1. Ucapachajja wali munatajjaruw kʼochü, munatajjan kʼochupa, jupan uva yapupjjata. Nayan wali munatajjajj mä uva yapuniwa, mä wali achur kolluna.

2. Jupasti yapuruw perkamp muytayäna, ucatsti kalanac pallsüna, suma uva alinac ajllisaw aruntäna; uca taypinsti mä saytʼu pucara luräna; uqhämaraqui uva chʼirwir ucqhan luräna; ucatsti uvan achuñap suyaraquïna, ucampis ucanjja, qʼitha uvanacaw achüna.

3. Jichhasti, Jerusalenanquir Judanquir jakenaca, amuytʼapjjañamataquiw achictʼasipjjsma nayampit uva yapujjampita.

4. Cunat jucʼamps uva yapujjatac lurirista niy lurctsa ucanacjjarojja? Uqhämasti, mojjsa uva achuñap suycäyät ucqhajja, qʼitha uvanacaquiw achüna.

5. Jichhasti, cuntejj uva yapujjar lurcä uc yatiyapjjäma. Jarcʼatäqui uc apakä, yapujjasti kʼala tucqhatäniwa. Muyuntatäc uca perk allinucü, yapujjasti kʼala tacsutäniwa.

6. Ucatsti chʼusaptayäwa, janiw ucajj laymiratäcaniti, alltatäcanisa. Añawayamp chʼaphinacampiquiw alini. Kenayanacaruw camächit churä ucanacan ucjjar jan jalluñapataqui.

7. Nuwasiri tamanacan Tatitupan uva yapupajja, Israelan utapawa; Judanquir jakenacasti jupan suma mojjsa aliparaquiwa. Asqui taripaw suyäna, ucampis tʼakhesiyañaquiw utjäna. Asqui cancañaruw suyäna, ucampis aykoñaquiw utjaraquïna.

8. Ay qhitinacatejj utat utar mayachapqui ucanaca, jan cunawjas utjañapcama, jupanac sapaqui orak taypin kheparañataqui.

9. Jinchujjanquiw –siw nuwasiri tamanacan Tatitupajja. Chekpachan walja utanacaw chʼusäcaspas uqhäm tucusini, jachʼa suma marcanacaw jan jaquirin uñjasiraquini.

10. Jïsa, tunca hectarea uva yaponjja, mä batoquiw achuni. Homer tupu jathatjja, mä efa tupuquiw achuni.

11. Ay qhitinacatejj alcohol umañatac wali alwat sartapqui, arumcam umapqui, vinomp machapcaraqui ucanaca!

12. Jupanacan fiestanacapan utji: harpanaca, mandolinanaca, bombonaca, flautanaca, vinonaca. Ucampis jupanacajj janiw Tatitun luräwip yäkapquiti, janiraquiw amparapan luratanacapjjats amuyapcaraquiti.

13. Uqhämasti, marcajjajj catuntat anaquitaw uñjasi jan yatiñanïtap laycu. Jupanacan asqui jakenacaparojj mankʼat awtji. Jupanacan jake tamapasti umat pharjataw jiwarapjjaraqui.

14. Ucatwa, mankhapachajj jachʼaptayasi, lacapsti jan tuptʼcayaw ansatati. Jupanacan khapak cancañapampi, jachʼa jake tamapampi, jachʼa jachʼa tucüwipampi, cusisit utjasqui ucampejj ucsaruw mantapjjani.

15. Ina jakejj jiscʼachatäniwa; chʼaman jakesti altʼayatäniwa; aytat jakenacan nayranacapajj altʼayataraquïniwa.

16. Ucampis Nuwasiri tamanacan Tatitupajja, taripäwimp aytatäniwa, Kollan Diosasti asqui cancañamp kollanaptayatäniwa.

17. Ucatsti ovejanacajj cunjämtejj mankʼapjjerïqui uqhämaw mankʼapjjani. Chʼaman jakenacan chʼusawjanacapan jan uñtʼat jakenacajj mankʼapjjani.

18. Ay qhitinacatejj alek jachʼa jachʼa tucuñ wiscamp ñankha luräwinac katatqui, juchsti mä wiscampïcaspas uqhäm katatipcarac ucanacata!

19. Qhitinacatejj sapqui: Jupajj jancʼachpan, luräwip lak lurpan, jiwasan uc uñjañasataqui. Israelan Kollanapan ewjjapajj jutpan, jiwasan uc uñtʼañasataqui.

20. Ay qhitinacatejj ñankharojj sumaw sapqui, sumarusti ñankhaw sapcaraqui ucanacata. Qhitinacatejj chʼamacanac uchapqui khana lanti, khan uchapcaraqui chʼamacanac lanti, mojjsat cʼallcʼu uchapqui, cʼallcʼutsti mojjsa uchapcaraqui!

21. Ay qhitinacatejj quipca amuyuparjam amuyunïpqui, quipca uñjataparjam amuyasirïpcaspas ucanacata!

22. Ay vin umtʼir aytat jakenaca, umañanac chharkhoñatac chʼaman jakenaca!

23. Ay qhitinacatejj suma churäw catokañatac ñankha jakenacar arjjatapqui; asqui jaketjja asqui cancañ apakapcaraqui ucanacata!

24. Ucat Nuwasiri tamanacan Tatitupan leyip jupanacan jakonucutap laycu, Israelan kollanapan arup uñisitap laycu, cunjämatejj ninajj yawit alinac japuntqui, lawrajj chʼallphar phichhantqui uqhämaw jupanacan saphipajj ñusantani, pankaranacapasti lakʼjamaw tucusini.

25. Ucat Tatitun colerasiñapajj jupan marcapataquejj aktayata. Amparap jupanacaru lokti, ucatsti jawkʼantaraqui. Kollunacasti qhathatipjjewa; jupanacan amayanacapasti thaquinac taypin jalanoktayatäpjje. Take ucanacampis janiw colerasiñapajj apaktquiti, amparapajj jichhacamas lokatatatäscaquiwa.

26. Jupasti jaya marcanacataquiw mä unañch aptani. Oraken thiyapat jupanacar qhuytʼani. Jupanacasti jancʼaw jutapjjani, janiw qhitis jupanac taypitjja karjascaniti lanktascanisa.

27. Janiw qhitis ic-caniti icjcanisa, janiw qhitirus wacʼapajj jararascaniti, wisqhupan chinuñapas tʼakjjascaraquiniti.

28. Ucanacan michʼinacapajj arïniwa, take arconacapasti suma jiyintatäniwa, caballonacapan cayupajj samañch kaljamäniwa, cʼuncʼunacapasti tutucjamäniwa, khojjokeripasti leonjamaraquïniwa.

29. Ancut leonanacjamaw khojjokepjjani. Jïsa, khojjokepjjaniwa, ucat mankʼañap catjapjjani, ucat jan camächat ucanacjj apsupjjani. Janiw qhitis antutaycaraquispati.

30. Ucürunjja lamar khojjokerjamaw jupanac contrajj khojjokepjjani. Jupanacatejj oraker uñtapjjaspajja, acajjay chʼamacanacamp llaquinacamp uñjapjjani. Ucanquir alajjpach khanajj chʼamactʼayatäspawa.