1. Jichhajja, Jacobo, jumar arssma: Wasaran tʼakhescäyätsa ucürunacan nayrïri yurit yokajjätaw jumajja. Jiscʼalaläsajja, jilanacaman khorütap laycu jumajj tʼakhesïyätawa, llaquisiraquïyätawa.

2. Ucampis Jacobo, wasaran nayrïri yurit yokajja, jumajj Diosan jachʼätapjj uñtʼtawa. Jupasti tʼakhesïwinacamjj kollanaptayani, juman ucanacat sumjj catokañamataqui.

3. Ucat jumajj qhuyapayatäyatawa, jumasti Nefi jilamampi sumancas utjaraquïta. Urunacamasti Diosamar lokasa yupaychañataquïniwa. Ucatwa, Cutsuyiriman asquïtap laycu juman cutsuyatätam yattwa, cunalaycutejja phokha pachanacanjja jakenacar khespiyañatac jupan jutañap niy uñj-jjäyätaw jumajja.

4. Jumasti jiscʼalaläsajja jupan khapak cancañapjj uñjäyätawa. Uca laycojja, qhitinacarutejj jupajj janchinjj tumpcani ucanacjam qhuyapayatätawa, cunalaycutejj Ajayojj quipcawa wasüru jichhüru wiñayataqui. Jaken tincüwipatjja thaquejj waquichatawa; khespiyasiñajja inaquiwa.

5. Jakenacasti yatichatäpjjewa sums ñanks uñtʼañapcama. Leyisti jakenacar churatawa. Leyisti janiw qhitirus jan juchani uñstaycaraquiti, jan ucajja, jakenacajj leyin jarcʼakatäpjjewa. Jisa, jupanacajj acapach leyin jarcʼakatäpjjäna. Uqhamaraqui kollan ley laycu jupanacajj asquïqui ucjjat apakatäpjje wiñayataqui sinti llaquisit tucupjjaraqui.

6. Ucatwa, Kollan Mesiasanjja, Kollana Mesias toketa cutsuyañajj puri, cunalaycutejj qhuyapayäwimpi chekäñampejj jupan phoktʼatawa.

7. Juchanacatac loktäwjama jupa pachpaw loktasi take pʼaquit altʼat chuymani jakenacatac leyin cunataquïtap phokharapiñataqui; janiraquiw yakhataquejja leyin cunataquïtap phokhcaraquispati.

8. Uca laycojja acapach orakenquirinacaru ucanacjjat yatiyañajja wali waquisi jupanacan aqham yatiñapataqui: Janiw qhiti janchisa Diosampi jaccaspati, jan ucajja Kollana Mesiasan asquïtanacap qhuyapayäwip munasïwip laycuqui. Jupasti quipca janchi jacañap apakayasini, ucat Ajayun chʼamapampi wasitat jacañap catjjarusiraquini jiwatanacan jactäwipa puriyañapataqui. Jupasti nayrïri jactiriraquïniwa.

9. Ucatwa jupajj Diosan nayrïri achupawa, cunalaycutejja take jaken wawanacapataqui jupajj chicanchani. Juparu iyawsirinacasti khespiyatäpjjaniwa.

10. Uca takenitaqui chicanchäwi laycu, take jakenacajj Diosar jutapjjani. Ucatwa, jupanquiri cheka cancañaparjama kollan cancañaparjamaw jupan jupanacar taripañapataqui, jupanacajj jupan ucan saytʼapjjani. Ucatwa Kollanäqui Ucan churata leyin cunataquïtapajja, uca leyir chictʼatäquejja uca mutuyäwimpi mutuyañataqui; (uca leyir chictʼat mutuyäwejja leyir chictʼat cusisiñat maysäjjanquiwa), juchanacan tʼakhesiyäwinacaparu phokhañan cunataquïtap phokhañataquiwa–

