1. Ucanac khepatsti, nanacajj take cunayman casta jathanac apthapipjjäyäta, kolu jathanacat sipana, cunayman casta achunacan jathapataraqui.

2. Ucatsti, awquijjajj wasaran kamcasajja, nanacarojj aqhäm sasaw parlapjjetäna: Nayajj mä samc samcta, jan ucasti, mä uñjäw uñjta –sasa.

3. Cunanactejj uñjcta uca laycuwa, Tatitun cusisiñajjajj utjitu Nefimpita Samampita, cunalaycutejj amuytwa, jupanacampi sarakerinacapat waljanimpiw khespiyasipjjani.

4. Ucampis Laman, Lemuel, jumanacat walpun ajjsarayasta; cunalaycutejj mä chʼamac llaquiscay chʼusa wasar samcajjan uñjquirists uqhäm amuyta.

5. Ucatsti, mä jakeruw uñjta, jankʼo isin istʼata. Jupasti purinisin nayrakatajjaruw saytʼasi.

6. Ucatsti, jupajj nayaruw parlitu; jupar arcañajjataquiw parljjayaraquitu.

7. Jupar arcascasasti, nayajj chʼamac llaquisiñ chʼusa wasaran jicjjatasitajj amuyasta.

8. Walja horanac chʼamacan sarasinsti, Tatitut mayisiñ kallt-ta, nayat qhuyapayasiñapataqui, jan amuycay suma munasiñaparjam nayat qhuyapayasiñapataquiraqui.

9. Ucatsti, Tatitut mayisisinjja, mä jachʼa chʼusa pamp uñjta.

10. Ucat mä kok uñjta. Uca kokan achupasti wali muncañänwa jaker cusisiyañataqui.

11. Ucat nayajj jacʼachasisin, kokan achupat mankʼta; uca achusti, yakha achunac mankʼcäyät take ucanacat sipan suma mojjsänwa. Jïsa, uca kokan achupan jankʼötap uñjaracta. Uqhäm suma jankʼjja, janipuniw cunapachas uñjirïcti.

12. Uca kokan achup mankʼcäyät ucqhajja, chuymajjajj sinti jachʼa cusisiñampiw phokhantasi. Ucat familiajjan uca achut mankʼañap munaracta, uca achun yakhanacatac asquïtap yatitajj laycu.

13. Inas familiajjar jicjjatchï –sas uñatatasinjja, mä jawir uñjta. Uca jawirasti, cawquïr kokan achuptejj mankʼascäyät uca koka jacʼanjam umajj jalascäna.

14. Cawqhat-tejj umajj jalscän uc yatiñatac thaktasinsti, uma jalsurojj nayat jacʼanjamac uñjta. Uca uma jalsu jacʼan Saria taycamampir, Samampir Nefimpirojj uñjaracta. Jupanacasti ucawjanjja, janis cawcsar sarañs yatisipcaspajj uqhämaw ucqhancasipcäna.

15. Ucatsti, nayajj jupanacaruw qhiwtʼta, jachʼat artʼaracta, nayan uc jutapjjañapataqui, cuna achtejj mankʼcta uca ach mankʼapjjañapataqui, uca achun takenitac asquïtap yatisina.

16. Ucatsti, jupanacajj nayan uc jutapjjäna, uca achut mankʼapjjaraquïna.

17. Ucatsti, Lamanampin Lemuelampin achut mankʼer jutañap munaraquïyäta. Ucat inas jupanacar uñjarac-chï –sasaw jawiran uma jalsup toker uñt-ta.

18. Ucatsti, jupanacaruw uñjta, ucampis jupanacajj janiw achut mankʼerejj jutañ munapcänti.

19. Ucatsti, mä jiru lawa uñjaracta. Ucasti jawir irananjam jisqhatat-tatänwa; cawquïr koka jacʼantejj saytʼcäyät uca kokaruw sarayaraquïna.

20. Ucatsti, mä cheka cʼullcʼu thac uñjaracta. Ucasti jiru lawan jacʼap saräna, cuna kok jacʼantejj nayajj saytʼcäyät uca kokcama. Uca cʼullcʼu thaquisti, uma jalsut sarascaquïnwa, mä jachʼa chʼusa pampcama. Ucasti mä jachʼa orakëcaspas uqhamänwa.

21. Ucansti jan jactʼcay jake tamanac uñjta. Uca tama jakenacatjja, waljaniw chʼamachasipjjäna kokar irpir thaquir puriñataquejja. Nayasti uca kok jacʼan saytʼatäscäyätwa.

