1. Jichhasti munat jilanacajja, uca kellkanac arsuyarapipjjsmawa jumanacan yatipjjañamataqui cuna amtäwinactejj Tatitojj take Israelan utapampi luränjja ucanacjjata;

2. Kollan arjirinacapan lacanacap toketa jupan judionacar arsutapjjatsa, kalltäwitpach ucsarojja, mitat mitaru, mä urun puriñapcama cunapachatejj jupanacajj Diosan cheka iyawsiri tamaparu cheka tamaru cut-tayatäpcani ucürcama, quipca tuti orakenacaparu wastat apthapitäpcani, take arsuta orakenacapana uttʼayatäpcani ucürcamajja.

3. Jisa, munat jilanacajja, aca cunanacjj jumanacaru arsupjjsma, wali cusisipjjañamataqui, wiñayataqui pʼekenacam alayar waytʼapjjañamataqui, Dios Tatitojj wawanacamar churcanisa uca wajjtʼäwinac laycu.

4. Cunalaycutejja, jutiri cunanacjjat yatiñataqui waljani jumanacan wal thakatamat yattwa. Ucatwa, janchisan inamayar tucuñan jiwañan waquisitapjjat jumanacan yatitamjj yattwa. Ucampis jiwasanacajj janchinacasana Diosasar uñjapjjañäni.

5. Jisa, cawqhattejj jutapctana uca Jerusalenan utjasirinacaru janchin jupa pachp uñachayasiñapat jumanacan yatitam yattwa; cunalaycutejja ucan jupanac taypin puriñapajj waquisiwa; cunalaycutejja, jupan jaytatapjj jakenacan jupjjaru janchina chʼamanïñapataqui, uqhamaraqui take jakenacatac jiwañapataqui, take ucanac jachʼa Luririrojja wactʼapuniwa, jupan take jakenacjjaru chʼamaniptañapataqui.

6. Jiwañan take jakenacjjar puritap laycu, jachʼa Luririn qhuyapayiri arustʼap phokhañataqui, jiwañat jactañataqui mä chʼaman utjañapajj waquisiwa. Jiwañat jactäwin jakenacar puriñapajj waquisi, tincüw laycu. Tincüwisti purinïna ley pʼaquïwi laycu. Jakenacan tincutap laycusti, Tatitun nayrakatapata jarcʼakatäpjjänwa.

7. Uca laycojja, juchanacan tʼakhesiyäwinacapar phokhañan jan watïñapajj waquisi. Janitejj ucajj mä jan wati phokhañäcaspajja, aca thujsantañ cancañajj janiw jan thujsantañ cancañaru tuccaspati. Ucatwa, jakenacjjar nayrïri purit taripäwejj wiñayataquiw kamasapänjja. Ucatejj camachcasapänjja, waquisisapänwa aca janchin liwisiñapajja, quicpa orakepan ñusas ñutʼjañapataqui, janipiniw wastat jactañapataqui.

8. Cunja sumasa Diosan amuyapajja, qhuyapayañapajja, munañapajja! Janitejj janchejj wastat jactcaspajja, cuna alajjpach qhitatejj Wiñay Diosan nayrakatapat jalaktcänjja, supayar tuccaraquïnjja, jupajj jiwasanacan ajayunacasaru catuspawa, ajayunacasan janipin wastat jactañanacapataqui.

9. Ajayunacasan jupjam tucuñapajj waquisisapänwa; jiwasanacasti supayanacaru supayan qhitanacaparu tucupjjasänwa, Diosasan nayrakatapat jarcʼakatäñasataqui, cʼarinacan awquipampi kamasiñanacasataqui, jupjam wali llaquisisa, jisa, nayrïri taycas awquisar sallkjcänjja ucampi; jupa pachpasti mä khana qhitäcaspas uqham tucuyasi, jaken wawanacapar amtayaraquejja jak jiwayañatac jamas arustʼäwinacar lurañanacapataqui, take cunayman jamasa chʼamaca luräwinac lurañanacapataqui.

