1. Joataman yokapa, Uziasan yokapa, Judan pʼekechiripa Acazan urunacapanjja, Siriampin Pecampin Rezin pʼekechiripaw Jerusalenarojj nuwasir jutapjjäna. Rezinajj Israelan pʼekechiripa, Remaliasan yokapänwa. Ucampis janiw jupanacajj atipjapcänti.

2. Ucat Davidan utaparuw aqhäm sas yatiyasïna: Siriajja Efrainampiw arustʼasjje. Ucatsti cunjämatejj chʼumi kokanacajj thayan onjjtayatäpqui, uqhämaw chuymapamp marcapan chuymapampejj onjjtayataraquïna.

3. Ucat Tatitojj Isaiasar arsu: Jumamp Searjasub yokamamp jichpach mistupjjam, Acazamp jiquisiri, alay jiscʼa kotamp jiquisqui uca khechʼan thiyaparu, is kʼomachirin yapupan thaquiparuraqui.

4. Jupar sapjjam: Amuyasim, amuctʼaraquim, jan ajjsaramti uca jiwkʼer nina larwanacan pä wichʼinqhapatjja, Rezinampin Siriampin Remaliasan yokapampin akquir colerasiñapat jan thayjtañ chuymanïmti.

5. Cunalaycutejj Siriampi, Efrainampi, Remaliasan yokapampejja, jumaru jan wal arustʼasipjje, aqhäm sasa:

6. Judaruw sarañäni, ucar ajjsarthapiyañäni. Ucatsti jiwasatac jaljtayañäni, mä pʼekechir uca taypir uscuñäni, jïsa, Tabealan yokapar pʼekechirit ut-tʼayañäni.

7. Aqhäm siw Dios Tatitojja: Ucajj janiw saytʼcaniti, janiraquiw phokhascaraquinisa.

8. Sirian pʼekepajj Damascowa, Damascon pʼekepasti Rezinawa. Janïr sojjta tunc pheskan mara sarakcan ucqhaw Efrainajj tʼunjatäni jan marcaquïscañapcama.

9. Efrainan pʼekepajj Samariawa. Samarian pʼekepasti Remaliasan yokapawa. Janitejj jumanacajj iyawsapcätajja, chekpachaw jan ut-tʼayatäpcätati.

10. Uqhämaraquiw Tatitojj Acazar wastat parläna, aqhäm sasa:

11. Mä unañch jumatac Dios Tatitumat mayisim; pʼiyanac mankhancasas mayisim, alajjanacancasas mayisiraquim.

12. Ucampis Acazajj sänwa: Janiw mayiscäti, janiraquiw Tatitur yantʼcäti.

13. Ucat jupajj sï: Istʼam, Davidan utapa; Jan cunaquit juman jakenacar karjayañamajja? Diosajjarojj karjayañt munaracta?

14. Uqhämasti, Tatit pachpaw jumarojj unañch churätam. Chach jan uñtʼir warmiw usur jakeptani, mä yokall waw wawachasini, Emmanuel sutimpiw sutiñcharaquini.

15. Mantequillamp mamuray misqʼimp jupajj mankʼani, cunatejj ñankhäqui uc apanucuñ yatiñapataqui, cunatejj asquïqui uc ajllisiñ yatiñapataquiraqui.

16. Uca wawajj janïr yatquipana, cunatejj ñankhäqui uc apanucuña, cunatejj asquïqui uc catokañ janïr yatquipanaracjja, cuna orakerutejj uñisctajj uca orakejja, panpach pʼekechiripan jaytanucutäniwa.

17. Tatitojj jumjjampiru, marcamjjampiru, awquiman utapjjampirojj jan uñjat urunac puriyani, cunjäm urunacatejj jan purincäna Efrainajj Asirian Juda pʼekechiripat mistcäns ucapachatjja.

18. Ucürunsti Egiptonquirin thiyanacapanquir chhichhillanqharuw qhuytʼani, Asiria orakenquir mamurayaruw Tatitojj qhuytʼaraquini.

19. Ucanacasti jutapjjaniwa, apanucut chʼusa kherwanacan utjapjjani, karka pʼiyanacana, take chʼaphinacana, take jiscʼa kokanacan samarapjjaraquini.

20. Uca quicpa urun Tatitojj pʼeksa, cayu tʼawrs kʼalachani, jawir qhurcatan jaquirinacan Asirian pʼekechiripan maytʼat kʼalachiripampi. Uqhämaraquiw sunqha ñicʼutajj kʼal jiqʼiratäni.

21. Ucatsti ucürunjja, mä jakew mä ancut vacarojj uywani, pä ovejarus mankʼayaraquini.

22. Ucatsti ucanacan jilarquir lech churatapat jupajj mantequill mankʼani. Uca oraken takpachan kheparirinacasti mantequillamp mamuray misqʼimp mankʼapjjani.

23. Ucatsti, ucürunjja take chekantejj warank uva alejj utjcäna, warank kollke siclo alanïcän ucawjanacanjja, añawayamp chʼaphinacampiw utjani.

24. Michʼinacamp arconacampiw jakenacajj ucar mantapjjani, cunalaycutejj take orakpachaw añawayanacamp chʼaphinacamp chhaktayatäni.

25. Lijwänamp korsutäqui take uca kollunacanjja, añawayanacamp chʼaphinacampejj janiw ajjsaratäcaniti; ucampis uca chekanacajja, mankʼañapataquïniwa, jiscʼa uywanacan tacsuñapataquiraquïniwa.