1. Ucjjarusti Tatitojj nayar sascaquituwa: Mä jachʼa tʼalpha cʼull catum, ucatsti ucar kellkantam jaken plumapampi, Maher-shalal-hash-bazsatjjata.

2. Ucatsti cheka ircatirinac kellkañapatac catuyäta; Urías sacerdotempir Jebaraquiasan Zacarias yokapampiru.

3. Ucatsti warmi arjirimpiw chicthapta; jupasti usur jakeptänwa, mä yokall waw wawachasiraquïna. Ucat Tatitojj nayar situ: Sutipjj Maher-shalal-hasb-baz sutiñcham.

4. Cunalaycutejj uca wawajja, janïr awquejj taycajj sas arsuñ yatcan ucqhacamaw Damascon jachʼa alaninacapamp Samarian apakat jachʼa alaninacapajj Asirian pʼekechirip nayrakatar apatäni.

5. Tatitusti wastat nayar parlitu, aqhäm sasa:

6. Aca jakenacajj Siloen cʼachhat sarir umanacap jan catokataparjamajja, Rezinampit Remaliasan yokapampit cusisiñaparjamajja,

7. Tatituw jupanacjjarojj jawiran umap llunchusiyani, wali chʼamani, walja umaniraqui. Jïsa, Asirian pʼekechiripamp take khapak cancañapamp jupanacjjarojj llumirayani. Umasti, take jawir lacanacapjjaru, irananacapjjaruw llumirani.

8. Lluñchusisasti, Juda taypinjamaw umajj llumini. Take cun chhaktayasasti cuncacamaw maqhatani. Jupan ayatatat chhekhanacapasti takpach orakeman phokhantani, Emmanuela!

9. Jumanac pur mayachthapisiñar mantapjjam jakenaca, ucatsti tʼunjatäpjjätawa. Jaya orakenquirinac istʼapjjam, wacʼantasipjjam, ucatsti tʼunjatäpjjätawa. Wal amuyasipjjam, ucatsti tʼunjatäpjjätawa.

10. Jumanac pur arustʼasipjjam; ucasti janiw cunataquis walïcaniti. Ar arsupjjam, uca arusti janiw achtʼcaniti, Diosan nanacampïtap laycu.

11. Cunalaycutejj Tatitojj uqhäm chʼaman amparampiw nayar parlitu, nayar yaticharaquitu, aca jakenacan thaquipanjam jan sarnakañajjataqui, aqhäm sasa:

12. Qhitinacarutejj uca jakenacajj arustʼäwiw utji sapcani ucanacarojj jan samti: Arustʼäwiw utji –sasajja. Ajjsarañapamp chicajj jan ajjsaramti; janirac qhathatimti.

13. Nuwasiri tamanacan Tatituparojj jachʼar aptapjjam, jupay jumanacan ajjsarañamäpan juparac jumanacan ajjsarthapiñamäpan.

14. Ucat jupajj mä kollan utar uñtatäniwa. Ucampis paypach Israelan utapataquiw jupajj lanktañ kaljamäni, nuwasiñ kaljamaraquïni. Jerusalenanquirinacataquisti jupajj catuntir sipitjamäniwa.

15. Jupanacatjja waljaniw lanktasipjjani, jalaktapjjani, tucqhatäpjjani, sipitatäpjjani, catuntatäpjjaraquini.

16. Uca ircatäw chinuntam, arquirinacajj taypin ley lluchʼintam.

17. Nayasti Tatituruw loktä, jupaw Jacobon utapatjja, ajanup imanti, juparuraquiw nayajj suyä.

18. Nayampi, Tatitojj churquitän uca wawanacampejja, nuwasiri tamanacan Sion Kollun utjir Tatitupan unañchanacapataquïpjjtwa, Israelan muspharcañanacapataquïpjjaractwa.

19. Cunapachatejj jupanacajj sapcätam: Ajayunac uñtʼirinacaru, chhuchhur chhiphisir yatirinacar thakapjjam –sasa. Janit mä marcajj Diosapar thakañapäqui jaquirinacan jiwatanacjjat yatipjjañapataquejja?

20. Leyirjamawa; ircatäwirjamawa. Jupanacajj janitejj aca arurjam parlapcanejja, jan khananïpjjatap laycuwa.

21. Ucanjamsti, wali tʼakhesita, mankʼat awtjayasitaw jupanacajj sarapjjani. Ucatsti mankʼat jupanacar awjtcan ucqhajja, wal colerasipjjani, pʼekechiriparu Diosaparuraquiw jupanacajj ñankh arusipjjani, alayar uñchʼuquipjjaraquini.

22. Ucatsti orakeruw uñtapjjaraquini; jan waltʼäwinacaru, chʼamacanacaru, tʼakhesiñ chʼamacaruw uñjapjjaraquini. Chʼamacar alisrantatäpjjaraquiniwa.