1. Wasitata: Istʼapjjeta, jumanaca Israelan utapa, marcajjan awatirinacapan ñankha luratanacap layc yakhachatäpcta ankar jakonucutäpcta ucanaca. Jïsa, take jumanaca, yakhachatanaca, take toker ananucutanaca, jumanacaw marcajjäpjjtajja, Israelan utapa! Nayar istʼapjjet lamaranquir islanaca; ucatsti ischʼuquipjjam jayanacanquir jakenaca. Tatituw puracancta ucqhatpach jawsitu. Taycajjan puracapatpach nayan sutijj ayti.

2. Lacajjarojj mä ari espadjam tucuyi. Amparapan chʼiwipampiw imantitu. Mä lluskʼa michʼi lawjam tucuyitu. Michʼi kʼepnakañaparuw imantitu.

3. Ucat nayar situ: Israelay, jumajj lokerijjätawa. Juma tokew nayajj khapakaptayatäyä.

4. Nayasti sistwa: Inamayaw take chʼam tucta; inamayaw chʼamajj thalsusta. Chekpachan taripäwijjajj Tatitun amparapanquiwa, luräwijjasti Diosajjampiraquiwa.

5. Purac mankhetpach lokeripäñatac utjayquit uca Tatituw parli, Jacobor wasitat jupar irpañajjataqui. Israelajj janis mayachthapisc-chinejja, Tatitutaquejj munatäyäwa, Diosajjasti nayan chʼamañchirijjäniwa.

6. Ucat jupajj saraqui: Jacobon tamap jachʼar aptañatac lokerijjäñamajja janiw chʼamäquiti, jucʼaquiwa Israelan jiltʼapar cutsuyañataqui. Uqhämaraquiw gentilenacan khanapäñamatac jumarojj uscüma nayan khespiyäwijjäñamataqui oraken thiyanacapcama.

7. Jakenacajj uñisipqui ucaru, marcajj uñisqui uca sarayirinacan lokeriparojj aqhäm siw Tatitojja, Israelan Khespiyiripajja, jupan Kollanapajja: Pʼekechirinacajj uñjasaw saytʼasipjjani; Pʼekechirin yokanacapasti yupaychapjjaraquiniwa, Tatitun arsutap phokherïtap laycu.

8. Aqhäm saraquiw Tatitojja: Wactʼir pachan jumanacar istʼapjjsma, lamaranquir islanaca, khespiyasiñ urun jumanacar yanapapjjaracsma. Jumanacarojj imapjjämawa; lokerijjarusti catuyapjjämawa marcamp arusjatäcasp uqhäma, oraker ut-tʼayañataqui, chʼusa jaytanucut tutinac jupanacar catokayañataqui;

9. Catuntat jakenacarojja, mistupjjam, sañamataqui; chʼamac taypincapqui ucanacar uñstapjjam sañamataquiraqui. Jupanacajj thaquinacan awatitäpjjaniwa, chʼijinacasti take amstanacan utjani.

10. Jupanacasti janiw mankʼat awtjayascaniti, umats pharjayascaniti. Janiraquiw intis lupis jupanacarojj tʼakhesiycaniti, cunalaycutejj jupanacar qhuyapayirejj irpascaniwa, uma jalsunac jacʼaruw irparaquini.

11. Take kollunacajjsti thaquiruw tucuyä. Jachʼa thaquinacajjasti aytatäniwa.

12. Uqhämasti, Israelan utapa, uñjam, ucanacajj jayat jutani; uquïrinacasti alay toketa, jalant toket jutapjjani; yakhanacasti Sinim sata oraket jutapjjaraquini.

13. Kʼochupjjam alajjpachanaca; cusisim orake, cunalaycutejj jalsu tokenquirinacan cayunacapajj suma tacnokatäniwa. Yupaychañ kʼochunacamp warartatapjjam kollunaca, cunalaycutejj jupanacajj janiw mayamps jawkʼantatäpcaniti, Tatituw marcaparojj chuymachi, tʼakhesit jakenacapatsti qhuyapayasiniwa.

