1. Jichhasti, munat jilanacajjay, Ajayojj nayar parlayquitojj ucarjamaw jumanacar parlapjjsma. Ucat nayajj yat-ta ucanacan chekpach puriniñapa.

2. Cunanacatejj uca librot kellkakatäcän ucanacajja, wali aytatäniw jaken wawanacapataquejja, ucat jucʼamp sumaraquïniw Israelan utapat jiltʼirïpqui uca sarakerinacasataquejja.

3. Ucürunjja, Tatitutac jan ut-tʼayat tamanacajj jupanac puraw sasipjjani: Nayätwa; nayaw Tatitunctjja. Yakhepanacasti sapjjaraquiniwa: Nayätwa; nayaw Tatitunquirïtjja. Uqhäm sapjjani, take qhitinacatejj Tatitutac iglesianac jan ut-tʼayapcan ucanacajja.

4. Ucatsti jupanac puraw chʼajjwapjjani. Sacerdotenacapajj jupanac puraw chʼajjwapjjaraquini. Quipca yatiñ cancañapampiquiw yatichapjjani. Arsuñatac amuyayir Kollan Ajayurusti, janiw utjquit –sapjjaniwa.

5. Israelan Kollanapäqui uca Diosan chʼamapajj janiw utjquit –sapjjaraquiniwa. Ucatsti, jakenacaruw sapjjani: Istʼapjjeta, yatichäwinacajjar jaysapjjam. Jichhürojj janiw Diosajj utjquiti, cunalaycutejj Tatitump Cutsuyirimpejj lurañap tucuyjjewa, ucatsti jakenacaruw chʼamapjj catuyjje –sasa.

6. Jïsa, amuyäwijjar istʼapjjam. Jichhüruntejj sapjjani: Tatitun amparapamp mä muspharcañ luräwi lurasitapjja, jan ucarojj jaysapjjamti, cunalaycutejj jichhürunjj janiw muspharcañ luräwinacan Diosapäquiti, jupajj lurañap tucuyjjewa.

7. Jïsa, waljaniw utjani, ucat sapjjaraquini: Mankʼapjjam, umapjjam, cusistʼapjjam, cunalaycutejj kharüruw jiwjjañäni, take cunas jiwasanacataquejj waliquïscaniwa –sasa.

8. Jïsa, waljaniraquiw sapjjani: Mankʼapjjam, umapjjam, cusistʼasipjjam; ucampis Diosar ajjsarapjjaraquim. Jupajj mä jucʼa juchanacarojja, waliquïsquiw –saniwa. Jïsa, mä jucʼa cʼartʼasisipcam; yakha jaken arunacapïpan jumanac pachpatac asc jicjjatapjjam; masiman jalantañapatac mä sipit waquichapjjam. Ucanjja, janiw cuna ñankhas utjquiti. Kharüruw jiwjjapjjañäni, take ucanac lurasipcaquim. Ucat-tejj jiwasanacajj juchañchatäñänejja, Diosajj mä kawkhac jawkʼantistani. Uca khepatsti khespiyatäpjjañäniw Diosan khapak marcapana.

9. Jïsa, waljaniw uqhäm yatichapjjani. Cʼari, inamaya, tʼajjmar yatichäwinac yatichapjjani; chuymanacapansti jachʼa jachʼaw tucupjjani; ucatsti Tatitun amtäwinacap imantañataquiw chʼamachasipjjani. Luräwinacapasti chʼamacanacan lurasini.

10. Kollan jakenacan wilapasti oraketpach artʼani jupanacar ircatañataqui.

11. Jïsa, takeniw jupanacajj thaquit saranucupjje; takeniw jan walir tucupjje.

12. Jachʼa jachʼa tucuñata, cʼari yatichirinacata, cʼari yatichäwinacat tamanacapajj jan walir tucupjje, ucat jachʼachasipjjaraqui.

13. Suma cʼajquir kollan utanacapïpan jan cunaninacar lunthatapjje. Suma isinacapïpan jan cunaninacar lunthatapjje. Llampʼu chuymaninacampir aynachtʼat chuymaninacampirojj arcanakapjjewa, cunalaycutejj jachʼa jachʼa tucur chuymapaw uqhämar tucuyi.

14. Cunca waytataw sarnakapjje, pʼekes waytataraqui. Jïsa, jachʼa jachʼa tucurïtap laycu, ñankh lurirïtapata, ajjtcañ luräwinac lurirïtapata, kʼañusirïtapata, takeniw jupanacajj saranucupjje. Mä kawkha llampʼu chuyman Cristor arquirinacaquiw jan saranucupquiti. Ucampis jakenacan amuyäwinacapan jupanacar yatichatätap laycojja, walja cutiw jupanacajj pantjasipjjaraqui.

15. Ay yatiñan jakenaca, yatekat jakenaca, jachʼa jachʼa tucur chuymapamp lonkhoptir kamirinaca! Ay cʼari yatichäwinac yatichirinaca, kʼañusirinaca, Tatitun cheka thaquipar ñankhaptayirinaca! Ay, ay, ay jupanacata! –siw Take Chʼaman Dios Tatitojja; jupanacajj mankhapachar nuqhuntatäpjjaniwa!

