1. Jichhajja, naya Nefejja Dios Tatitojjaru wal artʼasïyäta, jilanacajjan colerasitap laycu.

2. Ucampisa nayatac kʼapisiñapajj jiltänwa, jacañajjaru jpuanacan apakañ chʼamtʼañapcama.

3. Jisa, naya toke thuthusipjjäna, sasina: Sullcasajj jiwasjjaru sarayañ munistu; jupa laycusti jiwasajj wali tʼakhesiractanjja. Ucat juparu jiwayañäni, jan arunacapat jucʼampi tʼakhesiñasataqui. Janiw jupar jaytcañäniti jupan pʼekechirisäñapataqui. Jiwasa jilïrinacataquiwa aca marcaru pʼekechañajja.

4. Nayajj janiw take naya tok thuthusipcänsa take uca arunacjj kellkcti. Aqhaquiw nayan sañajjajja: Jupanacajj nayan jacañajj apakañ chʼamtʼapjjäna.

5. Ucatsti, Tatitojj nayaru eojjetäna, naya Nefin jupanacat mistuñajjataqui, wasararu jaltañajjataqui, take qhitinacatejj nayampi sarañ munapcaspa take ucanacampi.

6. Ucatwa, naya Nefejja familiajjaru irpäyäta uqhamaraqui Zoramaru jupan familiaparu, Sam jilïrejjaru jupan familiaparu, Jacob Jose sullcanacajjaru, uqhamaraqui cullacanacajjar, uqhamaraqui take qhititejj nayamp sarañ munapcänsa take ucanacaru irparaquïyäta. Nayampi sarañ munirinacasti Diosan eojjanacaparu yatiyäwinacaparu iyawsirinacäpjänwa. Ucat nayan arunacajjar yäkapjjäna.

7. Chʼujllanacajja, take cunanactejj apañäcan ucanacjja nanacampi chic apapjjäyäta, ucat wasaranjj sarapjjäyäta walja urunacawa. Walja urunac saratajjatjja chʼujllanacajj uttʼayapjjäyätjja.

8. Jakenacajjasti uca chekaru Nefi sas sutiñchañ muñnapjjäna, ucat uca chekaru Nefi sas sapjjäyäta.

9. Take nayampïcänsa take ucanacajj jupanac pachparu Nefin jakenacapa sutiñchañ munapjjaraquïna.

10. Take Tatitun camachinacap leyinacap camachitanacapjja take cunanaca phokhapjjaraquïyäta Moisesan leyiparjama.

11. Tatitusti nanacampïnwa. Nanacasti walpin jachʼaptapjjäyäta jatha phawatajjata, achunac jilarquir apthapitajjata. Uywa tamanacjja cunayman uywanac uywañ kalltapjjäyätjja.

12. Naya Nefisti tʼalpha kʼellu alquimia lekʼetanacjjar kellkantat kellkatanacjj apaniraquïyätjja. Niy kellkatäjje ucanacarjama, Tatitun amparapan awquejjatac waquichata morokʼo irpirjj apaniraquïyätjja.

13. Ucatsti, ucapachatjja walpin jachʼaptapjjäyäta, oraken miratatapjjaraquïyäta.

14. Naya Nefisti Labanan espadapar apasinjja uca espadjam walja espadanac luräyäta, uca niy Laman jakenac sata jakenacan jan nanacjjaru jutas tʼunjañapataqui, cuñnalaycutejj jupanacan nayaru, wawanacajjaru, nayan Nefi jakenac sat jakenacajjaru uñisitanacapjj yatïyät nayajja.

15. Jakenacajjaru yatichäyätjja utanac utachaña, take cunayman cʼulluta, jiruta, wila alquimiata, kʼellu alquimiata, chʼollkhe jiruta, korita, kollketa, jachʼa alani metalat luraña. Ucanacasti wali jilarquiriw utjaraquïnjja.

16. Naya Nefisti mä kollan uta utachäyäta; Salomonan kollan utapjama ucjj utachäyätjja, ucampis ucanjja jucʼampi jachʼa alaninacajj utjänwa nayajj utachcäyätsa ucatsipana, ucanacan aca orakenjj jan jicjjatatap laycu, ucat uca kollan utajj jan Salomonan kollan utapjam utachañjamäcänti. Ucampis, cunjam utachatapajj Salomonan kollan utapar uñtatänwa. Ucan luratanacajj sinti qhustʼataraquïnwa.