14. Ucampis Sionajj siwa: Tatitojj jaytanucutuwa. Nayatsti Tatitujjajj armasituwa –sasa. Ucampis jupajj jan armasitap uñachayani.

15. Mä warmejj ñuñusquir wawapat armasispati? Puracapat mistur wawapat jan qhuyapayasiñapcamajj armasispati? Jupanacajj armaspasa, nayajj janiw jumatjj armascämati, Israelan utapa!

16. Uñjam, acajj ampar phujujjar kellkantatäcasmas uqhamätawa. Perkanacamasti sapüruw nayan nayrakatajjanqui.

17. Jumar tucqhirinac contrajj mäquiw wawanacamajj saytʼapjjani. Jumar tucqhirinacasti jumatjj jithektasipjjaniwa.

18. Uñtam, ucatsti take tok uñatataraquim. Take ucanacaw mayachthapisipjje, ucatsti juman ucaruw jutapjjaraquini. Cunjämatejj nayajj jacasctjja –siw Tatitojja, take jupanacat isthapitäyätawa, cʼachachasiñ isïcaspas uqhäma, jakechasir tawakojj sum wactʼasis isthapisqui uqhämaw ucanacamp wacʼantasïta.

19. Cunalaycutejj chʼusawjanacamampi, jaytanucut orakenacamampi, tucqhatäcän uca orakempejja, jichhajj sinti cʼullcʼüniwa, ucanacan utjirinaquïpana. Jumar mankʼantcäyätam ucanacasti jayar jakonucutäpjjaniwa.

20. Nayrïr wawanacam chhakayatam khepatsti, utjcanis uca yakha wawanacamajj wasitat jinchumar sapjjani: Acawjajj sinti jiscʼaw nayataquejja; yakhawjay churita ucqhan jacañajjataqui.

21. Ucat jumajj chuymaman säta: Qhitis acanac jathasirapitu? Nayajj wawanacajj chhakayasjjtwa, jichhasti, kʼala tucqhatätwa, catuntataraquïtwa, mä toket yakha tokeruw muyuycur uñtat sarnakta. Qhitis acanac uywi? Nayajj jaytanucutätwa. Acanacasti, cawqhancapjjaraquïnsti?

22. Aqhäm siw Dios Tatitojja: Acajjay amparajj gentilenacaruw aytä; unañchäwijjsti marcanacataquiw aptaraquï. Jupanacasti yokall wawanacamjj ichunipjjaniwa; phuchanacamsti callachinacapjjaruw apapjjaraquini.

23. Pʼekechirinacasti jumanacan uywirimäniwa; pʼekechirinacan warminacapasti jumanacan ñuñuyir taycanacamäpjjaraquiniwa. Oraker alintasaw jupanacajj nayrakataman quilltʼasipjjani, lakʼamp chhaktat cayunacam jupanacajj jallkʼapjjaraquini. Nayan Tatitütajj jumajj yatïta, cunalaycutejj nayar suyir jakenacajja, janiw pʼenka tucupcaniti.

24. Mankʼañajj wali chʼaman jaket apakatäniti? Jan ucajja, leyirjam catuntatanacajj antutayatäpjjanicha?

25. Ucampis Tatitojj aqhäm siwa: Catuntatanacamp-pachaw chʼaman jaketjj apakasjjani, chʼaman jaken mankʼapajj antutayataraquïniwa, cunalaycutejj qhitinacatejj jumamp chʼajjwkanejja, nayaw ucampejj chʼajjwä, wawanacamarusti khespiyaraquïwa.

26. Jumar tʼakhesiyirinacamarojj jupan quipca janchip mankʼayä. Quipca wilapampiw machantapjjani, vinompis machantapcaspas uqhäma. Ucat take jakejj uñtʼani, nayan Tatitütajja, juman Khespiyirimätajja, juman Cutsuyirimätajja, Jacobon chʼamanipätajjaraqui.