1. Ucampis uca chʼamacajja, janiw chʼamampïcaniti, cunjämtejj Diosajj nayra pachajj Zabulon orakeru, Neftali oraker mä jucʼac tʼakhesiycän uqhäma. Ucatsti cunjämtejj tʼakhesiñapjj jucʼamp yapjjatcaraquïna, Wila Lamar iranana, Jordan qhurcatana, marcanacan Galileapana.

2. Chʼamac taypin sarnakapcän uca jakenacajj mä jachʼa khanaruw uñjapjje. Qhitinacatejj jiwañ chʼiwin orakepan kamapqui ucanacjjaruw khanajj khanti.

3. Jumaw uca marcarojj jachʼaptayta, cusisiñsti yaptʼaractajja. Jupanacajj juman nayrakataman cusisipjje, cunjämatejj llamayusajj cusisipqui uqhäma. Cunjämatejj jakenacajj jila alaninac catuntasisajj cusisit jaljasipqui uqhäma.

4. Cunalaycutejj jumaw jupan tʼakhesiyir yucupjj pʼacjtajja, callachipan lawapamp tʼakhesiyiripan lawapamp pʼacjaractajja.

5. Cunalaycutejj take nuwasirin nuwasïwipanjja pejjtusiñampi ojjöwinacampiwa, isinacasti wilar korumsutaraquiwa. Ucampis aquïrinjja, naqhantäwimp nina phayañampïniwa.

6. Cunalaycutejja, jiwasanacataquiw mä wawajj naci; jiwasanacaruw mä yokall wawajj churata. Sarayañajj jupan callachipjjancaniwa; sutipasti aqhäm sutiñchatäniwa: Muspharcaña, Amuyayiri, Chʼaman Diosa, Wiñay Awqui, Sumancañan Sarayiripa.

7. Sarayañampin sumancañampin jachʼaptañapajj janiw tucuyanïquiti, Davidan sarayäw konuñapjjaru, uqhämarac jupan khapak marcapjjaru, sarapar sarapar take cun uchañataqui, asqui taripäwimp ucar ut-tʼayañataqui, jichhat wiñaycama. Nuwasiri tamanacan Tatitupan chʼamtʼañapaw uc lurani.

8. Tatitojj arup Jacobor apayi; ucasti Israeljjaruw puri.

9. Take jakenacaw yatjjapjjani, jïsa, Efrainas Samarianquirinacas yatipjjaraquiniwa. Ucanacaw chuymapan jachʼa jachʼa tucuñ chuymamp kala chuymampejj sapjje:

10. Ladrillonacajj tincuwa, ucampis lekʼsut kalanacamp ut-tʼayapjjañäni, sicomoro kokanacajj tincsutawa, ucampis ucanac lantjja, cedro kokanac uchañäni.

11. Ucat Tatitojj Rezinan timanacap jupamp nuwasiñataquejj waquichani; timanacaparusti mayachthapiniwa.

12. Sirianquirinacajj nayrakatancaniwa; filisteonacasti khepancaraquiniwa. Ucanacasti awtjat lacampiw Israelarojj mankʼantani. Uqhämäquipans colerasiñapajj janiw apaktquiti, antisaw amparapajj jichhacamas lokatatatäsqui.

13. Cunalaycutejj jakenacajja, janiw jupanacar jawkʼqui ucarojj cutcatquiti. Janiraquiw nuwasiri tamanacan Tatituparus thakcaraquiti.

14. Ucatwa mä urunac Tatitojj Israelan pʼekep qhuchhokani, uqhämarac wichʼinqhapa, laymipa, saphipa.

15. Chuyman jakejj pʼekewa; cʼar yatichir arjiristi wichʼinqhawa.

16. Aca jakenacan irpirinacapaw jupanacarojj pantjayi. Jupanacan irpatanacasti tʼunjatäpjjewa.

17. Ucat Tatitojj janiw waynanac uñjasajj cusiscaniti, janiraquiw wajchanacaparus ijma warminacaparus qhuyapaycaniti, cunalaycutejj takpachaniw chʼojjña jakëpjje, ñankh lurirïpjje, take lacaraquiw tʼajjmarar uñtat parli. Take ucajja, janiw colerasiñapjj apakquiti, antisas amparapajj jichhacamaw loktatäscaqui.

18. Ñankha cancañajj ninjamaw nakhanti. Añawayanacampir chʼaphinacampirojj nakhantaniwa. Chʼumi taypinacan nina lawr sartayani, jiwkʼejj maqhatqui uqhämaw ucanacajj maqhatapjjani.

19. Nuwasiri tamanacan Tatitupan colerasiñap laycuw orakejj chʼamactʼani, jakenacasti ninan phäñapjamäniwa, janiw qhitis jilapar khespiycaniti.

20. Ucatsti jakejj cupïjjapanquiriruw apanucuni, ucat mankʼat awtjayasini; chʼekäjjapanquirirusti mankʼantaniwa, janiraquiw ucampis sisthapcaniti. Take jakew quicpa amparapan janchip mankʼani.

21. Manasesajj Efrainaru, Efrainasti Manasesaru. Paypachaw Juda contrajj saytʼapjjani. Uqhämäquipansa, colerasiñapajj janiw apaktquiti, antisas amparapajj jichhacamaw lokatatatäscaqui.