11. Cunalaycutejj maysat maysancañajj take cunanacan waquisi. Wasaran nayrïri wawachat yokajja, janitejj uqhamäcaspajja, asqui cancañajj janiw uttʼayañjamäcaspati, ñankha cancañas janiraqui uttʼayañjamäcaspati. Kollan cancañamp llaqui cancañampi janiw uttʼayañjamäcaspati, janiraquiw suma cancañamp jan wali cancañampi ut-tʼayañjamäcaspati, janiraquiw suma cancañamp jan wali cancañampi ut-tʼayañjamäcaraquispati. Ucatwa take cunanacan mayaruw chictʼatäñapajj waquisispajja. Ucata ucanacatejj mayaquïspajja jiwatjamaw kheparaspajja, jan jacañani jan jiwañani, janirac thujsantañ cancañani janirac jan thujsantañ cancañani, jan cusisiñani jan llaquisiñani, janiraqui amuyuni janiraqui jan amuyuni.

12. Ucatwa jan cunataqui luratäsapäna. Luratäñapasti inamayaquïsapäna. Ucatwa, ucajj Diosan amuyuparu tucjaspawa, cunanacataquitejj jupajj take cun lurqui ucanacjj tʼunjaraquispajja, uqhamaraqui Diosan chʼamaparu, qhuyapayäwiparu chekapäñaparu tucjaraquispa.

13. Jumanacatejj janiw ley utjquiti sapjjätajja, janiw juchajj utjcaraquiti sapjjaraquïtawa. Janiw juchajj utjquiti sapjjätajja janiraqui asqui cancañajj utjcaraquit sapjjätawa. Janitejj asqui cancañajj utjquejja janiw cusisiñajj utjcaraquiti. Janitejj asqui cancañampi cusisiñampi utjquejja, janiw mutuyañamp tʼakhesiñampejj utjcaraquiti. Janitejj ucanacajj utjquejja janiw Diosajj utjcaraquiti. Janitejj Diosajj utjquejja, jiwasajj janiw utjctanti, orakes utjcaraquiti, cunalaycutejj janiw mä cunanac luräwis utjcaspati, sarayañataquisa sarayatäñataquisa. Ucatwa take cunanacan ina chʼusaru chhaktañapajj waquisispawa.

14. Jichhasti yokanacajja, ucanacjj arsupjjsma jumanacan sum catokañamataqui, yatekañamataqui; cunalaycutejj mä Diosaw utji, jupasti take cunanacjj luri; alajjpachanacsa, oraksa, take ucanacan utjquejja take ucanacsa, sarayiri cunanacsa, sarayata cunanacs luri.

15. Diosan nayrïri awquis taycas luratap khepatjja, orakenquiri lakʼonacjja, alajjanquiri jamachʼinacjja, jisa, take luratäquisa ucanacjj luratap khepatjja, jakenacan cunatac utjatapjj Diosan wiñay munañaparjam phokhañataquejja, cunanacpur maysat maysancañajj waquisïnwa. Jisa, jarcʼata achojja jacañ kokata maysanqui; mayasti mojjsawa mayasti cʼallcʼuwa.

16. Ucatwa Dios Tatitojj jakeru chʼam churi jupanacan pachpatac ajlliñapataqui. Ucatwa, janitejj jakejj mayana, jan ucajj yakhana amuyayatäcasapänjja, janiw jupajj pachpataqui cuns lurcasapänti.

17. Cuna kellkanactejj naya Lehejj arsuycta ucanac laycojja aqham amuyta: Kellkatäqui ucarjamajja, Diosan mä qhitapajj alajjpachata jalakäna, ucatwa Diosan nayrakatapan ñankhäquis ucjj thakatapata mä supayaru tucüna.

18. Jupan alajj pachat jalaktatap laycu, wiñayataqui sinti llaquisiri tucutap laycu, takpach jakenacan llaquisiñapjj munapuniwa. Ucat jupajja, jisa, supayäquis uca nayrapach catari, take cʼarinacan awquipäquis ucajja Evaru säna: Uca jarcʼat achuta mankʼam. Jumasti janiw jiwcätati, antisas Diosjamäyatawa ascs ñanks yatisa.

