1. Ucat Zenifajj yokapat maynïriruw pʼekechirïñapatac marc catuyjjäna, uca yokasti Noe satänwa. Noesti ucapachat jupa lant sarayañ kalltaraquïna. Jupasti janiw awquipan luräwinacap lurcänti.

2. Janiw jupajj Diosan camächitanacapar phokcänti. Antisas quipca chuymapan munañaparjamaw luräna. Jupajj walja warminïnwa, walja uñtʼataniraquïnwa. Jupajj marcaparuw juch lurayäna. Cunanacatejj Tatitun uñjataparjam ajjtcañäqui ucanac jupanacar lurayaraquïna. Jupanacasti kʼañusiñanacan sarnakapjjäna, cunayman ñankha luräwinac lurapjjäna.

3. Noesti impuesto apthapïna. Uca impuestosti take pheska yänacapat mayänwa. Jupanacan pheska koripata, kollkepata, Ziffapata, cobrepata, broncepata, jirupata, chʼaman vacanacapata, yaranapats mayaraquïnwa.

4. Take ucanacsti jupa pachpataquiw uñstayäna, uqhämaraqui, warminacapampir uñtʼatanacapampir uywañataqui; ucatsti, sacerdotenacaparu jupanacan warminacapampiru, uñtʼatanacapampiru. Uqhämat marcan luräwinacap mayjaptayäna.

5. Jupan awquipajj yakhaktaycän uca sacerdotenacarojja, jupajj alis-sünwa. Jupanac lantsti yakhanacaruw yakhaktayäna. Jupanacasti chuymanacapan jachʼa jachʼa tucurïpjjänwa.

6. Uqhämat jayrasiñan sarnakapjjäna, wacʼan diosanacar yupaychañana, kʼañusiñanacana. Cuna impuestonactejj Noe pʼekechirejj jakenacat maycän ucanacampiw jacapjjäna. Uqhämasti jakenacajj ñankha luräwinac utjayañataquejj wal trabajapjjäna.

7. Uqhämaraquiw jupanacajj cunayman wacʼan diosanacar yupaychirejj tucupjjäna. Cunalaycutejj pʼekechirin sacerdotenacan inamay jachʼar aptir arunacapaw jupanacarojj sallkjjäna, inamay jachʼar aptir arunac parlasa.

8. Ucat Noe pʼekechirejj walja jachʼa suma utanac utachayäna. Uca utanacarusti sum cʼachachäna: cʼullut luratamp take jila alan cunaymaninacampi; korimpi, kollkempi, jirumpi, suma broncempi, ziffampi, cobrempi.

9. Uqhämaraqui jachʼa palacio utacharaquïna. Uca palacio taypin mä sarayäw konuñ luraraquïna. Take ucanacajj suma cʼullut luratänwa, korimp kollkemp cunayman cʼajquirinacamp cʼachachataraquïnwa.

10. Uqhämaraquiw trabajirinacaparojj ewjjäna, cunayman suma luratanacamp templo mankha perkanac cʼachachapjjañapataqui; cʼulluta, cobreta, bronceta.

11. Jilïr sacerdotenacatac yakhachat konuñanacajj koritcam cʼachachatänwa. Uca konuñanacasti take yakha konuñanacat alayancänwa. Uca konuñanacan nayrakatapar mä patill perk lurayaraquïna, cʼari alek jachʼar aptir arunac marcapar parlas ucar thijmtʼasipjjañanacapataqui.

12. Kollan uta jacʼan mä saytʼu pucara luraraquïna, uca saytʼu pucarasti wali jachʼänwa. Uca saytʼu pucara patat jupajj Silom orakerojj uñtäna, Laman jakenacan amparapanc-cän uca Semlom orakerus uñtaraquïna. Uqhämaraqui take ucsa tok orakenacarus uñatataraquïna.

13. Silom orakensti, walja utanac utachayäna, ucatsti mä jachʼa saytʼu pucara utachayaraquïna, Silom oraket alay tokenquir kollu patana, cawqharutejj Nefin yokanacapajj imantasipcatayna, cunapachatejj oraket jaltjjapcän ucapachajja, cuna jila impuestonactejj marcat apcän ucampiw ucjj lurayäna.

14. Jupajj kamiriptañar chuyma churatänwa. Uqhämaraqui warminacapamp uñtʼatanacapampiw kʼañu sarnakäwinacan jan watjjtasajj urunacapan sarnakawayäna. Sacerdotenacapasti uqhämaraquiw kʼañusir warminacampejj urunacapan kamapjjaraquïna.

15. Ucat Noejj uva yapunac ucsa orak tokenacan yapuchäna; uva chʼirwañanac luräna, ucat vin walpin luraraquïna. Ucat jupajj wali umiriw tucüna; marcapajj uqhämaraquiw tucuraquïna.

16. Ucat Laman jakenacajj jupan marcapjjar jutañ kalltapjjäna. Jucʼa tamanacjjar purinisinsti, yapunacapan uywa tamanacap awatquiriruw jupanacar jiwayapjjaraquïna.

