7ri Jalja
Lehin yokanacapajj wastat Jerusalenaru qhitatäpjje–Ismaelampi utapampejja Lehin familiapampi chicañ arustʼapjje–Cutcatäwi–Nefejja phalancamp ñachʼatäsa, iyawsañan chʼamapampi antutayatawa–Cutcatasiri jilanacapajj juchat cutiquipstapjje.
1. Jichhasti, jumanacan yatiñamjj munirista, Lehi awquejjan jathapat arjañ tucuyatap khepatjja, Tatitojj wastat juparu arsünwa, aqham sasina: Lehi, familiamar sapaqui chʼusa wasararu irpañamajj janiw walïcaspati. Antisasa, yokanacamajj phuchanac warminacapataqui catokapjjañapawa, jupanacan jathanac Tatitutac jathachañapataqui arsuta orakena.
2. Ucatsti Tatitojj jupar camachit churäna, naya Nefimpina jilanacajjampin wastat Jerusalenaru cuttapjjañajjataqui, Ismaelamp familiapampejj chʼusa wasararu irpaniñajjataqui.
3. Ucatsti, naya Nefejja wastat jilanacajjampi wasararu saräyäta, Jerusalenar maqhatañataquejja.
4. Ucatsti Ismaelan utaparu maqhatapjjäyäta. Ismaelan uñjataparjamaw sumancapjjta, ucat nanacajj Tatitun arunacapjj jupar arsupjjäyäta.
5. Ucat Tatitojj Ismaelan chuymapar llampʼuptayäna, uqhamaraqui familiapan chuymaparus llampʼuptayaraquïna, jupanacan nanacamp chic wasararu sarañanacapataqui awquejjan chʼujllaparu.
6. Ucatsti, wasaran sarasinjja Lamanamp Lemuelampejj Ismaelan phuchanacapat panimpi uqhamaraqui Ismaelan yokanacapat panejja, familianacapampejj nanacjjar cutcatapjjetäna, jisa, naya Nefiru, Samaru, Ismael sat awquiparu, warmiparu, jupan yakha quimsa phuchapampiru.
7. Uca cutcatäwinsti jupanacajj Jerusalen oraker cuttañ munapjjäna.
8. Ucat naya Nefejja chuymanacapan chʼollkhëtapat llaquisisina, jupanacaru, jisa, Lamanampir Lemuelampiru arjjayäyätwa sasa: Jumanacajj nayan jilïrinacajjäpjjtawa. Cunjamats chuymanacamajj uqham chʼollkhejja, amuyunacamas uqham juyqhojja, naya sullcaman jumanacaru eojjañajjansa, cunjam jumanacan jacañamäqui ucjj uñachayañajjans waquisiñapcama?
9. Cunjamats Tatitun arupar jan yäkapjjta?
10. Cunjamats Tatitun alajjpach qhitapar uñjatamat armasipjjta?
11. Jisa, jiwasaru Labanan amparapat khespiyasa kellkat catuñasataqui Tatitun uca jiwasatac lurat jachʼa luräwinacapat cunjamats armasipjjta?
12. Jisa, jaken wawanacapatejj Tatitur iyawsapqui uqhajja, Tatitun take cun munañaparjam jupanacatac lurañ chʼamanïtapjj cunjamats armasipjjta? Ucatwa, jupar iyawsapjjañäni.
13. Jiwasanacatejj juparu iyawsapcañänejja, arsut orakjj catokapjjañäniwa. Mä khepürunjja jumanacajj yatipjjaraquïtawa, Tatitun Jerusalenan tʼunjatäñapat arupan phokhatapata. Cunanactejj Tatitojj Jerusalenan tʼunjatäñapjjat siscänjja take ucanacajj phokhasiñapawa.
14. Cunalaycutejja Tatitun Ajayupajj jupanacamp kʼewtasiñ niyaw tucuyani, jupanacan arjirinacar jan catokatapata, Jeremiasar carcelar jakontatapata. Jupanacasti awquejjan jacañap apakañ chʼamtʼapjjaraquïna, jupar oraket alissuñcama.
15. Jichhajja, nayajj jumanacar sapjjsmawa, jumanacatejj Jerusalenar cut-tapjjätajja, jupanacampiw jiwarapjjäta. Jichhasti, ajlliñatac chʼamatejj jumanacan utjchejja uca oraker maqhatapjjam, amtapjjaraquim cuna arunactejj jumanacar arsupjjsma: Jumanacatejj sarapjjätajja jiwarapjjaraquïtawa sasa, cunalaycutejj uqhama Tatitun Ajayupajj nayaru arjjayayitu.
16. Ucatsti, naya Nefejja uca arunacjj jilanacajjaru arjjaycäyät ucapachajja, jupanacajj nayampi kʼapisipjjänwa. Ucatsti amparanacap nayjjaru ayjjatapjjetäna, jupanacan sinti kʼapisitanacap laycu. Jupanacasti phalanacampi ñachʼantapjjaraquitäna, jupanacan jacañajj apakañ munatap laycu, wasarana nayar jaytanucuñapataqui, ajjsarcañ lakʼonacan mankʼantatäñajjataqui.
17. Ucampis nayajj Tatitut mayisïyätwa, sasa: Tatay, nayan jumar iyawsañajjarjamaw jilanacajjan amparanacapat antutayita. Jisa, chʼam churita, cunanacamp ñachʼantatäctsa uca phalanacar tʼakjjañajjataqui.
18. Ucatsti uca arunac arscäyätjja ucspachaw phalanacajj amparanacajjat cayunacajjat jarartäna. Nayasti jilanacajj nayrakatana saytʼäyäta, wasitat jupanacaru arjjaraquïyäta.
19. Ucat wastatamp jupanacajj nayaru kʼapisipjjäna, nayjjar amparanacampi cat-thapiñ chʼamtʼapjjaraquïna. Ucampis Ismaelan phuchanacapat maynejja, uqhamaraqui jupan taycapampi, Ismaelan yokanacapat maynimpi jilanacajjaru wal achictʼasipjjäna, chuymanacapar llampʼuptayañcama. Jilanacajjasti janiw jucʼamp jacañajj apakañ munapcjjänti.
20. Ucatsti jupanacan ñankhätap laycu jupanacajj wali llaquisipjjäna nayan nayrakatajjaru quilltʼasiñcama, nayaru wali achictʼasiñcama, cuntejj nayaru lurapquitäna uca luräwipar pampachañajjataqui.
21. Ucatsti, jupanacajj lurapquitäns take ucanacjj nayajj chekpachaw pampachäyäta. Jupanacar eojjaraquïyätwa, jupanacan Tatitut mayisiñapataqui juchanacapar pampachañapataqui. Ucat jupanacajj uqham lurapjjäna. Jupanacan Tatitut mayisiñ tucuyatap khepatsti, awquejjan chʼujllap ucsaru wasitat sarapjjäyäta.
22. Ucatsti awquejjan chʼujllaparuw sarakanipjjäyäta. Nayampina jilanacajjampina take Ismaelan utapampejja awquejjan chʼujllapar purinitajj khepatjja jupanacajj Dios Tatitupar yuspagar churapjjäna; uqhamaraqui loktäwinacjja, naqhata loktäwinacs jupar loktapjjaraquïnwa.