1. Ucampis khep khepürunacanjja, jan ucajj gentilenacan urunacapajja, takpach gentilenacampin judionacampin marcanacapajja, aca orakjjar jutirinacasa, yakha orakenquirinacasa, jïsa, take acapach orakenquirinacasa, ñankha luräwinacamp umjatäpjjaniwa, cunayman ajjtcañ luräwinacamp machjatäpjjaraquiniwa.

2. Ucür purincan ucapachasti nuwasiri tamanacan Tatitupajj jupanacaruw khejjokhejjomp sartʼani, orak onjjtäwimpi, jachʼa khojjokerimpi, jallumpi, jachʼa chʼamac thayampi, naqhantir nina lawrampi.

3. Sionaru nuwasipcani, jupar tʼakhesiyapcani take uca marcanacajja, aruman uñjat samcjamäniwa. Jïsa, cunjämatejj mankʼat awtjayasit jakejj samcasqui ucat mankʼqui, ucampis samcat pʼarjjtasinjja, almapajj awtjayasiscaquejja uqhamäniwa. Jan ucajja, cunjämatejj umat pharjayasit jakejj samcasqui ucat umqui, ucampis samcat pʼarjjtasajj chʼam thayjtayasi, almapasti awtjayasiraquejja, uqhämäniw Sion Kolluru nuwasir take marcanacan jake tamapajja.

4. Uqhämasti, take juma ñankh luririnaca, suytʼapjjam, ucatsti muspharapjjam. Jumanacajj wararipjjätawa, jachapjjaraquïtawa. Jïsa, umatäpjjätawa, ucampis janiw vinomp umatäpcätati. May may parlapjjäta, ucampis alcohol jan umasaquiw uqhamäpjjäta.

5. Cunalaycutejj Tatituw jiwatjam iquiñ jumanacjjar warti. Jumanacajj nayranacam chʼirmthapipjjta, Diosan arjirinacaparusti janiw catokapctati. Jumanacan ñankh luratam laycuw jupajj irpirinacamamp uñjirinacamampjj imtʼjje.

6. Ucatsti Dios Tatitojj mä kellkatan arunacap jumanacar khanstayapjjätam. Ucanacasti iquintapqui ucanacan arunacapäniwa.

7. Kellkatajj lluchʼintatäniwa. Uca kellkatan, Diosan yatiyäwipajj utjaraquini, oraken kalltäwipatpach ucan tucusïwipcama.

8. Ucatwa, lluchʼintatätap laycuw jan yatiyatäcaniti jaken ñankha ajjtcañ luräwinacapan urupanjja. Uqhämasti, kellkatajj janiw jupanacar uñstayatäcaniti.

9. Jan ucasti, kellkatajj mä jakeruw catuyasini, ucatsti jupaw kellkatan arunacapjj khanstayani. Uca arunacasti lakʼar iquintapcan ucanacan arupawa. Jupasti uca arunacjja mayniruw churani.

10. Ucampis lluchʼintat arunacjja, janiw churcaniti, janiraquiw kellkats catuycaraquiniti, uca kellkatan, Diosan chʼamapamp lluchʼintatätap laycu. Uca kellkatan imantatäqui uca yatiyäwejja, kellkatan imantatäniwa, Tatitun quipca amuyuparjam ucanacan mistuñap muncani ucapachcama, cunalaycutejj ucanacajj take cunanacjjat yatiyi, acapach oraken ut-tʼayäwipatpacha ucan tucusïwipcama.

11. Uca kellkatan lluchʼintat arunacapajja, uta patanacat leetʼatäcan uca urojj purininiwa. Criston chʼamapampiw uca arunacajj leetʼasini. Ucatsti, jakenacan wawanacaparuw yatiyasini take cunanacatejj jupanac taypin jan utjcän ucanacajja, take cunatejj oraken tucusiñapcamajj janipun utjcani ucanacamp-pach khanstayani.

12. Ucatwa, qhitit-tejj niy parlctsa uca jaker uca kellkatajj catuyascan ucürunjja, kellkatajj orakenquirinacan nayranacapat imantatäniwa, jan qhitin uc uñjañapataqui, jan ucasti, quimsa ircatiriquiw Diosan chʼamapamp ucjj uñjani, uqhämaraqui, qhitirutejj kellkatajj catuyascan ucaw uñjaraquini. Jupanacasti kellkatampin ucan utjquis ucanacan chekätapjjat ircatapjjani.

13. Janiw yakhajj ucjj uñjcaniti, jan ucasti, mä kawkhaniquiw Diosan munañaparjamajj uñjani, ucanacan jupan arupjjat jaken wawanacapar ircatañapataqui, cunalaycutejj Dios Tatitojj siwa: Iyawsir jakenacan arunacapajj jiwatanacas parlcaspajj uqhämaw parlani.

14. Ucalaycu, Dios Tatitojj libron arunacap khanaruw mistuyani. Kawkha ircatiritejj amuyuparjam waquisqui ucanacan lacapat arup ut-tʼayani: Ucampis, ay Diosan arupar jan catokerita!

15. Ucatsti kellkata catuycani ucaruw Dios Tatitojj sani: Aca jan lluchʼintat arunac maynir catuyam, jupan ucanac yatekat jaker uñachayañapataqui, aqhäm sasa: Ac leeñamataquiw achictʼsma. Yatekat jakesti saniwa: Kellkata acar apanim, ucat uc leetʼä.