10. Cunja jachʼasa Diosasan sumätapajja; jupajj mä thac waquichi, uca ajjsarcañ phirun catuñapat jiwasanacan antutasiñasataqui, jisa, uca jiwaña mankhapacha phirutjja cuntejj nayajj janchin jiwañapa uqhamaraqui ajayun jiwañapa sasa sutichtjja.

11. Israelan Kollanapa Diosasan antutayiri thaquip laycu, cawquïri jiwañattejj niy arstjja uca janchi jiwañajj jiwatanacapar antutani; uca jiwañasti amay imäwiwa.

12. Niy ucat arstwa uca kollan cancañat jarcʼakeri jiwañajja ucan jiwatanacaparu catuyaraquini; uca kollan cancañat jarcʼakeri jiwañasti mankhapachawa. Ucatwa, jiwañampi mankhapachampejj ucanacan jiwatanacap catuyañapäni; mankhapachasti catuntata ajayunacap catuyañapäni; mankhapachasti catuntata ajayunacap catuyañapäni, amay imäwisti catuntata janchinacap catuyañaparaquïni. Jakenacan janchinacapampi ajayunacapampejja wastat mayachthapisipjjani. Israelan Kollanapan jiwatanac jactayañatac chʼamapïpana ucajj camachani.

13. Cunja jachʼasa Diosasan arustʼapajja! Cunlaycutejj maysanjja Diosan cusisiñpachapajj asquinacan ajayunacapjj catuyañapäni. Amay imäwisti asquinacan janchinacapjj catuyañaparaquini. Ajayump janchimp pachparu wastata mayachthapini. Take jakenacasti jan thujsantquiri jan jiwquiri tucupjjani. Jupanacasti jaquiri jakëpjjaniwa, jiwasa janchinquirinacjam phokhatpach yatisajja, jisa yatiñasajj phokhatpachäniwa.

14. Ucatwa, take jiwasan juchanac luratanacasatjja kʼañunacasatjja kʼalalätasatjj phokhatpach yatiñajj jiwasanacan utjani. Asqui jakenacansti phokhatpach yatiñajj utjaraquini jupanacan cusisipjjañapata, asquïpjjañapata. Jupanacasti isthapitäpjjani kʼoma cancañampi, jisa, asqui cancaña isimpi.

15. Ucatsti take jakenacan jan jiwquiri tucañapataqui uca nayrïri jiwañat jactatap khepatjja, jupanacajj Israelan Kollanapan taripiri konuñap nayrakataru saytʼapjjañapäniwa. Ucapachasti taripäwejj purini. Ucapachasti jupanacajj taripatäpjjañapäni, Diosan kollan taripäwiparjama.

16. Dios Tatitojj ucjj arsu; ucasti jupan wiñay arupawa, janiraquiw tucuscaniti. Chekpachawa, cunjamatejj Tatitojj jacquejja uca quipca chekapejja, qhitinacatejj asquïpqui ucanacajj ucapachajj asquïsipcaquiniwa. Qhitinacatejj kʼañüpqui ucanacajj ucapachajj kʼañüsipcaquiniwa. Ucatwa kʼañüpqui ucanacajj supayawa, jupan qhitanacaparaquiwa. Jupanacatac waquichata jan tucusiri ninaru jupanacajj sarjjapjjani. Jupanacan tʼakhesiñapasti mä nina sancʼa kotjamäniwa; ucan ninapasti wiñay wiñayaw lawrani, janiraquiw tucusïwinïcaniti.

17. Cunja jachʼasa asquisa Diosasajja! Jupajj take arunacap phokhe. Arunacasti lacapata mistutawa; leyipasti phokhasiñapawa.

18. Ucampisa asqui jakenaca, Israelan Kollanapan kollan jakenacapa, qhitinacatejj Israelan Kollanapar iyawsapqui, qhitinacatejj oraken cruzanacapjj khewipquejja, oraken pʼenkapar uñisipqiusa ucanacajj Diosan khapak marcaparu tutjama catokapjjani; ucasti orak uttʼayäwitpach jupanacataquejj waquichatänjja. Jupanacan cusisiñapasti wiñayataquiw phokhatäni.

