Mosian Kellkatapa

1. Ucatsti, janiw jucʼamp chʼajjwanacajj takpach Zarahemla oraken utjcänti, janiraquiw Benjamin pʼekechirin jakenacap taypins utjcänti. Uqhämat Benjamin pʼekechirejj take jiltʼir urunacapanjja, sumancañan sarnakäna.

2. Jupajj quimsa yokanïnwa; sutinacapasti Mosia, Helorum, Helaman, ucanacänwa. Uqhämaraqui awquinacapan lajjrapat jupanacar yatichayaraquïna, jupanacan amuyasir jaker tucupjjañapataqui; lakʼa achilanacapan lacapat arsut yatiyäwinacat yatiñanacapataquiraqui. Uca yatiyäwinacasti Tatit tokew jupanacar catuyatäna.

3. Uqhämaraqui, bronce tʼalpha lekʼetanacjjar kellkatanacat jupanacar yaticharaquïn aqhäm sasa: Wawanacajjay, nayajj acanac amtasiñam munirista, janitejj kellkatanacan, camächitanacan tʼalpha lekʼetanacajj utjcaspajja, jan yatisaw jiwasajj mutuscasäna; janiraquiw jichhacamas Diosat jan amuyatäc ucanacjj yatcasänti.

4. Janitejj aca tʼalpha lekʼetanacajj utjcasapänjja, Lehi awquisajj take uca arunac wawanacapar yatichañataquejj janiw amtascasapänti. Jupasti egiptonquirinacan yatichatäsin uca kellkatanac arsuyäna, uqhämaraquiw jupajj ucanac wawanacapar yaticharaquïna, jupanacan quipca wawanacapar ucanac yatichañanacapataqui. Uqhämat Diosan camächitanacap jichhacam phokhañataqui.

5. Nayajj juma yokanacajjaruw sapjjsma: Diosan amparap laycuw aca arunacajj imatäsqui, Diosat jan amuyatäc ucanac leeñasataqui, amuyañasataqui, camächitanacapan sapa cut nayranacas nayrakatancañapataqui. Janitejj ucanacajj utjcasapänjja, jiwasan lakʼa achilanacasas jan iyawsañaruw puripjjasapäna, jiwasanacasti Laman jake jilanacasjamaw tucupjjasäna. Jupanacajj janiw ucanacat cuns yatipquiti, janiraquiw ucanac yatichatas iyawsapcaraquiti, lakʼa achilanacapan jan cheka yatichäwinacap laycu.

6. Ay wawanacajja! arunacampin kellkatanacampin chekätap amtasipjjañam munirista. Nefin tʼalpha lekʼetanacapasti chekaraquiquiwa. Ucan lakʼa achilanacasan kellkatanacamp arsüwinacapampejj utji; cunapachatejj Jerusalen marcat mistunipcän ucqhat jichhacama. Ucanacan utjatapampit chekätapampitjja, nayranacas nayrakatancatap laycuw yatipjjsnajja.

7. Jichhasti, wawanacajja, jumanacatac asquïñapataquiw uca kellkatanac uñjjatañatac chʼamachasiñ amtasipjjañam munta, uqhämaraqui Diosan camächitanacapar phokhañam munaracta, Tatitun lakʼa achilanacasar churat arsüwinacarjam aca oraken jachʼaptapjjañamataqui.

8. Walja yakha cunaymananac Benjamin pʼekechirejj yokanacapar yatichäna. Ucanacasti janiw aca libron kellkatäquiti.

9. Benjamin pʼekechirejj yokanacapar yatichañ tucuyqui uca khepatjja, jupajj chʼama karit awquirquipstjjänwa. Cawqharutejj take orakenquirinacajj sarapqui ucar sarañapan jacʼätap amuyasjjaraquïna; ucat marc sarayañjja, maynïr yokapar churañan waquisitap amuyasiraquïna.

10. Ucat jupa nayrakataruw Mosiar jawsayanïna. Aqhämarac juparojj parläna: Wawajjay, take aca orakena, take aca jakenac taypina, yatiynokañam munta. Uca jakenacasti Zarahemla jakenacawa, acan utjir Mosia jakenacaraquiwa. Uca yatiynokäwisti jupanacan tantachasipjjañapataquiwa; cunalaycutejj arumanthiw nayajj aca marcajjarojj quipca arujjamp yatiyä, juman aca marcan pʼekechiripätama sarayiripätamaraqui, cunalaycutejj aca marcjja Dios Tatituw churistu.

11. Uqhämaraquiw aca jakenacarojj mä sut churä, uca sutit marcanac taypin uñtʼatäjjani, cawquïrinacarutejj Tatitojj Jerusalen marcat irpsunqui ucanac taypina; jupanacan Tatitun camächitapar jan karis phokher marcätap laycuw ucjj lurä.

12. Uca sut jupanacar churcä ucajja, janipuniw chhaktayatäcaniti, juch lurapcan ucqhaquiw chhaktatäni.

13. Jïsa, uqhämaraquiw nayajj jumar sisma: Tatitun aca suma bendicit marcapatejj juch lurani, ñankha wachoker marcar tucuñapcamajja, Tatitojj jupanacarojj jilanacapjam tʼuqhartapjjañapataquiw antutnucuni; cunjämtejj lakʼa achilanacasar muspharcañ chʼamapamp jichhacam imqui uqhämjja, janiraquiw jucʼamp lurcaniti.

14. Nayajj jumaruw sisma: Janitejj Tatitojj lakʼa achilanacasar imañatac amparap lokatatcasapänjja, jupanacajj Laman jakenacan amparanacaparuw purisapäna, Laman jakenacan amparapan uñisitaw mutupjjasapäna.

15. Ucatsti, Benjamin pʼekechirejj yokapar aca arunac parlañ tucuyasinjja, take cunanac marcar sarayañapataquejj ewjjäna.

16. Uqhämaraqui, cuna kellkatanacatejj bronce tʼalpha lekʼetanacjjar kellkatäcan ucatarac jupar ewjjaraquïna; Nefin tʼalpha lekʼetanacapats ewjjaraquïnwa; Labanan espadapatsa, morokʼo irpirit jupar ewjjaraquïna. Uca morokʼo irpirejj lakʼa achilanacajjar chʼusa wasar taypin irpäna; ucasti Tatitun amparapamp waquichatänwa, sapakat maynin Tatitur istʼäwiparu, yäkäwiparjam jupanacar irpañapataqui.

17. Ucat jupanacajj Diosar jan chek yäkapcän ucapachajja, saräwipanjja, janiw nayrakatar sarapcänti, antisas kheparuw cut-tayatäpjjäna, Diosan colerasïwipasti jupanacjjaruw puriraquïna. Ucatsti lurapjjañapäcän ucat amtasiyañataquisti, mankʼat tʼakhesïwinacamp jachʼa mutüwinacampiw jupanacarojj mutuyatäpjjäna.

18. Jichhasti, Mosiajj awquipan arunacaparjamaw luräna; jupajj take Zarahemla orakenquirinacar tantachasiñanacapataquiw yatiynokäna, cuna arunactejj awquipajj jupanacar parlcän ucanac istʼir kollan utar maqhatapjjañapataqui.