17. Ucatsti naya Nefejj jakenacajjan wal irnakañapataqui, amparanacapamp irnakañapataquiw sarayäyätjja.

18. Ucatsti jupanacajj nayan jupanacaru pʼekechirejjäñajj munapjjäna. Ucampis naya Nefejja jupanacanjj pʼekechirin utjañap janiw muncäyätti. Ucampis cuna lurañatac chʼamatejj nayan utjquitänjja ucarjamaw nayajj jupanacatac luräyäta.

19. Tatitojj nayan jilanacajjaru sarayirïñajjat yatichirïñajjat jupanacjjar arscäna uca arunacajj jilanacajjataqui phokhasïnwa. Ucatjja nayajj jupanacan sarayiripäyätjja, yatichiripäyätsa, Tatitun camachitanacaparjama, nayan jacañajj apakañ chʼamtʼapcänjja ucürcamajja.

20. Ucatwa phokhasïna cuna artejj Tatitojj nayaru sas arsquitäna: Arunacamaru jan iyawsañaparjamajja jupanacajj Tatitun nayrakatapat jarcʼakatäpjjani sasina. Ucat, jupan nayrakatapat jupanacajj jarcʼakatäpjjänwa.

21. Ucatsti jupajj ñankhachäwi jupanacjjar puriyäna. Jïsa, mä llaquiscäw ñankhachäwi, jupanacan ñankhätap laycu; cunalaycutejj jupanacajj chuymanacap juparu nuwasiri kalaptayapjjäna, samañch kaljam tucuñcama. Ucat jupanac jankʼöpana, sinti suma uynaktʼanïpana, jiwaquïpana, Dios Tatitojj jupanacarojj chʼiyär janchiruw tucuyäna, jakenacajjatac jupanacajj jan jiwaquïñapataqui.

22. Aqhäm siw Tatit Diosajja: Janitejj jupanacajj ñankha luräwinacapat cutiquipstapcanejja, jakenacamataquejj ajjtcañ jupanacar tucuyä.

23. Qhititejj jupanacan sarakerinacapamp quituntascanejja, ucan sarakerinacapajj ñankhachatäniwa. Ucanacasti uca quipca ñankhachäwimp ñankhachatäpjjaniwa. Tatituw uqhäm arsu, ucasti phokhasiniwa.

24. Jupanacjjar ñankhachäwin puritap laycusti, jupanacajj jayra jakenacaruw tucupjjäna; ñankhan phokhantat jakenaca, sallkanaca. Jupanacasti ajjsarcañ animalanac wasaran jiwayapjjaraquïna.

25. Dios Tatitusti nayarojj situwa: Jupanacajj mä asutʼïcaspas uqhämäniw juman sarakerimataquejja, jupanacar nayat amtayañapataqui. Janitejj jupanacajj nayat amtasipquitanejja, janirac arunacajjarus yäkapcaraquinejja, Laman jakenacajj tʼunjañcamaw asutʼipjjani.

26. Ucatsti naya Nefejja, Jacobompir Joseampiruw ut-tʼayta jupanacan sacerdotëñapataqui, yatichirïñapataqui, jakenacajjan orakep taypina.

27. Ucatsti cusisiñanjam jacapjjta.

28. Jerusalenat mistunipcäyät ucapachatjja, quimsa tunc maraw sarakjjäna.

29. Naya Nefisti, jichhacamaw imjjästa marcajjan sarnakäwinacapjja, ucanacasti cawquïr Tʼalpha Lekʼetanacjjarutejj kellkcäyät ucanacawa.

30. Ucatsti Dios Tatitojj nayaruw situ: Yakha tʼalpha lekʼetanac luram. Amuyujjarjam sumäqui ucanac ucanacjjarojj kellkantäta, jakenacaman sum catokañapataqui.

31. Ucat naya Nefejja, Tatitun camächitanacapar jaysañataquejja, aca tʼalpha lekʼetanac lurta, ucanacjjaruraquiw acanac kellkta.

32. Cunatejj Diosar cusisiyqui uc kellkant-ta. Ucatsti, nayan jakenacajjatejj Diosan yänacapat cusisipquejja, nayan aca tʼalpha lekʼetanacjjar kellkantatajjatjja, cusisipjjaraquiniwa.

33. Jakenacajjatejj jucʼamp marcajjan sarnakäwinacapjjat yatiñ munchejja, yakha tʼalpha lekʼetanacajjan thakañapa.

34. Acqhaquiw sañajjajj wactʼitu. Pusi tunc maraw niy tucusjje. Ucatsti niyaw nuwasïwinacas chʼajjwäwinacas jilanacajjampejj utj-jje.