19. Cunja jachʼasa Israelan Kollanapa, Diosasan qhuyapayañapajja! Kollan jakenacaparu antutayi uca ajjsarcañ supay phiruta, jiwañatsa mankhapachatsa, cunatejj jan tucusiri mutuñäqui uca nina sancʼa kotatjja.

20. Cunja jachʼasa Diosasan kollan cancañapajja! Jupajj take cunanacjj yati. Janiraquiw cunasa jupan jan yatitajj utjquiti.

21. Jupasti orakerojj juti take jakenacar khespiyañapataqui, jupanacatejj arupar yäkapquejj uqhajja. Jupajj take jakenacan usunacap tʼakhesiraqui; jisa, sapa jaquirin usunacapjja, chachanac warminac wawanacasa, qhitinacatejj Adanan wawanacapquisa ucanacan usunacapjj tʼakhesi.

22. Ucjj tʼakhesiw jupajja, jiwañat jactäwin take jakenacaru puriñapataqui, takenin jupan nayrakatapan saytʼañapataqui jachʼa taripañ urunjja.

23. Take jakenacaru camachit churi, jupanacan juchat cutiquipstasiñapataqui, jupan sutpjjar bautizasiñapataqui, Israelan Kollanapru phokhatpach iyawsasisa. Janitejj ucjj lurapquejja janiw Diosan khapak marcapan khespiyatäpcaspati.

24. Janitejj jupanacajj juchat cutiquipstapcanejja jpuan sutipar iyawsapcaraquinejja, sutipjjar bautizasipcaraquinejja, tucusïwcam thurtʼasipcaraquinejja, jupanacajj ñankhachatäpjjaniwa, cunalaycutejj Israelan Kollanapa, Dios Tatitojj uc arsüna.

25. Uca laycojja jupajj ley churiwa. Jan ley churatïpana janiw mutuyäwejj utjcaraquiti. Jan mutuyäw utjipana janiw juchañchäwejj utjcaraquiti, jan juchañchäwi utjipana, Israelan Kollanapan qhuyapayañanacapajj jupanacjjaru munañaniwa juchanacan tʼakhesiyäwinacapar phokhañap laycu, cunalaycutejj jupanacajj jupan chʼamapan antutayatäpjjewa.

26. Cunalaycutejja juchanacan tʼakhesiyäwinacapar phokhañajj jupan chekaparjam taripañapan mayïwinacap phokhewa, take qhitinacarutejj leyejj jan churatäqui take ucanacataqui, jupanacan antutayatäñapataqui uca ajjsarcañ phirutjja, jiwañatjja, mankhapachatjja, supayatjja, nina sancʼa kotatjja cunatejj jan tucusir mutuñäqui ucatjja. Jupanacaru samaña churcänjja, uca Diosaru jupanacajj cuttayatäpjje; jupasti Israelan Kollanapawa.

27. Ucampisa, ay qhitinacarutejj leyejj churatäqui, qhitinacatejj jiwasanacjam take Diosan camachitanacanïqui, ucat ucanacaru jan phokhapcaraqui, yantʼañ urunacapsti inamay tucupcaraquejja ucanacata! Jupanacan cunjamätapajj ajjsarcañawa.

28. Cunja sallkjañasa Ñankhan arustʼapajja! Cunja inamayasa, jan chʼamanisa, tʼajjmarasa jakenacajja! Wal yatekapqui uqhajja wali amuyunïpcaspas uqham amuyasipjje. Ucat Diosan eojjapar janiw yäkapquiti, antisas quipca pʼekepat yatipcaspas uqham amuyasisa eojjap jaytanucupjje. Ucatwa amuyunïñapajj tʼajjmar cancañawa; janiraquiw cuñnataquisa jupanacatac walïquiti. Jupanacasti tucusipjjaniwa.