17. Noe pʼekechiristi arjjatirinacaparuw orak thiyanacar qhitäna, jupanacar jarqʼiri. Ucampis jucʼanic qhitäna, Laman jakenacasti jupanacjjar jutasaw jupanacar jiwarayapjjaraquïna. Uqhämaraqui walja uywa tamanacap uca oraket ansupjjaraquïna. Uqhäm Laman jakenacajj jupanacar uñisisajj tucqhañ kalltapjjäna.

18. Ucat Noe pʼekechirejj nuwasiri tamanacaparuw jupanacamp nuwasir qhitäna. Jupanacasti mä jucʼa pachatac alis-sutäpjjänwa, sañ muntwa, Laman jakenacarojj mä jucʼa pachataquiw alis-supjjäna. Ucat atipjasin catuntapcän ucatjja, cusisisaw cut-tapjjäna.

19. Uca jachʼa atipäw laycuw chuymanacapan jachʼa jachʼa tucupjjäna. Quipca chʼamapat amuyasisaw aqhäm saraquïna: Nanacat pheska tuncanejja, warank warank Laman jakenacaruw thurtʼasipjjaspa. Uqhämaw jupanacajj quipca chʼamapatjj jachʼachasipjjäna. Ucatsti uqhämaraquiw wilan wartasitapatjj cusisipjjäna, jilanacapan wilap wartasas cusisipjjaraquïna. Ucasti, pʼekechiripampin sacerdotenacapampin ñankhätap laycuw lurasïna.

20. Jupanac taypin mä Abinadi sat jakew utjäna. Jupasti jutir cunanacat yatiyasaw jupanac taypin sarnakäna, aqhäm sasa: Tatitojj aqhäm siwa: uqhämarac nayar camächit churitu: Saram ucat aca marcar aqhäm sätawa: Aqhäm siw Tatitojja: Ay aca marcata. Nayajj jupanacan ajjtcañ luräwinacap uñjta, ñankha luräwinacapa, kʼañusiñanacap uñjaracta. Janitejj jupanacajj nayar juchat cutiquipstapquitanejja, colerasiñajjampiw jupanacar sartʼä.

21. Janitejj jupanacajj Dios Tatitupar juchat cutiquipstapcanejja timanacapan amparanacaparuw jupanacar catuyä. Ucatsti jupanacajj catuntat anaquitäpjjaniwa. Timanacapan amparanacapan tʼakhesiyataw uñjasipjjani.

22. Ucatsti jupanacajj nayan Dios Tatitupätajj yatipjjetani. Juchanacapat colerasir Diosätajj ñankha luräwinacap tucqhirïtajj yatipjjaraquitani.

23. Janitejj aca marcajj Dios Tatitupar juchat cutiquipstapquitanejja, catuntataw anaquitäpjjani. Janiraquiw qhitis ucatjj khespiycaniti, jan ucasti Tatitu, Take Chʼaman Diosaquiw khespiyani.

24. Uqhämaraqui, jupanacajj nayar artʼasipjjetan ucapachajja, cʼachhaquiw artʼäwinacapar istʼä. Uqhämaraqui jupanacan timanacapan tʼakhesiyatäpjjañapatac antutä.

25. Janitejj jupanacajj cotenciot isin khellamp jachʼjjatasis nayar juchat cutiquipstapquitani, janitejj Dios Tatitupar chʼamamp artʼapcaraquinejja, janiw nayajj mayisïwinacapar istʼcäti. Janiraquiw tʼakhesiyäwinacapat jupanacar khespiycaraquïti. Uqhäm siw Tatitojja, uqhämarac nayar camächit churitu.

26. Ucatsti Abinadejj uca arunac jupanacar parlcän ucqhajja, jupataquiw colerasipjjäna. Jupar jiwayañ munapjjaraquïna, ucampis Tatitojj jupanacan amparanacapat juparojj khespiyi.

27. Noe pʼekechirejj cuna arunactejj Abinadejj jakenacar parlcän ucanacar istʼcän ucapachajja, jupajj colerasiraquïnwa. Ucat jupajj saraquïna: Qhitis Abinadejja, nayampir marcajjampir taripañapataquejja? Qhitis Tatitojja, marcajjar uqhäm jachʼa tʼakhesiyäw puriyañapataquejja?

28. Abinadir acar irpantaniñanacamataquiw mayipjjsma, jupar jiwayañajjataqui, cunalaycutejj jupaw acanacjj arsu marcajjar jupanac pur colerasiñ amtayañapataqui, marcajj taypin chʼajjwanac kalltayañapataquiraqui. Ucat nayajj jupar jiwayä –sasaw saraquïna.

29. Jakenacan amuyunacapajj juyqhücaspas uqhäm tucuyatäpjjänwa. Ucat Abinadin arunacapataquejj chuymanacap chʼollkheptayapjjäna. Ucapachatpach jupar catuntañ munapjjäna. Noe pʼekechiristi Tatitun arunacaparu chuymap chʼollkheptayaraquïna, janiraquiw ñankha luräwinacapat cutiquipstcaraquïnti.