1. Jacobojj ucapachajj walja yakhanacjjat jakenacajjar parläna, ucampis acanacac kellkayta, cunalaycutejj kellkcta ucaquiw amuyatajjat kellkañajj waquisi.

2. Jichhasti, chuymajjajj Isaiasan arunacapat cusisi, ucat naya Nefejj jucʼamp arunacap kellkta. Cunjämatejj nayajj Cutsuyirijjar uñjctsa uqhäm jupajj Cutsuyirir chekpach uñjaraquïna; ucat arunacapan nayan jakenacajjataquïtap khanañchä, take wawanacajjaruraquiw uca arunac apayaraquï.

3. Cunjämatejj nayajj Cutsuyirijjar uñjcta uqhämaraquiw Jacobo jilajjajj jupar uñjaraqui, ucat Jacobompin Isaiasampin arunacap wawanacajjar apayä, jupanacar amuyayañataqui nayan arunacajjan chekätapjjata. Cunalaycutejj quimsanin khanañchäwipampiw arunacajjan chekätapjj ut-tʼayä –siw Diosajja. Ucampis Diosajj jucʼamp ircatirinac qhiti, take arunacapan chekätap ut-tʼayaraqui.

4. Jïsa, jakenacajjar Criston jutañapan chekätap amuyayasaw chuymajjajj cusisi, cunalaycutejj ucataquiw Moisesan leyipajj churatänjja; take cunanacatejj oraken kalltäwipatpach jakenacar Diosat churatäcan ucanacajja, jupanacar jupjjat amuyayañataquiwa.

5. Ucatsti chuymajjajj cusisiraquiwa, Tatitus awquinacasamp lurcän uca arusjäwinacapata. Jïsa, chuymajjajj churäwipan cusisi, uqhämarac chekapar uñjañ cancañapana, chʼamapana, qhuyapayasiñapana, jiwañat khespiyañatac jachʼa wiñay amtäwina.

6. Chuymajjasti cusisiraquiwa marcajjar amuyayañana, Cristotejj jan jutcaspajja, take jakenacaw tucusipjjaspa.

7. Janitejj Cristojj utjcaspajja, janiraquiw Diosajj utjcaspati. Janitejj Diosajj utjcaspajja, jiwasanacajj janiraquiw utjcsnati jan luräwi utjatap laycu. Ucampis mä Diosaw utji; ucasti Cristowa. Jupasti quicpa munañaparjam phokhat pachan jutani.

8. Jichhasti Isaiasan mä kawkha arunacap kellkä, cawquïr marcajjanquirinacatejj uc uñjapcan ucanacajja, chuymanacap aptañapataqui, take jakenacat wal cusisiñapataquiraqui. Jichhasti ucaw arunacajja; jumanacasti ucarjam sarnakäwinacaman lurapjjam, uqhämarac take jakenacarus uqhämarjam uñjapjjaraquim.