29. Ucampisa, jupanacatejj Diosan eojjanacapar yäkapquejja yatekañapajj sumawa.

30. Ucampisa, ay oraken yänacampi kamirinacajja. Kamirïtap laycu, jan cunaninacaru uñisipjje, llampʼu chuymaninacaru arcanakapjje, chuymanacapasti jachʼa alaninac munapjje. Ucatwa, jachʼa alaninacapawa jupanacan diosapajja. Ucampis jachʼa alaninacapajj jupanacamp chica tucusini.

31. Ay jan istʼañ muniri okaranaca; jupanacajj tucusipjjaniwa.

32. Ay jan uñjañ muniri juyqhunaca; jupanacajj tucusipjjaraquiniwa.

33. Ay jan circuncidat chuymanïrinacajja; jupanacan ñankha luräwinacapat yatiñajja khep khepa urunjja jupanacar jawkʼani.

34. Ay cʼarinaca; jupanacajj mankhapacharu nuqhuntatäpjjaniwa.

35. Ay amtañsamp jake jiwayirinaca; jupanacajj jiwapjjani.

36. Ay kʼañusiri wachokerinaca; jupanacajj mankhapachar nuqhuntatäpjjaniwa.

37. Jisa, ay wacʼanacar yupaychirinaca; take supayanacan supayapawa jupanacat cusisi.

38. Jisa, ay take qhitinacatejj juchanacapampi jiwapqui ucanacajja. Jupanacajj Diosar cut-tapjjani, ajanupar uñcatapjjaraquini, juchanacapamp kamasipjjaraquini.

39. Munat jilanacajja, uca Kollan Diosar jan jaysañan ajjtcañätap amtasipjjam, uqhamaraqui sallkjerin yantʼäwinacapar istʼañ ajjtcañätap amtasipjjaraquim. Amtasipjjam, janchin irpatäs lupʼiñajj jiwañawa; kollana lupʼiñasti wiñay jacañawa.

40. Munat jilanacajja, arunacajjaru istʼapjjam. Israelan Kollanapan jachʼätap amtasipjjam. Jan nayat sapjjamti, jupajj jiwasanac toke khoru arunac arsupjjestu sasa. Nayajj Luririman arunacapjj arstwa. ucat jumanacatejj uqham sapjjätajja, chekarojj khoru arunacampi arusipjjätawa. Cheka arunacan take kʼañutaqui chʼamätapat nayajj yattwa, ucampis asqui jakenacajj janiw ucanacat ajjsarapquiti, janiraquiw qhathatipquiti, jupanacan cheka cancañar munatap laycu.

41. Ucatwa munat jilanacajja, Tatituru, Kollanäqui Ucaru jutapjjam. Thaquipan asquïtap amtasipjjam. Jaketaqui thaquejj cʼullcʼuwa, ucampis chekaraquiwa jaken nayrakatapana. Punc uñjiristi Israelan Kollanapawa. Janiw jupan lokeripas uqhan utjquiti. Dios Tatitojj jupan sutipawa; jupasti janiw sallkjatäcaspati; ucatwa, janiw yakha mantañajj utjquiti, jan ucajja puncu tokequi mantañajja.

42. Qhititejj lekʼquejja, juparuw jupajj jistʼarani. Qhitinacatejj jachʼa jachʼa tucupquejja yatekatap amuyunïtap kamirïtap laycu, uca amuyuni, yatekata, kamiri jakenacaruw jupajj uñisi. Janitejj jupanacajj uca cunanacjj apanucupcanejja, jupanac pachpanacan tʼajjmarätapjj Dios nayrakatan amuyasipcaraquinejja, sinti llampʼu chuymanir sarakapcanejja, jupajj janiw jupanacar jistʼarcaniti.

43. Cuna cusisiñatejj kollan jakenacatac waquichatäqui, jisa, uca amuyuninacan amuyasirinacan cunanacapajj jupanacat wiñayataqui imantatäniwa.

