1. Jïsa, aqhäm siw Tatitojja: Nayajj jumar apanucsmati? Jan ucajj wiñayataquich jumar jakonucsmajja? Tatitojj aqhäm siwa: Cawquinquis taycaman jaljtat papelapajja? Qhitirus jumjj jaytanucsma? Jan ucajj cawquïr manujjaruch jumjj aljantsmajja? Jïsa, qhitirus jumjj aljsmajja? Jumanacan quicpa ñankha luräwinacam laycuw jumanac pachpajj aljasipjjtajja. Ñankha luräwinacam laycuw taycamajj apanucutajja.

2. Uqhämasti, nay jutcta ucapachajj janiw qhitis utjcänti; jawscta ucqhajja, janiw qhiti arsuris utjcänti. Israelan utapa, amparajjajj jiscʼaptiti, jan cutsuyañ chʼamanïñapataquejja? Jan ucajj janich nayajj chʼamanïcta antutayañataquejja? Nayajj tokempiquiw lamarar kʼal wañaptaytjja, jawiranacapsti chʼusa wasararuw tucuyta, chawllanacapajj thujsasquiwa, uman wañtʼatap laycu. Chawllanacasti umat pharjataw jiwarapjje.

3. Alajjpachanacarojj chʼiyär chʼamacampiw chhaktayta, wayakampiw isthapiyaracta.

4. Dios Tatitojj amuyuninacan lajjrap churitu, waquisqui uca ar jumar parljjayañäc uc yatiñajjataqui, Israelan utapa. Jumajj karjatäcta ucqhajja, jupaw alwat alwat uñchʼuquiñatac pʼarjjti. Jupaw jinchujj jistʼari yatiñan jakenacjam istʼañajjataqui.

5. Dios Tatituw jinchujj jistʼaritu; janiw nayajj kallcatcti, janiraquiw jupat cutekcaract-ti.

6. Jawkʼerirojj jiqhanijj apcat-ta. Ajanujjsti, sunqha jiqʼirinacaruw apcataracta. Janiw pʼenkasiñanacampir thuscatañanacampirojj ajanujj imantcti.

7. Cunalaycutejj Dios Tatituw yanapitani, janiw nayajj pejjtuntatäcäti. Ucat ajanujjarojj samañch kaljam thurtʼasiyta, ucatsti jan pʼenkachatäñajj yatisiracta.

8. Tatitojj jacʼajjanquiwa; jupaw nayar arjjatitu. Qhitis nayamp chʼajjwani? Chicpach uñstapjjañäni. Qhitis timajjajja? Nayar jacʼachasinpan, lacajjan chʼamapampiw nayajj jupar tucqhä.

9. Cunalaycutejj Dios Tatituw nayar yanapitani. Take qhitinacatejj nayar juchañchapquit ucanacajja, isir uñtataw thanthar tucuni; thuthasti ucanacarojj kʼal mankʼantani.

10. Qhitis jumanac taypin utji Tatitur ajjsariri, lokeripan arupar jaysiri, ucat chʼamacanarac sarnake, khanats pistʼat sarnakaraquejja?

11. Amuyapjjam, take jumanacat qhitinacatejj nin naktayapcta, nina wiyanac jumanacjjar muytayapcta ucanacajja, quipca ninaman khanapan sarnakapjjam, naktayapcta uca nina wiyanacan sarnakapjjam. Nayan amparajjat ac catokapjjäta: Llaquisiñampiw iquintapjjäta.