16. Ay qhitinacatejj jan cuna juchat asqui jaker jakonucupqui, ucatsti sumäqui ucat ñankha arsupqui, janiw ucajj cuna alanïquis sapcaraqui ucanacata! Cunürutejj Dios Tatitojj acapach orakenquirinacar acatjamat sartʼcan ucürojj purininiwa. Cunüruntejj jupanacajj ñankha cancañan kʼal pokorapcan ucürun jupanacajj tucusipjjani.

17. Ucampis acapach orakenquirinacatejj ñankhätapata, ajjtcañ luräwinacapat cutiquipstapcanejja, jupanacajj janiw tucqhatäpcaniti –siw Nuwasiri tamanacan Tatitupajja.

18. Ucampis take oraken kʼañusir warmipäquis uca jachʼa ajjtcañ tamaw llojjesiñapäni. Ucan llojjesïwipasti jachʼaraquïniwa.

19. Cunalaycutejj supayan marcapajj qhathatiniwa. Ucamp chicäpqui ucanacasti juchanacat cutiquipstañapatac onjjtayatäpjjañapäniwa, jan ucasti supayaw jan tucusir cadenanacapamp jupanacar catuntani. Ucatsti colerasiñatac tirctayatäpjjaniwa, ucat tucusipjjani.

20. Cunalaycutejj ucürunjja, jaken wawanacapan chuymanacap tirctayasaw kʼapisiyani, ucatsti jupanacarojj colerasiñaruw tirctayani sumäc uca contra saytʼapjjañapataqui.

21. Yakhepanacarusti jupajj samartʼayaniwa, janchin sumancañapampiw icqhayani, jupanacan sañanacapataqui: Sionanjja, take cunas waliquïsquiwa. Jïsa, Sionajj jachʼaptiwa; take cunas waliquïsquiw –sasa. Uqhäm supayajj almanacapar sallkjje, cʼachhat cʼachhat mankhapacharojj jupanacar irpanti.

22. Jïsa, yakhepanacarojj maysat parli, janiw mankhapachajj utjquit –sasajja. Jupanacarusti saraquiwa: Janiw nayajj supayäcti, janiw supayajj utjquiti –sasa. Uqhäm jinchupar cʼachhat parljjayi, ajjsarcañ cadenanacapamp jupanacar catuntañapcama. Uca cadenanacatsti janiw qhitis jupanacar antutaycaniti.

23. Jïsa, jiwañamp mankhapachampejj jupanacaruw catunti. Ucat jiwañampi, mankhapachampi, supayampi, take qhitinacatejj ucanacan catuntatäpqui ucanacampejj Diosan jilïr konuñap nayrakatar uñstapjjañapäni, luräwinacaparjam taripatäñataqui. Uca chekat sarapjjañapäni jupanacatac waquichatäqui ucawjaru, jïsa, mä nina azufre kotaru, ucasti jan tucusir mutuñawa.

24. Ucalaycu, ay qhitinacatejj Sionan samarapqui ucanacata!

25. Ay, qhitinacatejj take cunas waliquïsquiw –sas artʼapqui ucanacata!

26. Ay qhitinacatejj jaken amuyäwinacapar yäkapqui ucanacata, ucatsti Diosan chʼamapamp Kollan Ajayun churäwipampejj janiw utjquit –sas ucar ajjarnucupqui ucanacata!

27. Jïsa, ay qhititejj aqhäm sisqui ucata! Niy catokapjjtanwa, janiw jucʼamp cunas waquisquiti!

28. Ay take qhitinacatejj Diosan chekätapat qhathatis colerasipqui ucanacata! Cunalaycutejj qhitinacatejj karkjjar ut-tʼayatäqui ucanacajja, cusisiñampiw ucjj catokapjje. Ucampis qhitinacatejj chʼalljjar ut-tʼayatäqui ucanacasti, tincuñar ajjsarasaw qhathatipjje.

29. Ay qhititejj siscani: Diosan arupjj niy catokjjapjjtanwa, janiw jucʼamp Diosan arupan utjañapajj cunataquis waquiscjjeti; waquisquis ucjj niy catokjjapjjtanwa –sisqui ucanacata!

30. Cunalaycutejj aqhäm siw Dios Tatitojja: Jaken wawanacaparuw churä chekat cheka, amuyäwit amuyäwi, mä jucʼa acana, mä jucʼsti ucana. Qhuyapayataw amuyäwinacajjar yäkerinacajja, ewjjatajjar istʼirinacasa; jupanacajj suma amuyañ yatekapjjani, qhititejj catokqui ucarojja, jucʼamp churä. Qhitinacatejj niy utj-jjew sapqui ucanacatjja, cunanacatejj jupanacan niy utjqui ucanacamp-pach apakatäniwa.

31. Ñankhachataw jaker iyawsirejja, jan ucajja amparap quicpa janchipat lurasirejja, jan ucajja, jakenacan amuyäwinacapar yäkerejja, janitejj uca amuyäwinacapajj Kollan Ajayun chʼamapan churatäqui ucqhajja.

32. Ay gentilenacata! –siw nuwasiri tamanacan Dios Tatitupajja. Jupanacjjar urut urur amparajj loktcä ucasa, jupanacajj nayat sapjjani, janiw Tatitojj utjquiti –sasa. Ucampis amparajjajj urpachaw jupanacjjar loktatäsqui –siw Nuwasiri tamanacan Dios Tatitupajja. Jupanacatejj juchanacat cutiquipstasa nayar jutjjapjjanejja, nayaw jupanacarojj qhuyapayä –siw nuwasiri tamanacan Dios Tatitupajja.