1. Nefin Jacob jilapan arunacapawa, cunanactejj jupajj Nefi jakenacar parlcän ucanaca.

2. Nayan munat jilanacajjay, naya Jacobojj Diosan jawsatätwa. Jupan kollan sucʼäwiparjam ut-tʼayatätwa. Nefi jilajjamp yakhachataraquïtwa, qhitirutejj jumanacajj pʼekechirit uñtʼasipcta, jan ucajja, mä arjjatirit uñtʼapcaracta, qhitirutejj thur saytʼapjjañamatac alcatapcta. Jumanacajj niy yatipjjtawa, waljanacpun jumanacarojj parlapjjsma.

3. Ucampis, wasitat parlapjjsma, chuymanacaman sumancañap munatajj laycu. Jïsa, llaquisiñajjajj jumanacat jachʼawa, camistejj jumanacas yatipcta uqhäma. Cunalaycutejj wali amuytʼa chuymampiw ewjjapjjsma, awquijjan arunacap yatichapjjaracsma; ucatsti jumanacarojj parlapjjaracsmawa cunanacatejj kellkatäc ucjjata, acapach orak luräwitpacha.

4. Jichhasti parlañ munapjjerisma, cunanacatejj jichhajj lurasqui jutir urunacas lurascaraquin ucanacata. Ucataquisti Isaiasan arunacap leetʼarapipjjäma. Jilajjaw uca arunac nayan jumanacar khanañchañajj munäna. Ucanacsti, jumanacan asquimataquiw parlapjjsma, Diosaman sutip jachʼar aptapjjañamataqui, uñtʼapjjañamataquiraqui.

5. Leetʼcä uca arunacajja, cuna arunactejj Isaiasajj take Israelan utapat parlcän uca arunacawa. Uqhämasti, ucanacajj jumanacataquiraquïspawa, cunalaycutejj jumanacajj Israelan utapanquirïpjjtawa. Isaiasan walja arsutanacapaw utji. Ucanacasti jumanacat parlatap amuyapjjaraquisma, Israelan utapanquirinacätam laycu.

6. Jichhasti, acaw arunacajja: Aqhäm siw Dios Tatitojja: Gentilenacataquiw amparajj aytä, unañchäwijjsti marcanacataquiw aptaraquï. Jupanacasti yokanacamarojj apanipjjaniwa; phuchanacamsti callachinacapjjaruw apanipjjaraquini.

7. Pʼekechirinacajj jumanacan uywir awquinacamäpjjaniwa; pʼekechirinacan warminacapasti jumanacan ñuñuyir taycamäpjjaraquiniwa. Orak uñjjatasaw nayrakatamar quilltʼasipjjani, cayuman lakʼanacapsti jupanacajj jallkʼapjjaraquiniwa. Ucatsti, yatïtaw nayan Tatitütajja, cunalaycutejj nayar suytʼirinacajj janiw pʼenkachatäpcaniti.

8. Jichhasti naya Jacobojj uca arunacjjat mä jucʼa parlañ munirista, cunalaycutejj Tatituw khanañchitu, cawquit-tejj jiwasanacajj jutapctan uca Jerusalenancapcän ucanacajja, tʼunjatäjjapjjewa, catuntat apatäpjjaraquiwa.

9. Ucampis Tatitojj jupanacan wastat cut-tanjjañapat uñachayitu. Israelan Dios Tatitu Kollanapan, jupanacar janchi token khanstañapjjat uñachayaraquitu. Uca uñstayasïwip khepatsti, juparojj asutʼipjjaniwa, ucatsti juparojj mä cruzjjaruw chʼac-catapjjaraquini, nayar parlquitu uca alajjpach qhitan arunacaparjama.

10. Israelan Kollanapatac chuymanacap kalaptayapjjatap khepata, altʼir chuymap Israelan kollanapatac kalaraycan uca khepatjja, Israelan Kollanapan taripäwinacapajj jupanacjjaruw purini. Cunüruntejj jupanacajj jawkʼjjatäpcani, tʼakhesiyatäpcani ucürojj puriraquiniwa.

11. Ucat jupanacan ucs acs alisnakatätap khepatjja, qhitan arsutanacaparjamajja, waljaniw janchin tʼakhesiyatäpjjani, ucampis janiw tucusipjjañapapunejj waquiscaniti, iyawsir jakenacan mayisïwinacap laycu. Jupanacajj chʼeketatatäpjjaniwa, jawkʼantatäpjjaniwa, uñisitäpjjaraquiniwa. Ucampis Tatitojj jupanacarojj qhuyapayaniwa, jupanacan wastat tuti churat orakenacaparuw mayachthapisipjjani, cunapachatejj Cutsuyiripjjat yatjjatapcan ucapachajja.

12. Qhuyapayataraquiw gentilenacajja, qhitinacat-tejj arjirejj kellkcäna. Jupanacatejj juchanacat Diosar cutiquipstapjjani, Sionaru jan nuwasisa, janirac uca jachʼa ajjtcañ tamamp chicachasisasa, jupanacajj khespiyatäpjjaniwa, cunalaycutejj Dios Tatitojj wawanacapamp lurcän uca arsüwinac phokhani. Ucatarac arjirejj acanacjj kellke.

13. Uqhämasti, Sionaru nuwasirinaca, Tatitump arusjat marcaru nuwasirinacasa, cayunacapan lakʼanacap jallkʼapjjani. Tatitun marcapasti janiw pʼenkachatäcaniti. Tatitun marcapajja, jupar suyapqui uca jakenacawa, cunalaycutejj jupanacajj jichhacamaw Mesiasan jutañap suyasipqui.

14. Jïsa, arjirin arunacaparjamajja, Mesiasajj wastat saytʼani, payïr cuti jupanacar nayrapachjam cut-tayañataqui. Ucat jupanacajj jupar iyawsapcani uca ur purcan ucqhajja, jupajj chʼamampi jachʼa khapak cancañampiw jupanacar uñachtʼayasini jupanacan timanacapar thant tucqhañataqui. Jupasti janiw qhiti jupar iyawsirirus thant tucjcaraquiniti.

15. Jupar jan iyawsirinacasti ninampi, jachʼa llijulliju chhijchhimpi, orak onjjtäwinacampi, wil wartäwinacampi, jachʼa usunacampi, machʼanacampiw thant tucqhatäpjjani. Tatitun Diosätapa, Israelan Kollanapätap jupanacajj yatipjjaraquini.

16. Cunalaycutejja, mankʼañajj chʼaman jaket apakatäniti? Jan ucajja, leyirjam catuntatanacajj antutayatäpjjanicha?

17. Ucampis Tatitojj aqhäm siwa: Wali chʼaman jaken catuntatanacapas apakatäniwa. Ucatsti, ajjsarcañäquis ucan mankʼañapajj antutayataraquïniwa, cunalaycutejj Jachʼa Chʼaman Diosajj arusjäw toke ut-tʼayatäc uca marcarojj khespiyaniwa, cunalaycutejj aqhäm siw Tatitojja: Qhititejj chʼajjwätamjja, nayaw ucanacampejj chʼajjwascä.

18. Qhitinacatejj tʼakhesiyctam ucanacarusti, quipca janchip mankʼayä. Quipca wilapampiw machantayatäpjjani, mojjsa vinomp machantayatäpcaspas uqhäma. Naya Tatitun Khespiyirimätajja, Cutsuyirimätajja, Jacobon Wali Chʼamanipätajjsa, take jakenacaw yatipjjaraquini.