44. Munat jilanacajja, arunacajj amtasipjjam. Isinacajjajj apakastwa; jumanacan nayrakatamaru ucanacjj thalarasta. Nayan khespiyasiñajjan Diosaparu mayista jupan take thaksuri nayrapamp nayaru uñjañapataqui. Ucatwa khep khepa urunjja, cunapachatejj take jakenacajj luratanacaparjam taripatäpcani ucapachajja, nayan ñankhätamat thalarasitajj Israelan Diosapan uñjatapat yatipjjätawa; nayan jup nayrakatana lliphipir saytʼatajjatsa, jumanacan wilanacamat antutatätajjats yatipjjaraquïta.

45. Munat jilanacajja, juchanacamat cutiquipstapjjam. Qhititejj jumanacar kʼal ñachʼquiristamjja ucan cadenanacap thalaras aparasipjjam. Qhititejj khespiyatäwiman karkapäqui uca Diosar jutapjjam.

46. Cuna khapak urutejj chekapäñajj asqui jakenacaru churatäcani uca taripäwi urutaqui waquichasipjjam, jumanacan ajjsarcañ ajjsarthapiñampi jan mayjtʼañanacamataqui, jumanacan ajjsarcañ juchanacamjj jan phokhatpach amtasiñanacamataqui, jumanacan aqham sañaman jan waquisiñapataqui: Kollanaw kollanawa taripäwinacamajja Take Chʼamani Dios Tatitojja – ucampis juchanacajjat yattwa; leyimjj pʼaquïyäta. Uca camachit pʼaquiñanacajj nayanquiwa. Supayasti nayaru catutojja, jupan ajjsarcañ llaquisiñapajj nayjjaru chʼamaniwa.

47. Ucampis munat jilanacajja, waquisiti nayan jumanacaru ucanacan ajjsarcañ chekätapjjat amuyayañajja? Jumanacan pʼekenacamatejj kʼoman phoktʼatäcaspajja, chuymanacamaru llaquisiyiristti? Jumanacatejj juchat antutayatäpcasmajja, chekan khanaparjamajja jumanacar khanpach arsupjjerismati?

48. Jumanacatejj kollanäpjjasmajja, jumanacaru kollan cunanacjjata arsupjjerisma. Ucampis jan kollanätam laycu, nayaru yatichirjam uñjatam laycu, cunanactejj juchajj puriyqui ucanacjjat nayan jumanacaru yatichañajjajj waquisi.

49. Chuymajjaw jucharu uñisi, asqui cancañampi cusisiraqui. Nayasti Diosajjan kollan sutiparu yupaychäwa.

50. Jutapjjam jilanacajja, sapa qhitinacatejj pharjayasipcta ucanacajj umanacaru jutapjjam. Jutapjjam jan kollkeninaca, alasipjjam, ucat mankʼapjjam. Jisa, jan alani jan kollkempi, vino millqʼi acsana alasipjjam.

51. Ucatwa, cuntejj jan alanïqui ucataquejja jan kollk willtapjjamti; jan cusisiyqui ucataquejj janiraqui irnakapjjamti. Take chuymamp nayaru yäkapjjam. Arsctsa uca arunac amtapjjam: Israelan kollanaparu jutapjjam. Cunatejj jan tucusquejja janirac thujsantcaspajja, ucjj mankʼapjjam. Liqʼïñampi chuymamajj cusispan.

52. Jichhajja munat jilanacajja, Diosaman arunacap amtapjjam. Urunacanjj jan tucuyasa jupat mayisipjjapunim. Arumanacajj kollan sutipar yuspagar churapjjam. Chuymanacamajj wal cusisipjjpan.

53. Cunja jachʼasa Tatitun amtäwinacapajja. Cunja jachʼasa jaken wawanacaparu jupan qhuyapayäwi churäwinacapajja. Jupan jachʼätap qhuyapayañap munañap laycu jiwasaru arsupjjestu jathasan janchitjama jan kʼala tʼunjatäñapataqui, antisas jupanacar imañapataqui. Jutir urunacansti jupanacajj mä asqui laymiru tucupjjani Israelan utapataqui.

54. Jichhasti munat jilanacajja, jucʼamp arsuñ munapjjerismajja. Ucampis arumanthiw jiltʼiri arunacajj arsupjjäma. Uqhamäpan.