1. Jichhasti Jose, nayajj juma sull ca yokajjaru arsüma. Nayan tʼakhesïw wasarajjanjj jumajj yuritätawa. Jisa, nayan jila llaquinacajj urunacanjja taycamajj jumar wawachaytamjja.

2. Aca orakejj mä sinti qhustʼata orakewa. Tatitojj jumataqui aca orakjj yakhacharappan juman tuti orakemataqui, juman jathamampin jilanacamampina tuti orakepataqui, jumanacan wiñay sumancañamataqui, jumanacatejj Israelan Kollanapan camachitanacap phokhapjjätajj uqhajja.

3. Jichhasti, qhit-tejj tʼakhesïw wasarajjat apsuncäyäsma juma Jose sullca yokajja, Tatitojj wiñay jumar qhuyapaypan, cunalaycutejj jathamajj janiw kʼal tʼunjatäpcaniti.

4. Cunalaycutejj jumajj jiqhanejjan achupätawa; nayasti qhiti Joseatejj Egiptor catuntat apatäcänjja uca Joseat jathasitätwa. Tatitojj Joseatac lurcäns uca amtäwinacajj jachʼaraquïnwa.

5. Ucatwa, Joseajj chekpachaw urunacasar uñjäna. Tatitut mä arsüw catokäna, jupan jiqhanipan achupata Dios Tatitun mä asqui laymi aytañapataqui, Israelan utapataqui. Janiw ucajj Mesiasäcaspati antisasa ucajj mä khakhakat laymispawa. Ucampis uca laymejja Tatitun amtäwinacapanjj amtatäspawa. Jupanacar chʼamacat khanaru apsuñataqui, jisa, imantat chʼamacats catuntatäwipats antutatäwiru apsuñataqui Mesiasan khep khepürunacan jupanacaru chʼamampi uñstayasitapjjata uca amtäwinacajj yatiyäna.

6. Cunalaycutejj Joseajja chekpach ircatäna aqham sasa: Dios Tatitojjajj mä uñjiriru sartayani; ucasti mä ajllita uñjirïniwa jiqhanejjan achupataqui.

7. Jisa, Joseajj chekpachaw säna: Tatitojj aqham situ: Mä ajllita uñjiriruw jiqhaniman achupat sartayäjja. Jiqhaniman achup taypinjja jupajj wali yäkatäniwa. Juparuw camachit churäjja jupan mä luräw lurañapataqui jiqhaniman achupataqui, uca jupan jilanacapa. Ucasti jupanacataqui sinti sumäniwa; cuntejj awquinacamamp lurctsa uca amtäwinacjjats jupanacar yatiyani.

8. Juparu camachit churaraquëjja cawquïri camachittejj churcäjj ucaqui lurañapataqui, jan yakha cun lurasa. Jupasti nayan luräwejj lurani, ucat uñjatajjarjam jupajj jachʼäni.

9. Jupasti Moisesjamaw jachʼani; Moisesatsti sista, jupjj jumanacatac sartayäwa, Israelan utapan jakenacajjar Egipto oraket antutayañataqui.

10. Moisesaru sartayäwa jakenacamaru Egipto oraket antutayañataqui.

11. Ucampis mä uñjiriru sartayäwa jiqhaniman achupatjja. Juparu chʼamjj churaraquïwa, arojj jiqhaniman achuparu puriyañapataqui – janiraquiw arojjar puriyañapataquiquïquiti siw Tatitojja, antisasa, ucürunjja niy jupanac taypincjjani uca nayan arojjar iyawsayañapataquiraqui.

12. Ucatwa jiqhaniman achupajj kellkaniwa; Judan jiqhanipan achupajja kellkaraquini. Cunaraquitejj jiqhaniman achupan kellkatäcani, uqhamaraqui cunatejj Judan jiqhanipan achupan kellkatäcaraquini, ucanacajj chicaw jachʼaptani, cʼari yatichäwinacaru pejjtuyañataqui chʼajjwäwinacaru tucuyañataqui, jiqhaniman achup taypina sumancañjj attʼayañataqui, awquinacapat arsüwinacajjat jupanacaru khep khepürunacan yatiyañataqui siw Tatitojja.