19. Ucatsti Adanamp Evampejj jarcʼat achut mankʼapcän uca khepatjja, Eden huertat alissutäpjjänwa, orak yapuchañataqui.

20. Jupanacasti wawanac utjayapjjäna, jisa, aca orakenquir familjj utjayapjje.

21. Diosan munañaparjamaw jaken wawanacapan urunacapajj jachʼaptayatäna, jupanacan janchinïsajj juchat cutiquipstañanacapataqui. Ucatsti utjäwipajj mä yantʼañ utjäwiru tucüna. Dios Tatitojj jaken wawanacaparu churcäns uca camachitanacarjamawa urunacapajj jachʼaptayatänwa. Cunalaycutejj jupajj take jakenacaru taycapan awquipan ley pʼaquitap laycu jupanacan chhakatapa uñachayäna. Ucatwa jupaw jupanacaru camachit churäna take jakenacan juchat cutiquipstasiñapataqui.

22. Jichhajj amuyapjjam: Janitejj Adanajj ley pʼaccasapänjja janiw tinccasapänti, antisas Eden huertan kheparasapäna; take cunanacatejj luratäcänjja take ucanacajj khepararaquisapäna cunjamatejj luratäcänjja uqhampacha, uqham wiñayatac jan tucusir kheparapjjaraquisapäna.

23. Jupanacasti janiraquiw wawanacanïpcasapänti. Ucat jan yatiñ utjäwinjja kheparapjjasapäna, jan cusisiñanïsa llaquiru jan uñtʼatap laycu, sum jan lurasa juchar jan uñtʼatap laycu.

24. Ucampis qhititejj take cunanac yatqui ucan suma amuyuparjamaw take cunanacajj luratawa.

25. Jakenacan utjañapataqui Adanajj tincünwa. Jakenacasti utji, jupanacan cusisiñapataqui.

26. Phokha pachanacanjja Mesiasajj jutani, jaken wawanacapjj uca tincüwita cutsuyañapataqui. Jupanacan tincüwit cutsuyatap laycusti wiñayataquiw antutatäpjjani, ascs ñanks yatisa, jupanac pachpataqui cunanac lurañapataqui jan yakhan sarayatäñapataqui, jan ucajja, Diosajj churcäns uca camachitanacaparjamaw leyin mutuyäwipan sarayatäñapataquiqui uca jachʼa khep khepa urunjja.

27. Ucat janchinjja jakenacajj munañaparjam cunanac lurañapatac antutatäpjjewa. Take cunanacatejj jakenacataqui waquisqui take ucanacajj jupanacaru churataraquiwa. Antutatäpjjewa antutatäwiru wiñay jacañaru ajlliñapataqui, take jakenacataqui uca jachʼa chicanchäwi toketa, jan ucajja catuntatäwiru jiwañaru ajlliñapataqui, supayan catuntäwiparjama chʼamaparjama, cunalaycutejj jupajj take jakenacan jupjam wali llaquisiñanacap muni.

28. Jichhasti, yokanacajja, nayaw muniristjja jumanacan uca jachʼa Chicanchiriru uñjañamjja, jupan jachʼa camachitanacaparu phokhañamsa, arunacaparu iyawsirïñamsa, wiñay jacañaru ajlliñamjja, jupan Kollan Ajayupan munañaparjama.

29. Munaraquirista jumanacan wiñay jiwañaru jan ajlliñamjja, janchin munañaparjama ucanquiri ñankhätarjama; ucasti supayan ajayuparu catuntañatac chʼam churi, jumanacar mankhapacharu puriyañapataqui, jupan jumanacjjaru sarayañapataqui jupan quipca marcapana.

30. Aca jucʼa arunacjja take jumanacaruw arsupjjsma, yokanacajja, nayan yantʼäwi urunacajjata khepïri urunacanjja. Diosan arjirin aruparjam asquïqui ucjj nayajj ajlltwa. Janiw cunataquis ucanacjj lurcti jan ucajja, jumanacaman wiñayataqui sumancañamataquiquiw ucanac lurta. Uqhamäpan.