1. Amozan Isaias yokapajj uñjcän uca Babilonian kʼepipa.

2. Jachʼa kolljjan wiphal aytam, jupanacar artʼam, ampar lokatatam pʼekechirinacan puncup chek mantañapataqui.

3. Qhitinacatejj nayan aytat cancañajjat cusisipqui ucanacataquejj janiw colerasiñajjajj utjquiti, ucat kollanaptatanacajjarojj camächit churta, uqhämaraquiw chʼamaninacajjarojj jawsta.

4. Jake tamanacan ojjöwipajj jachʼa marcan ojjöwipjamaw kollunacan utji, orakenacan marcanacapan mayachthapit ojjöwinacaw utji. Nuwasiri tamanacan Tatitupajj tamanacaparojj nuwasiñataquiw mayachthapiyi.

5. Wali jaya marcat jutapjje, alajjpachanacan thiyapatpacha; jïsa, Tatitump jupamp colerasiñapampiw juti, takpach orak tʼunjañataqui.

6. Aykopjjam; Tatitun urupaw niy jacʼachasisinqui. Take Chʼamanin tucqhäwipjamaw purinini.

7. Uqhämasti, take amparanacaw chʼam thayjtayasini; take jakenacan chuymanacapaw thayjtaraquini.

8. Jupanacasti ajjsarapjjaniwa; llaquinacamp aykoñanacampiw jupanacar apjjat-tani. Maynit maynicamaw muspharapjjani; ajanunacapasti nina lawrjamäniwa.

9. Jïsa, Tatitun urupaw purini, colerasiñamp sinti kʼapisiñampïniwa, oraker thant tucqhañataqui. Jupasti ucanquir jucha luririnacaruw tucqhani.

10. Alajjpachanquir warawaranacajj janiw cʼajcaniti. Intejj jalsuncasaw chʼamactʼani. Phajjsisti janiraquiw khancaraquiniti.

11. Ucatsti nayaw orakerojj ñankha cancañapat mutuyä; ñankh luririnacarusti ñankh luratapat mutuyaraquï. Aytat chuymaninacan jachʼa jachʼa tucutap tucusiyä. Ucatsti ajjsarat jaken jachʼachasiñap tincjayä.

12. Chacha jakerojj korit sipan jucʼamp jila alan tucuyä; chacharusti Ofiran kori cuñapat sipan jucʼamp qhustʼat tucuyaraquï.

13. Uqhämasti, alajjpachanac qhathatiyä. Orakesti cawqhanc-cäntejj ucqhat jit-tani, nuwasiri tamanacan Tatitupan colerasiñap laycu, jachʼa colercañ urupätap laycuraqui.

14. Ucasti arcnakat tarujar uñtatäniwa, jan catuñ ovejar uñtataraquïniwa. Sapakat mayniw quipca jakenacap toker jaltani, sapakat mayniraquiw quipca orakepar jaltani.

15. Take jachʼa jachʼa tucur chuymaninacajj junsutäpjjaniwa. Jïsa, take qhitinacatejj ñankha jakenacamp chicachatäpqui ucanacaw espadampejj jakonucutäpjjani.

16. Jupanacan nayranacapan uñjcañaw wawanacapajj tʼunjatäpjjani. Utanacapajj kʼala tucqhatäpjjaniwa, warminacapasti waynakatäpjjaraquiniwa.

17. Jïsa, medonacaruw jupanac contra saytʼañapataquejj waytʼä. Jupanacasti janiw kollksa korsa uñtapcaniti, janiraquiw ucanacas cusisiycaniti.

18. Arconacapajj waynanacaruw tʼunjaraquini. Puracan achuparojj janiw qhuyapayapcaniti; nayranacapas janiraquiw jiscʼalalanacarojj qhuyapaycaniti.

19. Babilonia, marcanacan khapak cancañapa, caldeonacan suma khapak cancañapa; cunapachatejj Diosajj Sodomampir Gomorrampir tucjcänsa uqhämaruw Babiloniajj purini.

20. Ucan utjasirinacajj janipuniw utjcaniti; janiraquiw mitanacat mitanacar ucanquir jakenacajj utjcaniti; Arabianquirejj janiw chʼujlljam carp ucan ut-tʼaycaniti. Awatirinacas janiraquiw ucqhan awatipcaraquiniti.

21. Antisas chʼusa wasaranquir ajjsarcañ lakʼonacaw ucqhan iquipjjani. Jupanacan utanacapansti aykor lakʼonacaw phokhantani. Jucunacajj ucan jacapjjani, ajjsarcañ ñankhanacasti ucan thokopjjaraquini.

22. Islanacanquir ajjsarcañ lakʼonacasti jupanacan chʼusa thantha utanacapan aykopjjani. Jachʼa ajjsarcañ animalanacasti cʼajquir utanacapancapjjaniwa. Taripäw urupaw jacʼanqui. Urupasti janiw jachʼaptayatäcaniti. Juparojj jancʼaquipuniw tucqhä. Jïsa, jakenacajjat qhuyapayasï, ucampis ñankha jakenacajj tucusipjjaniwa.