22. Ucatsti, jupanacajj jutapjjänwa; kokar irpir thaquinjam sarantapjjaraquïna.

23. Ucatsti, mä chʼamac urpuw sarti, jïsa, mä sinti jachʼa chʼamac urpupunïnwa. Uca thaquinjam sarantirinacasti thac chhaktayasisin thaquit saranucupjjäna, chhaktapjjaraquïna.

24. Ucatsti, yakhepanacaruw nayrakatar sarañ munas chʼamachasir uñjaracta. Jupanacasti nayrakatar mistsusinjja, jiru lawan thiyapat cat-thapisipjjäna, ucat chʼamac urpu taypinjam sarantapjjäna, jiru lawat catuntasisa. Uqhämat kokacamajj purinipjje, ucatsti achupat mankʼapjjaraqui.

25. Kokan achupat mankʼantasinsti, take tokeruw uñatatasipjjäna, pʼenkasipcaspas uqhäma.

26. Nayasti, take tokeruw uñatatasiracta, ucat jawir qhurcatan mä jachʼa uta utachrantat uñjta. Uca utasti oraket wali alajjan tuycaspas uqhamänwa.

27. Uca utansti jakenacajj phokhänwa; waynanaca, chuymaninaca, tawakonaca, chachanaca, warminaca. Wali suma isimp isthapitäpjjaraquïnwa. Koka thiyar jutapcäna, achupat mankʼapcaraquïn ucanacat sawcascaspas uqhämaw ampar lucʼanamp uca jakenacarojj wic-chʼuquipjjäna.

28. Jupanacasti achut malltʼasinjja, pʼenk tucupjjäna, jupanacat sawcasipcän ucanac laycu. Ucatsti jan sarapjjañapäcäns uca thaquinacar jalantasaw chhaktapjjaraquïna.

29. Jichhasti, naya Nefejj janiw awquijjan take arunacap kellkcti.

30. Ucampis kellkatajjan jiscʼaquïñapataquejja, kellkañ munta cuntejj jupajj yakha jake tamanacar nayrakatar sarantañatac chʼamachasisquir uñjcäns uca. Jupanacasti purisinjja, jiru lawan thiyapat cat-thapisipjjäna. Ucatsti nayrakatar sarasaw chʼamachasisipcaquïna, ucatsti jiru lawat jan phisayasisaw puriniñapcam jutapjjäna. Ucatsti oraker quilltʼasisin kokan achupatjj mankʼapjjäna.

31. Yakha jake tamanacarojj uñjaraquïnwa, jupanacajj llamctʼas yantʼasaw thaquinjam sarasipcäna uca wali jachʼa ut uñcatata.

32. Ucatsti waljaniw uma jals pʼiyanacan ajjscatapjjäna; waljaniraquiw chhaktapjjaraquïna mayja thaquinacapar saranucusin chhaktasa.

33. Uca jachʼa utar mantapcän uca jake tamanacajj waltʼatapunïnwa. Jupanacasti uca uta mankhar mantasinjja, nayampir achut mankʼerinacampirojj ampar lucʼanapampiw wic-chʼuquinipjjaraquitu. Ucampis nanacajj janiw yäkapcti.

34. Acanacaw awquijjan arunacapajja: Take qhitinacatejj jupanacar yäkapcän ucanacajja, chhakapjjänwa.

35. Lamanamp Lemuelampejj janiw achut mankʼapquiti –sasaw awquijjajj saraquïna.

36. Ucatsti, awquijjan take samcap jan ucajj uñjäwip nanacar yatiyatap khepatjja, aqhäm sapjjetuwa: Uñjäwin uñjcta ucatjja, walpin Lamanampit Lemuelampit ajjsarayasta. Jïsa, jupajj ajjsarayasïnwa, jupanacajj Tatitun nayrakatapat jakonucutas uñjasiñapäpcaspas uqhäma.

37. Ucat jupajj llampʼu suma awcjamaw take munasiñamp jupanacarojj ewjjtʼäna, jupan arunacapar yäkapjjañapataqui, inas uqhämat Tatitojj jupanacat qhuyapayaschispa, jan jakonucut uñjasipjjañapataqui. Jïsa, awquijjajj jupanacarojj yatichänwa.

38. Ucat jupanacar yatichasinsti, cunanacatejj khepürun lurascan ucanac arjäna. Ucatsti, Tatitun camächitanacap imapjjañapataquiw ewjjäna; ucat jupanacar parlañ tucuyäna.