1. Ucat Isain alipat mä lawajj mistuni. Jupan saphipatsti mä laymiw jiltani.

2. Tatitun Ajayupasti jupjjancaniwa; yatiñ cancañ ajayu, chʼiqhi cancañ ajayu, amuyayañ chʼamanïñ ajayu, Tatitur ajjsarañ yatiñ ajayu. Take ucanacaw jupjjan kamani;

3. Ucatsti juparojj Tatitur ajjsarañ wali suma amuy churani. Jupasti janiw quipca nayrapan uñjataparjam taripcaniti, quipca jinchupan istʼataparjamas janiraquiw tokenokcaniti.

4. Antisas asqui cancañampiw pobrenacar taripani; orakenquir llampʼu chuymaninac laycuw chekapar uñjas tokenokani. Lacapan lawapampiw oraker jawkʼjjani; laca ispillupan samakeñapampiw ñankha jakenacarojj jiwarayani.

5. Asqui cancañaw jupan cinturapan wacʼapäni. Chekapäñapasti jiqhanipan wacʼaparaquïniwa.

6. Lobojj ovej kallumpiw utjani. Leopardosti cabritompiw chic iquintani; vaca kallump ancut leonamp chʼaman vacampejj chicaw sarnakani. Mä jiscʼalalaraquiw ucanacarojj awatini.

7. Vacamp osompejj chicaw mankʼapjjani; kallunacapasti chicaw iquipjjani; leonasti torjamaw khachʼu mankʼani.

8. Ñuñur wawajj aspidan putupan anatani. Ñuñut tʼakarat wawasti basiliscon putupjjaruw amparamp lokjjatani.

9. Take cunan kollan kollujjarojj jan usuchjapcaniti, janiraquiw jiwayapcanisa, cunalaycutejj orakejj Tatitun yatiñapan phoktʼatäniwa, cunjämatejj umanacajj lamaran phokhatäpqui uqhäma.

10. Ucürunjja Isain saphipaw utjani. Ucasti take jakenacataquiw unañchjam saytʼani. Gentilenacasti uc thakapjjani; samaräwipasti khapakaraquïniwa.

11. Ucürun Tatitojj payïr cuti amparap loktani, jiltʼcän uca kheparir jakenacap wasitat catusjjañataqui, Asiriata, Egiptota, Patrosata, Cusata, Elamata, Sinarata, Hamatata, lamar islanacata.

12. Orakenacataquisti mä unañch saytʼayani. Israelan ananucutanacap tant-thapini. Ucatsti oraken pusi thiyapatpach Judan chʼeketatatanacap apthapiraquini.

13. Efrainan munarpayañapajj chhaktaniwa; Judan timanacapajj chhaktayatäniwa. Efrainajj janiw Judar munapaycaniti, Judasti janiraquiw Efrainar tʼakhesiycaraquiniti.

14. Jan ucasti, filisteonacan callachinacapjjan inti jalant toker jalapjjani. Inti jalsu tokenquirinacarusti panpachaniw tucqhapjjani. Edonjjampir Moabjjampiruw amparap lokjjatani. Ammonan wawanacapasti jupanacarojj jaysapjjaniwa.

15. Tatitusti Egipton lamarapan lajjrap kʼal tucqhani. Jachʼa chʼaman thayapampiw jawirjjar amparap loktani, ucatsti pakallk ucan jiquisir jawirjjaruw jawkʼantani, jakenacarusti wañanjam uca chek wisqhunejj maqhatayaraquini.

16. Ucatsti, Asiriatpach mä suma thaquejj jiltʼir jakenacapataquejj utjani, cunjämatejj Israelatac utjcäna cunapachatejj Egipto oraket mistuncän ucqhajja.