13. Jumaru nayrapachjamar cuttayañatac luräwejjajj take jakenacajj taypina kalltcani ucürunjja, Israelan utapa, jupaw jan chʼamanïsin chʼamañchatäni, siw Tatitojja.

14. Aqham sasinjja Joseajj Diosan arji: Uca uñjiriruw Tatitojj qhuyapayani. Jupar tʼunjañ chʼamtʼirinacasti pejjtuyatäpjjani, cunalaycutejj Tatituta catokcta jiqhanejjan achupat uca arsüwejj phokhasiniwa. Jisa, uca arsüwin phokhasiñapat nayajj chekpachaw yattjja.

15. Jupan sutipasti nayan sutejj-jamäniwa. Sutipasti awquipan sutipamp quipcaraquïni. Jupasti nayjamäniwa cunalaycutejja, Tatitojj jupan amparap toketa puriycanejja ucajj Tatitun chʼamapampi jakenacajjaru khespiyasiñaru irpani.

16. Jisa, aqham Joseajj Diosan arjäna: Acjjat chekpachaw yattjja cunjamatejja Moisesat arsüwjjat chekpach yatctjja uqhama, cunalaycutejj Tatitojj nayar sitäna: Jathamaru wiñayatac imäwa.

17. Tatitusti saraquïna: Mä Moisesjj sartayäwa; mä lawanjja juparuw chʼam churäjja; juparu kellkañatac amuyu churaraquïwa, ucampis janiw lajjraparu wal arsuñapatac jararcäti, cuñnalaycutejj janiw jupar arsuñataqui chʼamañchcäti. Ucampis nayan leyejj jupatac kellkäwa, quipca amparajjan lucʼanajjampi. Jupataquiwa mä arsuri luraraquëjja.

18. Tatitojj nayaru saraquitäna: Jiqhaniman achupataqui sartayäwa. Jupataquiwa mä arsuri luraraquï. Nayajja, jisa, nayaw jupar chʼam churäjja jiqhaniman achupan kellkatanacapjja jupan kellkakañapataqui, jiqhaniman achupataqui. Jiqhaniman achupan arsuripasti ucjj arnakaraquini.

19. Nayan suma amuyojjarjam cuñna arunacan jiqhaniman achuparu sarañapajj waquiscani uca arunacjj jupajj kellkani. Juman jiqhaniman achupajj jupanacar lakʼat artʼapcaspas uqhamäniwa, cunalaycutejj nayaw iyawsatapar uñtʼta.

20. Jupanacasti lakʼata artʼapjjaniwa, jisa, walja jathanacan jupanacat sarakañap khepatjja, juchat cutiquipstañataqui jilanacaparu artʼani. Ucatsti artʼäwipajj artʼapuniniwa jupanacan arunacapan khanätaparjama.

21. Jupanacan iyawsatap laycu, arunacapajj nayan lacajjat mistuni juman jiqhaniman achupat sarakeri jilanacaparu. Iyawsañapanjja, jan chʼaman arunacaparojj chʼamaniruw tucuyäjja, cawquïr amtäwitejj awquinacamatac lurcäyäta uca amtäwejjat amtasiñataquejja.

22. Jichhasti Jose yokajja, uqham nayra awquejjajj Diosan arjäna.

23. Ucatwa, uca amtäw laycojja jumajj qhuyapayatätawa; ucatwa jathamajj janiw tʼunjatäpcaniti, jupanacan kellkatan arunacapar yäkatap laycu.

24. Jupanac taypinjja mayniw sartani, walja sumanac lurani arumpi luräwimpi. Mä irnakañäcaspas uqhamäniwa Diosan amparapanjja; wal iyawsanejja jachʼa muspharcañanac lurañataqui. Diosan amuyupan jachʼäqui ucjj luraraquini, Israelan utaparu jilanacaman jathaparu nayrapachjamaru wali cuttayañ puriyañapataqui.

25. Jichhasti, qhuyapayatätaw jumajja, Jose. Jumajj jiscʼätawa, ucat Nefi jilaman arunacapar yäkam, ucat aca arsutajjarjamaw jumar camachätam. Jiwiri tataman arupat amtasim. Uqhamäpan.