazer sat ucaujaru. Ucat uca quipca tokeru sarasa, wasaran jucʼampi purumanacapanjama sarasa, wastat wasararu sarapjjäyäta. Uca purumanacasti Wila Iamara jacʼanquiri thiyanacancänwa.

15. Ucatsti michʼinacajjampi michʼi illaptʼañanacajjampi, kalanacajjampi kʼorawanacajjampi uca jacʼanacan mankʼañ jiwayasa, walja urunacaw sarasipcaquïyäta.

16. Cunjamatejj uca morokʼo irpirejj uñachayapquitänjja ucarjamaw sarapjjäyäta; ucasti wasaran jucʼampi purumanacapanjam irpapjjetäna.

17. Walja urunaca sarapjjatajj khepatsti, mä kawkhataquiwa chʼujllanacajj uttʼayapjjäyäta wastat samarañanacajjataqui, familianacajjataqui mankʼañ catuñanacajjataqui.

18. Ucatsti naya Nefejja mankʼañ jiwayiri mistusaw michʼi illaptʼañajj pʼaquïyäta; michʼa illaptʼañajjasti qhustʼata chʼollkhe jirut lurataraquïna. Ucat michʼi illaptʼañ pʼacjatajj khepatjja, jilanacajjajj nayampi kʼapisipjjäna, michʼi illaptʼañ pʼacjatajj laycu, cunalaycutejj janiw mankʼañs catuntapcti.

19. Ucatsti familianacajjaru jan mankʼampiw cut-tapjjäyäta. Jupanacasti saräwipat wali karjatäsa mankʼan pisïtapat wali tʼakhesipjjäna.

20. Ucatsti Lamanamp Lemuelampi Ismaelan yokanacapampejj ancha thuthusiñ kalltapjjäna, jupanacan chʼusa wasaran tʼakhesitanacapat llaquinacapatjja. Uqhamaraquiwa awquejjajj Dios Tatituparu thuthusiñ kalltaraquïna. Jisa, takenpachaw anch llaquisipjjäna, Tatituru thuthusiñapcamasa.

21. Ucatsti nayan michʼi illaptʼañajjan pʼaquisitapata, jilanacajjan michʼi illaptʼañanacapan jiyiñap chhakatapatjja, naya Nefejj jilanacajjampi chicaw tʼakhesïyäta. Uca laycojja ancha chʼamäjjänwa, jisa, nanacan jan cuna mankʼañs catuñajjcamajja.

22. Jilanacajjajj Dios Tatituparu aynisiñapcamaw wastat chuymanacap chʼollkheptayapjjäna; ucat naya Nefejja jilanacajjar wal arsüyäta.

23. Ucatsti naya Nefejja cʼulluta mä michʼi illaptʼañjja lurasïyäta, mä cheka lawata mä michʼi lurasiraquïyäta; uqhamajja michʼimpi michʼi illaptʼañampi, kalanacampi kʼorawamp uchasïyäta. Awquejjaru saraquïyätjja, cawqharus saräjja, mankʼañ caturi?

24. Ucatsti jupajj Tatituru jisctʼänwa, cunalaycutejj jupanacajj llampʼuptapjjäna nayan arojj laycu, nayan chuymajjan chʼamapampiw jupanacaru walja cunanacjj satajj laycu.

25. Ucatsti Tatitun arupajj awquejjaru purïna, jupasti jupan Tatituru thuthusitap laycu chekpachaw tokenokatäna, jupan llaquin pʼiyanacaparu puriyatäñapcama.

26. Ucatsti Tatitun arupajj jupar purïna, sasina: Morokʼo irpiriru uñjam, kellkatäqui ucanacar uñjaraquim.

27. Ucatsti awquejjajj morokʼ irpirjjaru kellkatäquis ucanacar uñjasinjja, sinti ajjsarthapisa qhathatiraquïna; jilanacajjampi Ismaelan yokanacapampi, warminacajjampejj qhathatipjjaraquïnwa.

28. Ucatsti morokʼo irpirinccänjja uca yawrinacaru nanacan iyawsañajjarjama, chʼamachʼasis yäkañajjarjama ucanacan walic uñachtʼayatapjja naya Nefejj uñjäyäta.

