1. Amozan Isaias yokapajj uñjcän uca Judampit Jerusalenampit aruwa.

2. Ucasti khep khepürunacan purinini, cunapachatejj Tatitun utapan kollupajj apachit kollu patanacan ut-tʼayatäcani, take kollunacat sipan aytatäcani, take marcanacasti ucar jaltas mantcani ucürunacajja.

3. Ucat Sionat leyejj mistuni, Jerusalenat Tatitun arupajj mistuni. Ucatjja walja jakenacaw sapjjani: Jutapjjam, Tatitun kolluparu, Jacobon Diosapan utapar maqhatapjjañäni. Jupasti sarnakäwipjjat yatichapjjestani; jiwasanacasti thaquinacapanjam sarnakapjjañäni.

4. Jupasti marcanac taypin taripani, walja marcanacaruw tokenokaraquini. Jupanacasti espadanacapat kholliñ rejanac lekʼsupjjani, wara lawanacapatsa jusinac lekʼsupjjaraquini. Mä marcajja janiw yakha marcatac espad aytcaniti. Janiraquiw nuwasiñ jucʼamp yatekapcaniti.

5. Jacobon utapa, jutapjjam, Tatitun khanapan sarnakapjjañäni. Jïsa, jutapjjam. Cunalaycutejj takeniw jumanacajj maysar saranucupjjta, sapakat mayniraquiw quipca ñankha thaquinacamanjam sarnakapjjaracta.

6. Uqhämasti, Tatay! Jumaw Jacobon utapanquir jakenacamar jaytanuctajja, cunalaycutejj jupanacajj jalsu tokemp phokhantatäpjjewa, filisteonacjamaw laykanacar alcatapjje, jan uñtʼat jakenacan wawanacapat cusisipjjaraqui.

7. Orakepansti korimp kollkempejj phokhawa; jila alan yänacapasti jan tucuyaniwa. Orakepajj caballonacan phokhantatawa. Carronacapasti jan jaqhcayaraquiwa.

8. Orakepajj wacʼan diosanacan phokhantatawa. Quipca amparapan luratanacaparuw yupaychapjje, cuntejj lucʼananacapajj lurqui ucaru.

9. Ina jakejj janiw quilltʼasquiti; aytat jakes janiraquiw llampʼuptquiti; uqhämasti, juparojj jan pampachamti.

10. Ñankha jakenaca, karka mankhar mantapjjam, lakʼar imantasipjjaraquim, cunalaycutejj Tatitun ajjsarañapamp sinti jachʼätapan khapak cancañapampiw jumanacarojj tʼakhesiyapjjätam.

11. Ucatsti jaken jachʼa jachʼa uynakañanacapajj llampʼuptayatäniwa. Jakenacan jachʼa jachʼa tucutapas quilltʼayatäniwa. Tatituquiw ucürunjj aytatäni.

12. Cunalaycutejja, Nuwasiri tamanacan Tatitupan urupajj take marcanacjjarojj jancʼaquiw jutani. Jïsa, sapakat maynjjaru: jachʼa jachʼa tucurinacjjaru, aytatanacjjaru, jupa pachpa jachʼachasir jakjjaru. Ucanacasti aynachtʼayatäpjjaniwa.

13. Jïsa, Tatitun urupajj take Libanon jachʼa cedro kokanacapjjaruw purini, jupanacan jachʼätapata, aytatätapata. Uqhämaraquiw Basanan encina kokanacapjjar puriraquini;

14. Take jachʼa kollunacjjaru, take kollunacjjaruraqui, take aytat orakenacjjaru, takpach marcjjaruraqui;

15. Take jachʼa torrjjaru, take thuruptayat perkjjaruraqui;

16. Take lamaranquir barconacjjaru, Tarsisan take barconacapjjaru, take cusisiñar uñtatanacjjaru.

17. Jaken jachʼa jachʼa tucutapajj altʼayatäniwa, jakenacan jachʼa jachʼa tucutapas quilltʼayataraquïniwa. Tatituquiw ucürojj aytatäni.

18. Jupasti wacʼan diosanacarojj kʼal tucqhani.

19. Tatitojj oraker ajjsarcañjam onjjtayañatac saytʼcan ucapachajja, Tatitun ajjsarañapajj jupanacjjaruw purini; jupan sinti jachʼätapan khapak cancañapasti jupanacaruw tʼakhesiyani; ucatsti jupanacajj karka pʼiyanacampir orak putunacampiruw mantapjjani.

20. Ucürunjja jakenacajj pachpa yupaychañapatac lurasipcän uca kollke diosapa, kori diosapjja, achacunacampir chiñinacampiruw jakontani;

21. Karkanacan pʼiyarant-tatanacapar mantañataqui, saytʼat karkanacan apachitanacapar mantañataqui, cunalaycutejj Tatitun ajjsarañapajj jupanacjjaruw purini, jupan jachʼätapan khapak cancañapasti jupanacaruw tʼakhesiyani, cunapachatejj ajjsarcañjam orak onjjtayañatac sartcan ucapacha.

22. Jaket jithektam, cawquïr jakentejj samakeñapajj nasapancqui ucata. Cunans jupajj munatäspajja?