16. Oraken wakaychañap laycu, kamiriptañapataquiraquiw jupanacajj uqhäm sapjjani, janiw Diosar wakaychañ laycuti.

17. Jakesti saraquiniwa: Librojj suma lluchʼintatawa, ucat jan apanquirist-ti.

18. Ucat yatiñan jakejj sani: Uqhämajj janiw uc leetʼquirist-ti.

19. Ucatsti Dios Tatitojj wasitat kellkatamp ucanquir arunacapamp catuyjjani jan yatekatäc uca jakeru. Jan yatiñan jakesti saniwa: Janiw nayajj yatiñan jakëcti.

20. Ucat Dios Tatitojj jupar sani: Yatiñan jakenacajj janiw ucanac leetʼapcaniti, cunalaycutejj janiw catokañ munapquiti. Nayasti chʼamanïtwa nayan quipca luräwijj lurañataqui. Ucalaycu, churcäm uca arunacjja, jumaw leetʼäta.

21. Nayan luräwijj lurañatac chʼamanïtajj jaken wawanacaparojj uñachayä. Ucat lluchʼintatäc ucanac mistuyä cunürutejj nayan amuyujjarjam walïcan ucüruna. Uqhämasti, cunatejj lluchʼintatäc ucjja, jan llamctʼamti.

22. Ucatwa, leeñamatac camächit churcsma uca arunac leetam khepatjja, cawquïr ircatirinactejj jumar churañatac arscsma uca ircatirinac catokatam khepatjja, jumajj wastat kellkatjja lluchʼintäta, nayatac imantaraquïta, cawquïr arunactejj jumajj jan leecta uca arunac nayan imjjäsiñajjataqui, quipca suma amuyujjarjam take cunanac jaken wawanacapar yatiyañajj waquiscan ucapachcama.

23. Nayajj Diosätwa. Muspharcañ luräwinac lurir Diosätwa. Wasürus jichhürus wiñayas quipcätajj oraker uñachayä. Nayasti jaken wawanacap taypinjja, janiw cuns lurcti, jan ucasti, iyawsañaparjamaw lurta.

24. Ucatsti, jupar catuyat arunac leetʼcani ucarojj Tatitojj saraquiniwa:

25. Aca jakenacajj lacanacapampiquiw nayarojj jacʼachasitu, laca ispillunacapampiquiw nayar wakaychapjjetu, ucampis chuymanacap nayat jayarstʼayapjjetu; uqhämaraquiw nayat ajjsarayasiñajj jaken amuyuparjam yatichrantaraqui.

26. Uca laycuw mä muspharcañ luräw aca jakenac taypin lurä, jïsa, mä muspharcañ luräwimp muspharäwimpi, cunalaycutejj yatiñan jakenacapan yatiñanacapajj tucusiniwa, amuyasir jakenacapan amuyasiñapasti imantataraquïniwa.

27. Ay qhitinacatejj chʼamachasipqui Tatitun amtäwinacap imantañataquejja! Chʼamacanacan luräwip lurapjje, ucatsti sapjjewa: Qhitis uñjistu, qhitis uñtʼistu? Ucatsti sapjjaraquiwa: Chekpachana, juman take cunanac jakoquipañamajj phuqhu luririn qʼincʼupjam jiscʼachatäniwa. Ucampis nuwasiri tamanacan Tatitupajj siwa: Take luräwinacap nayan yatitajj jupanacar uñachayä. Cunatejj luratäqui ucajj luriripjjatjj saniti: Janiw jupajj lurquituti –sasajja? Cunatejj ut-tʼayatäqui ucajj ut-tʼayiripat saniti: Janiw jupajj amuyunïquit –sasajja?

28. Ucampis nuwasiri tamanacan Tatitupajj siwa: Libanon mä purum yapur tucuyatäñapan wali jacʼaquïtap jaken wawanacapar uñachayä. Purum yapusti chʼumïcaspas uqhäm munatäniwa.

29. Ucürunsti okaranacaw kellkatan arup istʼapjjani. Juyqhunacan nayranacapasti urpu taypin chʼamac taypin uñjapjjani.

30. Llampʼu chuymaninacajj jachʼaptapjjaniwa; cusisiñapasti Tatituncaniwa. Jakenac taypinquir jan cunaninacasti wal cusisipjjani Israelan Kollanap laycu.

31. Cunjämatejj Tatitojj jacasqui, uqhämarjamaw jupanacajj khoru jaker tucqhat uñjapjjani, tʼakhesiyir jaker tucqhats uñjapjjaraquini; take qhitinacatejj ñankha lurañanac uñchʼuquiscaquipun ucanacajja, tucqhatäniwa.

32. Uqhämaraqui, qhitinacatejj mä aru laycu jaker juch lurayapqui ucanacajj tucqhatäniwa. Puncun tokenokquis ucatac mä sipit waquichapqui ucanacasa, asqui jaker jan cuna juchat jakonucupqui ucanacas tucqhatäniwa.

33. Uqhämasti, Abrahanar cutsuycän uca Tatitojj Jacobon utapjjat aqhäm siwa: Jacobojj janiw jichhajj pʼenkascaniti, janiraquiw ajanupas wilar tuc-caniti.

34. Ucampis cunapachatejj jupajj wawanacapar uñjcani, amparajjan luräwinacap jupa taypin uñjcaraquini ucapachajja, sutijj jachʼaruw aptapjjani, Jacobon Kollanaparusti jachʼaruw aptapjjani, Israelan Diosaparusti ajjsarapjjaraquiniwa.

35. Qhitinacatejj ajayun pantjasipcän ucanacajja, amuyasjjapjjaniwa. Qhitinacatejj thuthusipcän ucanacasti, cheka yatichäw yatekapjjani.