29. Ucanacjjaru mä machak kellkataw kellkatäna; ucasti khana arsuyañjamänwa. Tatitun cunjam lurañapjjat amuyañajjataqui nanacaru amuyu churapjjetäna. Nanacan ucaru chʼamachʼasis iyawsañajjarjama mä kawkha cut turcasa kellkatänwa. Uqhamawa, Tatitun jiscʼa cunanacampi jachʼa cunanacjja puriyaniñatac chʼamanïtapjj yatipjjtan jiwasanacajja.

30. Ucatsti, morokʼo irpirjjan churatäcäna uca uñachtʼäwinacarjamawa naya Nefejja kollu apachitar maqhatäyäta.

31. Ucatsti nayajj lakʼonacjj jiwayäyätwa. Ucat familianacajjataqui mankʼ caturaquïyätjja.

32. Ucatsti jiwaycäyätsa uca lakʼonacjj apasaw chʼujllanacajjaru cuttäyät nayajja. Ucatsti jupanacajj nayan mankʼ catutajjaru uñjasajja, cunja jachʼänsa cusisiñapajja! Ucatsti jupanacajj Tatitu nayrakatan llampʼuptapjjäna, juparu yuspagara churapjjaraquïna.

33. Ucatsti wasitata nanacajj sarjjapjjäyäta, cunjamatejj nayrapachajj sarapcäyäta, niyapini uca tokeru sarasipcaquïyäta. Walja urunacajj sarapjjatajj khepatsti wastat chʼujllanacajj uttʼayapjjäyätwa, mä kawkha pacha uqhan kamañanacajjataqui.

34. Ucatsti Ismaelajj jiwjjänwa, Nahom sat chekaujana imantataraquïna.

35. Ucatsti Ismaelan phuchanacapajj awquipan chhakatapata chʼusa wasaran tʼakhesïwinacapat sint jaqhusipjjäna. Awquejjan jupanacaru Jerusalen oraket irpsutapata jupanacajj jupar thuthusipjjäna, sasina: Awquejjajj jiwatäjjewa. Jisa, nanacasti aca chʼusa wasaran wali saranucupjjta, walja llaquisïwimpi tʼakhesipjjaracta, mankʼat awtjañampi, umat pharjañampi, chʼajjmisiñampi. Take uca tʼakhesïwinac khepatsti nanacajj mankʼat awtjayasisa chʼusa wasaran jiwarapjjäjja.

36. Uqham jupanacajj awquejjaru nayaruraqui thuthusipjjetäna; wastat Jerusalenar cuttañ munapjjaraquïna.

37. Lamanajj Lemuelaru Ismaelan yokanacaparu säna: Jina, awquejjaru jiwayapjjañäni, uqhamaraqui nanac jilïrinacapjjaru sarayirisäñ yatichirisäñ catjjarusqui, uca Nefi jilajjaru jiwayapjjaraquiñäni.

38. Jichhasti, jupajj Tatitojj nayamp arustʼi si, uqhamaraqui alajjpach qhitanacajj chʼamampi yanapitu saraqui. Ucampisa jupan jiwasaru cʼarisitapjj yatipjjtanwa. Ucanacjj sapjjestu, walja cunanacjj salamancjañ yatiñapampi luraraqui, jiwasan nayranacasaru sallkjañataqui. uc lurasajja jupajj inas jiwasaru mä jan uñjat chʼusa wasararu irpsuñ amuychistu. Jiwasaru irpsutap khepatsti, jiwasjjaru jupa pachpa pʼekechirïñ sarayirïñs amuychi, jupan munañaparjam cʼuchïtaparjam jiwasjjaru sarayañapataqui. Uqham Lamana jilajjajj chuymanacaparu kʼapisiñatac tircuyäna.

39. Ucampis Tatitojj nanacampïnwa. Jisa, Tatitun arupajj purisaw jupanacaru walja arunacjj arsüna, jupanacaru sinti tokenokaraquïna. Jupanacajj Tatitun arupan tokenokatäsinjja, kʼapisïwipat juchanacapat cutiquipstapjjäna. Ucatwa Tatitojj wastat mankʼañ nanacaru churapjjetäna, nanacan jan jiwarañajjataqui.