1. Ucat nanacajj marcar wastat ut-tʼayañ kalltapjjta. Sumancañampiw ucan utjasiñ kalltapjjaracta. Nayasti take cun nuwasiñatac lurayta, cunalaycutejj Laman jakenacajj marcajjamp wastat nuwasir jutapcaspa ucapachajj nuwasiñanacajjataquiw ucanacjj lurayta.

2. Oraket sapa tokeruw arjjatirinac uchta, Laman jakenacan jan jamasat cʼuñcataniñanacapataqui, jan nanacar tucqhañanacapataqui. Uqhäm nayajj marcajjarus uywa tamanacajjarus arjjat-ta, timanacajjan amparanacaparojj janiw puriycaract-ti.

3. Nanacajj awquinacajjan tuti orakenacap walja maraw catupjjäyäta. Ucasti pä tunc payan maränwa.

4. Nayajj chachanacarojja, yap lurayäyäta, take cunayman yarananac phawayaraquïyäta. Take cunayman casta achunac achuyaraquïyäta.

5. Nayajj warminacarojj kapuyäyätwa, irnakayäyätwa, trabajayaractwa. Uqhämaraqui take casta ñutʼu lienzonac sawuyaraquïyäta. Take cunayman sawutanac sawuyaraquïyäta nanacan istʼasiñanacajjataqui. Uqhämat uca oraken jachʼaptapjjäyäta. Pä tunc payan mararaquiw suman utjasisapun uca oraken jacapjjta.

6. Ucatsti, Laman pʼekechirejj jiwjjänwa. Yokapasti ucapachat jupa lant sarayañ kalltäna. Jupasti jakenacaparojja, marcajjar kallcatañataquiw amtayäna. Uqhämat nuwasiñatac waquichasipjjäna, marcajjamp nuwasir jutañataqui.

7. Ucampis nayajj uñakerinacajjaruw Semlon orak toker qhit-ta. Jupanacan waquichasitanacap catjañataqui, ucanacjjat waquichasiñanacajjataquiw uc lurta, jupanacan marcajj-jjar jutasajj jan tucqhañanacapataqui.

8. Ucat jupanacajj Silom orak alay tokeruw walja jakenacamp maqhatanipjjäna; arconacani, michʼini, espadani, cimitarrani, kalani, kʼorawani. Jupanacan pʼekepajj kʼala mururatcamaquïnwa. Lipʼich wacʼan wacʼantataquïpjjänwa.

9. Ucat nayajj marcajjan warminacaps wawanacaps wasararuw imantayta. Ucat takpach chuymaninacaru, waynanacaru, cawquïrinacatejj armanac catupcaspa ucanacaruw tantachayta, Laman jakenacamp nuwasir sarapjjañanacajjataqui. Sapakat maynirusti maraparjamaw sarapjjañapataquejj uscta.

10. Ucat nanacajj Laman jakenacamp nuwasir sarapjjäyäta. Chʼama karitäcasas nayajj Laman jakenacamp nuwasiriw sarta. Nanacasti Tatitun chʼamapampiw nuwasir sarapjjta.

11. Laman jakenacajj janiw cuns Tatitut yatipcänti, janiraquiw jupan chʼamapat yatipcaraquïnti. Ucat quipca chʼamaparuquiw suyapjjäna. Ucampis jaken chʼamaparjam chʼaman jakenacäpjjänwa.

12. Jupanacajj chʼumi lakʼonacjam ajjsarcañ wali wil wartir marcänwa. Jupanacajj lakʼa achilanacapan catuyat luräwinacaparuw iyawsapjjäna. Acanacaw uca luräwinacajja: Jupanacajj lakʼa achilanacapan ñankhätap laycojja, Jerusalen oraket alisnucutäpcaspas uqhäm amuyasipjjäna. Chʼusa wasaran jilanacapajj jan wals jupanacar lurapcaspajj uqhäm amuyasipjjäna. Jachʼa lamar maqhatasajj jan walis jupanacar luratäcaspas uqhäm amuyasipjjaraquïna.

13. Lamar maqhatatap khepatjja, nayrïr tuti orakepancapcän ucqhajja, jan walipunis jupanacar luratäcaspas uqhäm amuyasipjjaraquïna. Take ucanacasti Nefin jucʼamp sum Tatitun camächitanacapar phokhatap laycünwa. Ucat Nefejj Tatitun qhuyapayatänwa. Tatitojj mayisïwinacaparuw istʼäna, phokharaquïna. Nefisti chʼusa wasar saräwipan pʼektʼäna.

14. Jilanacapajj janiw Tatitun luräwinacap amuyapcänti, ucat Nefitac colerasipjjäna. Lamar maqhatasinjja, Tatitur jan yäkañatac chuymanacapar chʼollkheptayatap laycuw jupatac colerasipjjaraquïna.

15. Arsut oraker purinisinjja, jupanacajj wastat jupatac colerasipjjäna. Jupajj marc sarayañjj nanacan amparanacajjat apakapjjetu –sasaw sapjjäna. Ucat jupar jiwayañ munapjjäna.

16. Nefin chʼusa wasarar Tatitun camächitaparjam mistutap laycojja, wastat jupatac colerasipjjäna. Nefisti utjcän uca bronce tʼalpha lekʼetanacjjan kellkatanac apasiraquïna. Jilanacapasti jupaw lunthatapjjetu –sasaw sapjjäna.

17. Ucat wawanacaparojja, Nefi jakenacar uñisiñ yatichapjjäna. Jupanacar jiwarayaña, lunthataña, lunthatjaña, cunjämat tucqhayañataquiw yatichapjjaraquïna. Ucat Nefin wawanacaparojj wiñay uñisipjje.

18. Uca pachpa amuyump lurañapataquiw Laman pʼekechirejj cʼari sallka jan wali amuyunïtaparjamajja, arsüwinacapamp nayar sallkjitu, marcajjar aca oraker irpaniñajjataqui, Laman jakenacan jupanacar tucqhañapataqui. nanacasti walja maranacaw aca orakenjj tʼakhesipjjta.

19. Naya Zenifasti take ucanac marcajjar yatiycäyät ucqhajja, jupanacan take chʼamapamp Tatitur iyawsas nuwasir sarapjjañapataquiw amtayta. Ucat Laman jakenacampejj ajanuy ajanuw nuwasipjjta.

20. Nanacasti jupanacarojj orakenacajjat alisnucupjjta. Muspharcañarac jupanacarojj jiwarayapjjta. Jiwatanacan waljätap laycusti janiw ucanac jaqhupct-ti.

21. Ucat nanacajj wastat orakejjar cut-tapjjta. Marcajjasti wastat uywanacar awatiña, yap yapuchañ kalltapjjaraquïna.

22. Nayajj chuymanïsaw maynïr yokajjar marcar pʼekechirïñapatac catuyjjta. Ucat uqhämasti janiw jucʼamp arscjjäti. Tatitun marcajjar qhuyapayañapataquiw achicta. Uqhamäpan.