1. Tatitojj Jacoborojj qhuyapayaniwa, Israelarusti ajlliscaquiniwa, ucatsti jupanacarojj quipca orakepan ut-tʼayaraquini. Jan uñtʼat jakenacajj jupanacampiw chicachatäpjjani, Jacobon utaparuw maqhatapjjaraquini.

2. Jakenacasti jupanacarojj catokapjjaniwa, quipca utaparuw irpapjjaraquini. Jïsa, jaya orake thiyanacatpacha, tucuy thiya orakcama. Jupanacasti arsut orakenacaparuw cut-tapjjani. Israelan utapasti ucanac catjjapjjani. Tatitun orakepasti lokerinacapataquïniwa. Qhitinacatejj jupanacar catuntapcän ucanacaruw catuntapjjani; tʼakhesiyirinacaparuw sarayapjjaraquini.

3. Ucatsti ucürunjja Tatitojj llaquisiñamat samarayätam, uqhämarac ajjsarañamata, chʼama tʼakhesiyäwimata, cawqhantejj munquir jan munquir lokañajj wactʼcäyätam ucata.

4. Ucatsti, ucürunjja jumajj aca säwi Babilonian pʼekechirip contrajj arsüta: Tʼakhesiyirejj tucusiraquisá! Kori marcas tucusiquiraquisá!

5. Tatitojj ñankha jakenacan thujrup pʼacji; sarayirinacan lawap pʼacjaraqui.

6. Sapa cut jakenacar colerasiñamp jawkʼcäna, marcanacar colerasiñamp saraycän ucanacajj arcnakatawa; janiw qhitis ucjj jarcʼcaraquiti.

7. Take acapach orakejj samariwa, amuctʼataraquiwa. Jupanacasti kʼochutatapjjewa.

8. Jïsa, abeto kokanacajj jumat cusisipjje, Libanon cedro kokanacapasti cusisipjjaraquiwa, aqhäm sasa: Juman liwisitamat acsarojj janiw qhitis nanacar qhuchhurejj jutquiti.

9. Mankhapachajj qhathatiwa, jutcät ucqha jumamp jiquisiñataqui; jiwatanacarojj jumataquiw pʼarjjtayi. Jïsa, take acapach oraken jilïrinacaparu. Take orakenacan pʼekechirinacaparuw sarayäw konuñanacapat sartayi.

10. Take jupanacaw wararipjjani sapjjaraquïtam: Jumajj nanacjamaraquit tʼuqhasta? Nanacjamarut tucta?

11. Jachʼa jachʼa luräwimajj sepulturar uchantatawa. Mandolinanacaman cuncapajj janiw istʼasquiti. Lakʼonacaw juman iquiñamajja, lakʼonacaraquiw jumarojj chhaktayaractam.

12. Cunjämatarac alajjpachat jalaktantast Lucifera, willjtan yokapa! Orakcam phatʼanucutaw uñjastajja, marcanacar tʼuqhasiyatam laycu.

13. Cunalaycutejj jumajj chuymaman sistawa: Alajjpachcamaw maqhatä. Diosan warawaranacap patjjaruw khapak konuñajj saytʼayä, ucatsti mayachthapit jakenacan kollupjjaruw kontʼasï, alay tokenquir parquinacana.

14. Alajjanquir kenayanac patjjaruw maqhatä. Alajjanquirjamaw tucü –sasa.

15. Ucampis jumajj mankhapachar jakontataw uñjasïta, jakhen thiyanacaparu.

16. Qhitinacatejj jumar uñjapcätam ucanacajja, jacʼat uñchʼuquipjjätam, ucatsti jumjjat parlaquipasajja, sapjjätamwa: Acat orak qhathatiyir jakejja? Acat marcanacar onjjtaycän ucajja?

17. Qhititejj orakerojj chʼusa wasarar tucuyqui, ucanquir marcanac tucjqui, catuntatanacapan utaps janirac jistʼarqui ucati?

18. Take marcan pʼekechirinacapaw khapak cancañan iquintapjje. Jïsa, sapakat mayniw quipca utapan utjasipjje.

19. Ucampis jumajj mä ajjtcañ laymjamaw sepulturamat jakonucutätajja, jiltʼcän ucanacar espadamp maysat mays junsut jiwayatanacjamätawa, qhitinacatejj pʼiyan kalanacapjjar puripqui ucanacjama, cayunacan taquisit amayjamaraquïtawa.

20. Orakemar thant tucjatamata, jakenacamar jiwayatamatjja, jumajj janiw jupanacamp chic imantatäcätati. Ñankh luririnacan sarakerinacapajj janiw cunapachas uñtʼatäcaniti.

21. Awquinacapan ñankh luratap laycu, wawanacapar jiwarayañatac waquicham, jupanacan jan sartapjjañapataqui, jan orakenïpjjañapataqui, acapach orakjjan marcanac jan phokhayapjjañapataquiraqui.

22. Cunalaycutejj nayaw jupanac contrajj nuwasir sartä –siw nuwasiri tamanacan Tatitupajja; Babiloniatsti kʼal phatʼsü; sutipa, jiltʼiripa, yokapa, sobrinopa –siw Tatitojja.

23. Ucatsti lekeleken utjäwipampir jiscʼa kotanacampiruw uc tucuyä. Tʼunjañ pichäñampiw ucjj picharaquï –siw nuwasiri tamanacan Tatitupajja.

24. Nuwasiri tamanacan Tatitupajj aqhäm sasaw arsu: Cunjämatejj lupʼctjja uqhämaw chekpachan phokhasini; cunjäm puriñaptejj munctjja uqhämaw lurasini.

25. Asirianquirirojj orakejjaruw irpanï, kollunacajj-jjan juparojj cayump tacjjataraquï. Ucat yucupajj jupanacat apakasjjani, jathi kʼepipasti jupanacan callachinacapat apakatäjjaraquini.

26. Take orakjjan lurasiñapatac amtatäc ucaw acajja. Take marcanacjjar lokatatatäc uca amparaw acajja.

27. Cunalaycutejj nuwasiri tamanacan Tatitupajj uqhäm lurañataquiw waquichi. Qhitis ucjj jarcʼaspajja? Jupan amparapajj lokatatatawa. Qhitis uc khepar cut-tayanejja?

28. Acaz pʼekechirejj jiwcän uca maran jathi kʼepïcän uca kʼepiwa.

29. Jumar jawkʼctams uca lawan pʼaquitätapat jan cusisimti, takpach Palestina, cunalaycutejj catarin jathapat basiliscojj mistuni. Jupan achupasti nina chhekhan nina naqhir catarïniwa.

30. Jan cunaninacan taynanacapajj mankʼapjjaniwa; tʼakhesitanacasti suma uñjataw iquintapjjani. Juman saphimarojj machʼampiw jiwayä. Jupasti jiltʼirinacamaruw jiwayaraquini.

31. Aykom puncu; jacham marca; juma Palestinpachajj chullutatatätawa. Alay toket mä jiwkʼew purinini. Janiw qhitis saparstʼatäcaniti jupan arsut urunacapanjja.

32. Cuns ucjjar sapjjani marcanacan qhitatanacaparojja? Tatituw Sionar ut-tʼayi; marcapanquir jan cunaninacasti ucaruw iyawsapjjani.