1. Istʼapjjeta, qhitinacatejj asqui cancañar arcapcta ucanaca. Cuna karkat-tejj phatʼakatäpcta uca karkar uñtapjjam, cuna micʼayat-tejj apsutäpcta ucar uñtapjjaraquim.

2. Abraham awquimar uñtapjjam; jumanacar wawachapctam uca Sarar uñtapjjaraquim; nayajj Abrahanar sapaquiw jawsta, jupa saparuquiraquiw bendista.

3. Cunalaycutejj Tatitojj Sionaruw chuymachani, take jupan chʼusawjanacaparuw chuymachani, wasaraparojj Edenjam tucuyani; chʼusa wasaraparusti Tatitun pankar yapupjam tucuyani. Ucan cusisiñajj utjani. Ucatsti cʼuchʼirtʼasiñampi, yuspagarañampi, kʼochu arumpiw utjaraquini.

4. Arunacajj istʼapjjet nayan jakenacajja; istʼapjjet nayan marcajja, cunalaycutejj nayat mä leyejj mistuni, ucatsti asqui cancañajjajj marcajjan khanapat saytʼañapataquiw lurä.

5. Asqui cancañajj jacʼanquiwa; khespiyañajjajj mistjjewa; nayan amparajjasti jakenacaruw taripani. Islanacajj nayaruw suyapjjetani, amparajjaruraquiw alcatapjjani.

6. Nayranacamjj alajjpachar uñtapjjam, aynachanquir orakjjar uñjjatapjjaraquim; cunalaycutejj alajjpachanacajj jewkʼjamaw ina chʼusar chhaktani, orakesti isisiñ isjam thanthaw tucuni; ucan utjasirinacasti uqhäm quicparaquiw jiwapjjani. Ucampis khespiyañajjajj wiñayataquïniwa, asqui cancañajjasti janiraquiw chhaktayatäcaniti.

7. Nayar yäkapjjeta, qhitinacatejj asqui cancañar uñtʼapcta ucanaca, cawquïr marcajjan chuymaparutejj leyijj kellkantcta ucanaca; jaken toketäñanacjja jan ajjsarapjjamti; janirac ñankha arump tokesiñanacaps ajjsarapjjamti.

8. Cunalaycutejj thuthajj isjam jupanacarojj mankʼantani. Lakʼosti jupanacarojj tʼawrjam mankʼantaraquini. Ucampis asqui cancañajjajj wiñayataquiw utjani, khespiyañajjasti wiñayan wiñayapaw utjaraquini.

9. Pʼarjjtam, pʼarjjtam! Chʼamañchasiñamp isthapisim, Tatitun amparapa! Nayra pachanacanjam pʼarjjtam. Janit jumajj Rahab warmir qharekcta ucäcta? Janit ajjsarcañ lakʼor chhojjriñchctas ucäcaracta?

10. Janit jumajj lamar kotan jachʼa pʼiya umanac wañtʼayirïc ucäcta? Janit jumajj lamar kotan mankhanacap thaquir tucuyirïc ucäcta, cutsuyatanacan uca chek maqhatapjjañapataquejja?

11. Uqhämasti, Tatitun cutsuyatanacapajj cut-tanipjjaniwa, kʼochusisaw Sionar mantapjjaraquini. Ucatsti, wiñay cusisiñamp kollan cancañamp pilluntatäpjjaniwa. Jupanacasti cusisiñamp cʼuchʼirtʼasiñamp jicjjatapjjani. Llaquisiñamp jaqhusiñampisti jaltjjapjjaniwa.

12. Nayajj ucätwa. Jïsa, jumanacar chuymachapctam ucajja, nayätwa. Jïsa, qhitïtas jumajja, jiwir jaker ajjsarañamataqui, korar uñtat tuc-cani uca jaken wawapar ajjsarañamataquisa?

13. Qhitïtas jumajja, utjayctam uca Tatitumat armasiñamataquejja? Jupaw alajjpachanac jiyitatänjja, oraken takanap ucharaquïnjja. Qhitïtas jumajja, tʼakhesiyirin colerasiñapat sapür ajjsarañamataqui, jupajj tucqhirjamäcaspas uqhäma? Ucampis, cawqhanquis tʼakhesiyirin colerasiñapajja?

14. Catuntat apanucut jakejja, antutatäñ wal muni; pʼiyan jan jiwañataqui, tʼantʼapan jan pistʼañapataquiraqui.

15. Ucampis nayaw Dios Tatitumätjja, qhitin mathapinacapatejj khojjokcän ucajja. nuwasiri tamanacan Tatitupaw sutijjajja.

16. Arunacajj lacamar uchta. Amparajjan chʼiwipampiw jumar chʼiwjjataysma alajjpachanacar uscuñajjataqui, oraken takanap uchañajjataquiraqui, Sionar sañajjataqui: Jumanacaw nayan jakenacajjäpjjta.

17. Tatitun colerasiñapan kerupat amparapat umctas juma Jerusalenajja, pʼarjjtam, pʼarjjtam, saytʼasim. Jumaw kerun lakhakeñat chʼirwsut konchupjj umäyätajja.

18. Jupajj jathascän take uca yokanacapatjja, janiw qhiti irpiris utjquiti. Jupajj uywcän uca wawanac taypins amparat irpjjarurejj utjcaraquïnti.

19. Aca pani yokajj juman uc jutapjje. Qhitis jumat qhuyapayasïtamjja? Jupanacaw jumat qhuyapayasïtam chʼusa tucutamata tʼunjatätamata, machʼatsa espadats llaquisiraquini. Qhitimpis jumar chuymachämajja?

20. Yokanacamajj ucjpachaniw chʼam thayjtayasipjje, aca paniquiw thurtʼasisipqui. Take thaqui mantañanacan liwirtasipqui. Wajjrasir vacajj känanc-caspajj uqhämaw Tatitun kʼapisiñapamp Diosaman tokenokañapampejj jupanacjjanqui.

21. Uqhämasti, jichhajj istʼam, juma tʼakhesitäcta uca, jan vinomp machantat machjata:

22. Aqhäm siw Tatitumajja: Tatitu Diosamajj marcapan asquipataquiw chʼajjwi. Lakhakeñan kerupsa, kʼapisiñajjan kerupan konchupsa, nayaw amparamat apakta. Janipuniw wastat ucatjj umcätati.

23. Antisas jumar tʼakhesiyirinacan amparaparuw uc uscöjja, qhitinacatejj chuymamar sapquejja: Quilltʼasim, nanacan juma pat saraquipañataqui. Jumasti janchimjja orakeruw tucuytajja, thaquïcaspas uqhämarac tucuyta uca pat saraquipirinacataquejja.

24. Pʼarjjtam, pʼarjjtam, chʼaman cancañamp isthapisim, Sion. Suma isinacamamp isthapisim, Jerusalen kollan marca! Cunalaycutejj jichhürut ucsarojj jan circuncidatanacamp kʼañunacampejj janiw jumar mantapcätamti.

25. Lakʼat thalarasim; sartam, kontʼasim Jerusalena; cunca chinuñamat antutnucuyasim, Sionan catuntat phuchapa!